ኤርምያሳ ማፃፋ 31

1 “ሄ ዎደ ታኒ እስራኤለ ዘረ ኡባስ ፆሰ ግዳና፤ ኤንትካ ታ አሰ ግዳና” ያጌስ ጎዳይ። 2 “ማሻፈ አትዳ አሳይ መላ ቢታን ታ ስንን ሳባ ደማና። ታኒ እስራኤለ አሳስ ሸምፖ እማናዉ ያና። 3 ታኒ ኤንታዉ ሃሆ በሳፈ ቆንጫስ፤ ታኒ ህንተና መርና ሲቁዋን ዶሳስ፤ ታ ቃያን ህንተና ታኮ ሺሻስ። 4 ጌላኦ እስራኤለ፥ ታ ህንተና ዛራዳ ኬፃና፤ ህንተካ ኬፀታና። ኔኒ ካራቡዋ ዛራ ኦይካዳ፥ ኡፋይተይሳታራ ኔኒ የፃናነ ዱራና። 5 ሳማረ ዙማ ቦላ ዎይነ ቶካና፤ ቶክዳይሳት እያ አይፍያን ኡፋይታና። 6 ኤፍሬማ ገዘ ቢታን ናገይሳት፥ ‘ሃ ዪተ፤ ጎዳኮ፥ ኑ ፆሳኮ፥ ፑደ ፅዮነ ቦስ’ ያግድ ፄግያ ዎደይ ያና” ያጌስ ጎዳይ። 7 “ያይቆባ አሳስ ኡፋይሳን የፅተ፤ ካዎተታ ኡባፈ አያ እስራኤለስ እልልተ። ‘እስራኤለ አሳፐ አትዳይሳታ አሻ’ ያግድ ጋላታ ማዝሙረ የፅተ። 8 ታኒ ኤንታ ፑደሀ ባጋ ቢታፈ ኤሀና፤ ሳኣ ጋፃፐ ታ ኤንታ ሺሻና። ቆቀት፥ ዎበት፥ ዎደ ማጫሳትነ እቀ ኦይክዳ ማጫሳት ኤንታራ እስፈ ያና፤ ዳሮ አሳይ ባንታ ቢታ ስማና። 9 ታ ኤንታ ዛራዳ ኤህያ ዎደ ኤንቲ ኡፋይሳፈ ደንዶይሳን ዬክሸነ ዎስሸ ያና። ታኒ ኤንታ ሻፋ ላንቅያራ፥ ኤንቲ በቶና ጊግዳ ኦግያራ ካለና። ታኒ እስራኤለስ አዋ፤ ኤፍሬም ታዉ ባይራ ናአ። 10 “ህንተኖ፥ ካዎተቶ፥ ጎዳ ቃላ ስእድ፥ ሃሆ በሳን፥ ዩሾይ አባን ተቀትዳ ቢታታን፥ ‘እስራኤለ ላልዳይስ እ ኤንታ ሺሻና፤ ሄንንቾይ ባ ዉድያ ሄመይሳዳ እ ኤንታ ሄማና’ ያግድ አዋጅተ። 11 ጎዳይ ያይቆባ ኮቻታ ዎዛና፤ እ ኤንታ፥ ኤንታፈ ምነይሳታ ኩሸፐ አሽስ። 12 ኤንቲ ይድ ፅዮነ ዙማ ቦላ ኡፋይሳን የፃና፤ ኤንቲ፥ ጎዳይ እምያ ኬሀተን፥ ካን፥ ዎይነን፥ ዛይተን፥ ዶርሳንነ መሄን ኡፋይታና። ኤንቲ ሃ ሎይድ ኡሽዳ አታክልተ በሳ መላ ግዳና፤ ኤንቲ ዛሪድ አዛኖኮና። 13 ሄ ዎደ ጌላኦት ኡፋይሳን ዱራና፤ ፓንትነ ጭማት ኡፋይታና። ታ ኤንታ ዬሁዋ ኡፋይሳን ላማና፤ ታ ኤንታ ምንና፤ ኤንታ አዛኑዋ ግሾ ኤንታ ኡፋይሳና። 14 ታኒ ካህነታስ ዳሮ ካ እማና፤ ታ አሳይ ታ ኬሀተ ካላና” ያጌስ ጎዳይ። 15 “ዬሆይነ ዘለልስ ራማ ካታማን ስኤትስ፤ ራሄላ ባ ናይታስ ዬካሱ፤ ኤንቲ ባይና ግሾ ዬሆ ምን እፃሱ” ያጌስ ጎዳይ። 16 “ዬሁዋ አግድ፥ ህንተ አፉ ቁችተ። ህንተ ኦዳ ኦሱዋስ ዎይቶ ህንተ ኤካና፤ ሞርከ ቢታፈ ህንተ ናይት ስማና። 17 ህንተ ናይት ባንታ ቢታ ስማናዉ ደእያ ግሾ፥ ህንተዉ ኡፋይስ ደኤስ” ያጌስ ጎዳይ። 18 “ኤፍሬማ ኮቻታ ዙዙን ታ ስአስ። ኤንቲ፥ ‘ኔኒ ኑና ዋትቦና ዎፋኖዳ ዋዳሳ፤ ኑካ ኬድዳ። ኔኒ ጎዳ፥ ኑ ፆሳ ግድያ ግሾ ኑና ዛራ፤ ኑኒ ኔኮ ስማና። 19 ኑ ካሰ ኔፐ ሃክድ ብዳ፤ ሽን ሀእ ኑ ናጋራ ፓፅዳ። ነ ኑና ሴርን፥ ዬላትድ ኑ ትራ ባቅዳ። ኑኒ ኑ ናአተ ላይ ናጋራ ግሾ፥ ካዉይዳነ ዬላትዳ’ ያግዶሶና። 20 “ኤፍሬም ታዉ ቱማ አልኦነ ታ ዶስያ ናአ ግደኔ? ታኒ እያ ሱን ደንያ ዎደ ኡባን እያ ሀሳያይስ። ሄሳ ግሾ፥ ታ ዎዛናይ እያ ላሞቴስ፤ ታ እያዉ ዳሮ ቃታይስ” ያጌስ ጎዳይ። 21 “ህንተ ኦግያን ማላታ ዎተ፤ ማላታ ም ኤስተ፤ ህንተ ብዳ ኦግያ አኬክተ። ጌላኦ እስራኤለ፥ ስማ፤ ነ ካታማታ ገላ። 22 ህንተኖ፥ አማኖይ ባይና እስራኤለቶ፥ አዉደ ጋካናዉ ቶይላተቲ? ጎዳይ ሳአ ቦላ ኦራባ ኦና፤ ሄስካ ማጫስ አደ ዩሾን ኤቃና” ያጌስ ጎዳይ። 23 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ “ታኒ እስራኤለ አሳ ድኤተፈ ዛራዳ ኤህያ ዎደ ይሁዳ ቢታንነ እያ ካታማታን ኤንቲ፥ ‘ነኖ ፅሎተ አቅያ በሳዉ፥ ጌሻ ደርያዉ፥ ጎዳይ ነና አንጆ’ ያግድ ዛሪድ ኦደታና። 24 ይሁዳንነ ይሁዳን ደእያ ካታማታን አሳይ ዳና፤ ጎሻንቾትነ ሄንንቾት ባንታ ዉድያራ ያን ዳና። 25 ታኒ ዳቡራንቾታ ጋሽትሳና፤ ቃስ ኮሻትድ ግልቅዳይሳታ ካልሳና” ያጌስ ጎዳይ። 26 ሄ ዎደ ባርካዳ ታ ዩሹዋ ፄላስ፤ ታ ስኮይ ታዉ ማልኦ ስኮ ግድስ። 27 “ታኒ እስራኤለንነ ይሁዳን አሰነ መሄ ኩንያ ዎደይ ያና። 28 ኤንታ ሾዳናዉ፥ ላላናዉ፥ ሽራ የጋናዉ፥ ይሳናዉነ ጋዶ ኤሀናዉ ደንድዳይሳዳ ኤንታ ዛራዳ ግምባናዉነ ቶካናዉ ደንዳና” ያጌስ ጎዳይ። 29 “ሄ ዎደ አሳይ፥ ‘አዋት ቃዉኤ ዎይነ አይፈ ምን፥ ናይታ አቻይ ዶጭስ’ ያግድ ሃሳያ ሌምሶይ አታና። 30 ሽን እሶይ እሶይ ባ ናጋራን ሀይቃና፤ ቃዉኤ ዎይነ አይፈ ምያ ኦደስካ እያ አቻይ ዶጫና” ያጌስ ጎዳይ። 31 “ታኒ እስራኤለራነ ይሁዳራ ኦራ ጫቆ ጫቃና ዎደይ ያና። 32 ሄ ጫቆይ ታ ኤንታ ግብፀፈ ከሳናዉ ኤንታ ኩሽያ ኦይክዳ ዎደ ኤንታ ማይዛታራ ጫቅዳ ጫቁዋ መላ ግደና። ታ ኤንታዉ አዝና መላ ግዳ ኡትንካ ኤንቲ ታ ጫቁዋ መንዶሶና” ያጌስ ጎዳይ። 33 “ሽን ታኒ ሄ ዎድያፐ ጉየ እስራኤለራ ጫቃና ጫቆይ ሀይሳ፦ ታኒ ታ ህግያ ኤንታ ጉግያን ዎና፤ ኤንታ ዎዛናን ፃፋና። ታኒ ኤንታ ፆሰ ግዳና፤ ኤንትካ ታ አሰ ግዳና። 34 ህዛፐ ጉየ፥ አስ ባ ላግያ ዎይኮ ባ እሻ፥ ‘ጎዳ ኤራ’ ያግድ ታማርሰና። ጉፈ ግታ ጋካናዉ ኡባይ ታና ኤራና። ታኒ ኤንታ ናቁዋ አቶ ጋና፤ ኤንታ ናጋራ ዛራዳ ቆፕከ” ያጌስ ጎዳይ። 35 ጋላስ ፖአና መላ አዋ ዎዳይ፥ ቃማ ፖአና መላ አጌናነ ፆልንቶ ኪትዳይ፥ አባ ቃድ፥ ቤታይ ጉማናዳ ኦይ፥ እያ ሱንይ ኡባፈ ዎልቃማ ጎዳ ጌተተይስ ሀይሳዳ ያጌስ። 36 “ሀ ኤቅድ ደእያ መተ ህገይ ታ ስንፈ ሻረትኮ፥ ሄ ዎደ እስራኤለ ኮቻይ ታ ደረ ግደይስ መርናዉ አታና” ያጌስ ጎዳይ። 37 “ቦላ ሳሎታ ዋናዉ ዎይኮ ጋርሳ ሳኣ ባሶይ ኤረታናዉ ዳንዳእኮ፥ ሄ ዎደ ታ እስራኤለ ዘረ ኡባ፥ ኤንቲ ኦዳ ናጋራ ግሾ ታ ስንፈ ድጋና” ያጌስ ጎዳይ። 38 “ሀናንኤላ ሻኮ ግምብያፈ ዶምድ፥ ማዛነ ፐንግያ ጋካናዉ የሩሳላመ ካታማይ ታ ካታማ ግድድ፥ ኬፀትያ ዎደይ ያና። 39 ሄ ካታማ ዛዋይ ዉሎሀ ባጋፈ ብድ ጋረባ ዙማነ ጎአ ዩሹዋ ጋካናዉ ዳልጋና። 40 አሀ ሞግያነ ብዶ የግያ ዛንጋራይነ ቀድሮና ዛንጋራፐ ቆሞራ ዶሎሀ ባጋራ ብድ፥ ፓራ ፐንገ ማዛንያ ጋካናዉ ደእያ ቢታ ኡባይ ጎዳስ ዱማትድ፥ ጌሽ ግዳና። ህዛፐ ጉየ፥ ካታማይ መርናዉ ሾደተና፤ ላለተና” ያጌስ ጎዳይ።