ኤርምያሳ ማፃፋ 38

1 ማታና ናአይ ሳፋፅ፥ ጳስኮራ ናአይ ጎዶልያ፥ ሰለማ ናአይ ዮካልነ ማልካያ ናአይ ጳስኮር ኤርምያስ አሳ ኡባስ ኦድዳ ቃላ ስእዶሶና። 2 ኤርምያስ፥ “ሀ ካታማን አትያ ኦንካ ኦላን፥ ኮሻንነ ቦሻን ሀይቃና። ሽን ባብሎነታስ ባ ኩሸ እምያ ኦንካ ሀይቀና፤ አታና፤ ደኦን ዳና። 3 የሩሳላመ ካታማይ ባብሎነ ካዋ ኦላንቾታ ኩሸን አድ እመታና፤ ኤንትካ እያ ፖሎ ድአና” ያጌስ ጎዳይ። 4 ሄሳፈ ጉየ፥ ሀላቃት ካዋኮ ብድ፥ “ሀ አደይ ሀይቃናዉ ኮሼስ፤ ሀይሳ መላ ኦዳ ኦድድ፥ ሀ ካታማን ደእያ ኦላንቾትነ አሳ ኡባይ ሹጋና መላ ኦስ። እ አሰ ቆህያባ አሞቴስፐ አትሽን፥ ሳሮባ አሞተና” ያግዶሶና። 5 ካዎይ ሰደቅያስ ዛሪድ፥ “ህንተ እያ ቦላ ኦና ግዳባ ታ ህንተና ድጋናዉ ዳንዳእከ” ያግስ። 6 ኤንቲ ኤርምያሳ ካዎ ጋ ዳባባን ደእያ፥ ካዋ ናኣ ማልካያ ሃ ኦላን፥ ዎዶሮን ዱገ የግዶሶና። ሄ ዎደ ሄ ኦላን ስልሞፐ አትሽን፥ ሃ ባዋ፤ ኤርምያስ ሄ ስልሙዋ ግዶ ገልስ። 7 ሽን ቶጰ አሰ ግድዳ፥ ካዎ ሞርናይ፥ አበመለከ ጌተትያ አደይ ኤርምያስ ኦላን የገትዳይሳ ስእስ። ሄ ዎደ ካዎይ ብንያመ ፐንገ ፕርዳ ኦይደን ኡትስ። 8 ኤበድ-መለክ ካዋኮ ብድ፥ ሀይሳዳ ያግስ፤ 9 “ታ ጎዳዉ ካዋዉ፥ ሀ አሳት ግታ ኢታባ ኦዶሶና፤ ኤንቲ ናብያ ኤርምያሳ ሃ ኦላን የግዶሶና። ቃስ ካታማን ቁም ባይና ግሾ እ ያን ኮሻን ሀይቃና” ያግስ። 10 ካዎይ ዛሪድ፥ ቶጰ አደይ ኤበድ-መለካኮ፥ “ሀስታሙ አስ ኔራ ኤካ ባዳ፥ ኤርምያስ ሀይቆና ደእሽን ሃ ኦላፈ ከስተ” ያግስ። 11 ኤበድ-መለክ አሰ ኤክድ፥ ብድ ካዎ ጋን ሻሎ ምንጅያ ኬፈ ጋርሳ ባጋራ ደእያ ክፍልያ ገልድ፥ ጋልአ ማኦነ ጩርቃ ኤክስ። ሄ ጩርቃ ዎዶሩዋ ፄራን ቃችድ፥ ኤርምያሳስ ዱገ ኦላ ግዶ የድስ። 12 ቶጰ አደይ ኤበድ-መለክ ኤርምያሳ ፄግድ፥ “ሀ ጩርቃ ማኡዋ ዎዶሩዋፐ ጋርሳራ ነ ሾጵያን ዎ” ያግስ። ኤርምያስ እ ግዳይሳዳ ኦስ። 13 ኤንቲ ዎዶሩዋራ ጎችድ፥ ኤርምያሳ ኦላፈ ከስድ፥ ናገይሳታ ኬ ገልስድ ጎርድዶሶና። 14 ሄሳፈ ጉየ፥ ካዎይ ሰደቅያስ ኤርምያሳ ኪትድ ኤህስድ፥ ፆሳ ኬ ገልያ ሄን ፐንግያ ማታን፥ “ታ ነና እስባ ኦይቻና፤ ነ ታፐ ቆሶፓ” ያግስ። 15 ኤርምያስ ዛሪድ፥ “ታ ኦድኮ፥ ነ ታና ዎኪ? ታ ዞርን ነ ስአካ” ያግስ። 16 ካዎይ ሰደቅያስ፥ “ደኦ ፆሳይ ኤርያ መላ፥ ታ ነና ዎከ፤ ነና ዎናዉ ኮየይሳታስ አዳ እምከ” ያግድ ቆሳን ኤርምያሳስ ጫቅስ። 17 ኤርምያስ ዛሪድ፥ “ጎዳይ፥ ኡባፈ ዎልቃማ ፆሳይ፥ እስራኤለ ፆሳይ ሀይሳዳ ያጌስ፦ ‘ባብሎነ ካዋ ሀላቃታስ ነ ኩሸ እምኮ፥ ነ ፓፃ አታና፤ ሀ ካታማይ ታማን ፁገተና፤ ነነ ነ ኬ አሳይ ደኦን ዳና። 18 ሽን ነ ኤንታዉ ኩሸ እሞና እፅኮ፥ ሀ ካታማይ ባብሎነታስ አድ እመታና፤ ኤንቲ እያ ፁጋና፤ ነ ኤንታፈ ከሳ ኤካካ’ " ያግስ። 19 ካዎይ ሰደቅያስ፥ “ታ ያየይ ሀ ቢታ ካድድ፥ ባብሎነ ብዳ አይሁደታሳ። ባብሎነት ታና ኤንታ ኩሸን አድ እምን፥ አይሁደት ታና ካአና” ያግድ ዛርስ። 20 ኤርምያስ፥ “አይኮይ ባዋ! ኤንቲ ነና ኤንታዉ አድ እሞኮና። ታ ኦድያ ጎዳ ቃላስ ሀያና ኪተታ። ሄስ ነዉ ሎኦ ግዳና፤ ነ ፓፃ አታና። 21 ሽን ነ ኩሸ እሞና እፅኮ፥ ጎዳይ ታና በስዳ ቆንጨ ደኤስ። 22 ሄስካ፥ ይሁዳ ካዎ ጋን አትዳ ማጫሳት ኡባይ ድኤትድ፥ ባብሎነ ሀላቃታኮ ባና። ኤንቲ ኔኮ፥ ‘ነ ማታ ላገት ነና ባለዶሶና፤ ኤንቲ ነና ፆንዶሶና። ሽን ሀእ ነ ቶሆይ ስልሞ ግዶ ገልን፥ ሄ ላገት ነና የግድ ብዶሶና’ ያጋና። 23 ነ ማቸትነ ነ ናይት ኡባይ ባብሎነ ድኤትድ ባና። ነ ኤንታ ኩሸፐ ከሳ ኤካካ። ባብሎነ ካዎይ ነና ኦይካና። ሀ ካታማይ ታማን ፁገታና” ያግስ። 24 ሰደቅያስ ዛሪድ፥ “ሀይሳ ነ ታዉ ኦድዳይሳ አሳስ ኦዶና እፅኮ ነ ሀይቃካ። 25 ሀላቃት ታ ኔራ ኦደትዳይሳ ስእድ፥ ‘ኔራ ካዋራ አይ ኦደትዳኮ ኑስ ኦዳ። ነ ኑስ ቆቶና እፅኮ፥ ኑ ነና ዎኮ’ ያግድ ኦይቻና። 26 ኔኒ፥ ‘ታ ያን ሀይቆና መላ ታና ዛራዳ ቃሾ ኬ ግድዳ ዮናታና ሶ የዶና መላ ካዋ ዎሳስ’ " ጋዳ ዛራ ያጋ። 27 ሄሳፈ ጉየ፥ ሀላቃት ኡባይ ኤርምያሳኮ ይድ፥ ሄ ኦይሻ ኦይችዶሶና። ካዎይ እያ ኪትዳይሳዳ ኤንታዉ ኦድስ፤ ኤርምያሳራ ካዋራ ሃሳይሽን ስእዳ አስ ባይና ግሾ ኤንቲ ስእ ግዶሶና። 28 የሩሳላመይ ኦይከታና ዎደይ ጋካናዉ፥ ኤርምያስ ናገይሳታ ዳባባን ጎርደትድ ጋምእስ።