እዮባ ማፃፋ 31

1 “ጌላኦ ፄላዳ አሞቶና መላ፥ ታኒ ታ አይፍያራ ጫቀታስ። 2 ቦላን ደእያ ፆሳ ማታፐ አሳስ እመትዳ ቃዳይ አይቤ? ሳሎን ደእያ ኡባ ዳንዳእያ ፆሳይ አሳስ እምያ ግሾይ አይቤ? 3 ኢታታ ቦላ ቦሽ፥ ባላ ኦይሳታ ቦላ ጋዶይ ጋካናይስ ኤረትዳባ ግደነዬ? 4 ፆሳይ ታ ኦግያ ኡባ በኤነዬ? ታ ታንጉዋ ኡባ ታይበነዬ? 5 “ታኒ ዎርዶን ደእዳባ ግድኮ፥ አሰ ጭምዳባ ግድኮ፥ 6 ፆሳይ ታና ልከ ምዛነን ማዛኖ፤ ያትድ ታ ፅሎ ግደይሳ በኦ። 7 ታ ሄመይ ኦገፐ ከይዳባ ግድኮ፥ ታ ዎዛናይ ታ አይፈይ ፄልዳባ አሞትዳባ ግድኮ፥ ታ ኩሸይ ናጋራን ቱንዳባ ግድኮ፥ 8 ታ ዶላይ ሾደትድ ዮ፤ ታ ዘርዳይሳ ሀር ሞ። 9 “ታ ዎዛናይ ሀራ ማጫስ አሞትዳባ ግድኮ፥ ዎይኮ ታኒ ታ ሾሩዋ ማችዉ ጌድዳባ ግድኮ፥ 10 ታ ማችያ ሀራ አሳስ ጋጮ፤ ኢራ ሀራ አደይ አቆ። 11 ሄስ ዬላይያ ናጋራስ ኮሽያ ግታ ፕርዳ። 12 ሀ ናጋራይ ታማዳ ፁግያባ ግድያ ግሾ፥ ታ አቁዋ ኡባ ይሳናሽን። 13 “ታ አደ ዎይኮ ታ ማጫ አይለት አቤት ግን፥ ኤንታዉ ፕርዶና እፅዳባ ግድኮ፥ 14 ፆሳ ስንን ታ ፕርዳስ ሺቅያ ዎደ ዋናኔ? እ ታና ኦይችያ ዎደ ታኒ ዎይጋ ዛራኔ? 15 ታና መዳ ፆሳይ ኤንታ እ መበነዬ? ኑና ኡባ ኑ አየ ኡሎን መዳይ እስ እያ ግደነዬ? 16 “ታኒ ማንቆት ዎስዳባ ድግዳባ ግድኮ፥ ዎይኮ አምኤታ ምንና አግዳባ ግድኮ፥ 17 ይኦ ናይት መላ አቅያ ዎደ በአሸ፥ ታኒ ታርካ ምዳባ ግድኮ፥ 18 ታኒ ኤንታ ታ ናአተፈ ዶማዳ ኤንታ አዋዳ ድቻስ፤ ታ የለቶሶፐ ዶማዳ አምኤታ ማዳስ። 19 ማኦይ ይን ሜጎይ ዎያ ኡራ፥ ዎይኮ ካሎ ደእያ መቶታንቹዋ በአዳ፥ 20 ታ ዶርሳታ እክሰፐ ኦሰትዳ ማኦ ማይዝን፥ ታና አንጆና ብዳይ ደእኮ፥ 21 ታኒ ሞቶን ኤንታ ሻትማናይሳ ኤራዳ፥ ይኦ ናይታ ናቅዳባ ግድኮ፥ 22 ታ ቀሰይ ኩርያፐ መኦ፤ ታ ኩሸይ ሀሽያፐ ካረት ዎ። 23 ፆሳ ሀንቁዋ ያይዳ ግሾ ሄሳ ኦናዉ ዳንዳእከ። 24 “ታኒ ዎርቃን አማነትዳባ ግድኮ፥ ዎይኮ ዋላህ ባይና ዎርቃ ‘ታ ጬቆይ ነና’ ግዳባ ግድኮ፥ 25 ታ ዱረተ ዳሮተን፥ ታ ኩሸይ ደምዳ ዎን ኡፋይትዳባ ግድኮ፥ 26 አዋ ጶለ በአዳ፥ ዎይኮ አጌና ሎኦተ ፄላዳ፥ 27 ታ ዎዛናይ ጌማን ኤንታ ናሽቤና፥ ዎይኮ ታ ኤንታ ዬራዳ ጎይናብከ። 28 ሄስ ፕርዳ ኤህያ ናጋራ ግድያ ግሾ ፆሳ ካዳስ ጉሱ። 29 “ታ ሞርከታ ኩንደን ኡፋይታብከ፤ ኤንታ ጋክዳ መቱዋን ሀሹ ጋብከ። 30 ‘ታ ሞርከይ ዮ’ ያጋ ባዳዳ፥ ናጋራ ኦብከ። 31 ታ ሶ አሳይ፥ ‘እያ ሶን ካ ምድ ካሎናይ ኦኔ?’ ያግድ ማርካቶሶና። 32 ታ ሶይ ኡባ ዎደ ዶያ ግድያ ግሾ፥ ኦገ አስ ካረን አቅ ኤረና። 33 ሀራት ኦይሳዳ፥ ታ ናጋራ ታ ዎዛናን ገንብከ። 34 አሳ ፖኮስ ያያዳ፥ ኤንታ ቦርያስ ዳጋማዳ፥ ሶ ገላዳ ቆሰትዳ ዎደይ ዴና። 35 “ታና ስእያ አስ ደኤረነሽን፥ ታ ኦዳይ ቱማ ግደይሳ ፓራማይስ፤ ኡባ ዳንዳእያ ፆሳይ ታዉ ዛሮ እሞ ታ ሞርከይ ባ ሞቱዋ ፃፍድ ሺሽን ታ በአርክናሽን። 36 በእያኮ ዎይቶዳ ቆን አዳ ማአናሽን፥ ካላቻዳ ታ ሁጰን ዎናሽን! 37 ታኒ ማት ደእያ አሳዳ ፆሳኮ ሺቃዳ፥ ታ ኦዳባ ኡባ እያዉ ቆንጭሳናሽን! 38 “ታ ጎሻ ቢታይ ታ ቦላ ዋስዳባ ግድኮ፥ ዳሳትካ አፉን ላክዳባ ግድኮ፥ 39 ሄ ቢታን ካፅዳባ ሚሸ ቃንፆና ኤክዳባ ግድኮ፥ ዎይኮ ሄ ቢታ ኦይሳታ ኮሻን ዎዳባ ግድኮ፥ 40 ታዉ ሄ ቢታን ግስተ ግሾ አጉን፥ ባንጋ ግሾ ሻራፍ ዶሎ” ያግስ። እዮባ ኦዳይ ሄሳን ፖለትስ።