ታይቦ ማፃፋ 24

1 ባላም እስራኤለ አንጀይስ ጎዳ ኡፋይስዳይሳ እ በእዳ ዎደ ካሰ እ ኦይሳዳ ብታ ማላ ኮይቤና፥ ሽን ባ ሶምኡዋ መላ ቢታኮ ዛርስ። 2 እ ቁ ግድ ፄልያ ዎደ እስራኤለ አሳይ ባ ኮቻን ኮቻን ዱንካንድ ኡትዳይሳ በእያ ዎደ ፆሳ አያናይ እያ ቦላ ዎስ። 3 እ ሀይሳዳ ያግድ ትንብተ ኦድስ፤ “ብኦራ ናኣ ባላማ ትንብትያ፤ እያ አይፈይ ዶየትን ፄልያ አድያ ትንብትያ፤ 4 ፆሳይ ግያባ ስኤይሳ ትንብትያ፤ እ ሶምኦራ ጉፋንን፥ እያ አይፈይ ዶየትዳይስ፤ ኡባ ዳንዳእያ ፆሳ ቆንጨ በእዳ አድያ ትንብተይ ሀይሳ። 5 ያይቆባ፥ ነ ዱንካነት፥ እስራኤለ፥ ነ ጉታት፥ አይባ ሎኦና። 6 ኤንቲ ምጨትዳ ዛንጋራዳ፥ ሻፋ ጋፃን ደእያ አታክልትያ በሳዳ፥ ጎዳይ ቶክዳ ጎዳረ ኡዳ፥ ሃ ጋፃን ደእያ ዝጋ ምዳ ሀኖሶና። 7 ኤንታ ፁጋይ ሃን ኩማና፤ ኤንታ ኮቻይ ግድያ ሃ ደማና። ኤንታ ካዎይ ካዋ አጋጋፐ አና፤ ኤንታ ካዎተይ ቦንቸታና። 8 ፆሳይ ኤንታ ግብፀፈ ከስስ፤ እ ምኖ መንዳ ኤንታዉ ኦለቴስ። ኤንታ ሞርከታ መንረስ፤ ኤንታ መቀ ጋጬስ፤ ባ ዶንግያን ጫዴስ። 9 ኤንቲ ጋሞዳ ዝንእዶሶና፤ ማጫ ጋሞዳ ዛቁልዶሶና፤ ኤንታ ቦሸቻናዉ ዳንዳኤይ ኦኔ? ኤንታ አንጅያ ኡባይ አንጀታና፤ ኤንታ ባድያ ኡባይ ባደታና” ያግስ። 10 ያትን፥ ባላቅ ባላማ ቦላ ይሎትስ። ባ ኩሽያ ባቅድ ባላማኮ፥ “ታ ሞርከታ ባዳና መላ ታ ነና ኤሀስ፥ ሽን ኔኒ ሄ ቶሆ ኤንታ አንጃዳሳ። 11 ሀእ ኤለሳዳ ነ ሶ ባ፤ ታ ነና ዳሮባ ዎይታና ጋስ፥ ሽን ኔኒ ዎይቱዋ ኤኮና መላ ጎዳይ ነና ድግስ” ያግስ። 12 ባላም ባላቃኮ ዛሪድ፥ “ኔኒ ታኮ ኪትዳ አሳኮ፥ 13 ‘ባላቅ ሀር አቶሽን ባ ካዎተን ኩምዳ ብራነ ዎርቃ ታዉ እምያባ ግድኮካ ጎዳይ ኦድዳይሳ መንዳ ሎኦ ዎይኮ ኢታ ታ ሸነን ኦናዉ ዳንዳእከ። ታኒ ጎዳይ ግያባ ፃላላ ኦዳና’ ጋዳ ነዉ ኦዳብክናዬ?” ያግስ። 14 ባላም ባላቃኮ፥ “ታኒ ሀእ ታ አሳኮ ባይስ፤ ሽን ነ ሃያ፤ እስራኤለ አሳይ ያና ዎድያን ነ አሳ ኦናባ ታ ነዉ ኦዳና” ያግስ። 15 እ ባ ትንብትያ ሀይሳዳ ያግድ ኦድስ፤ “እያ አይፈይ ትሽ ኦድ ፄልያ፥ ብኦራ ናኣ ባላማ ትንብተይ ሀይሳ። 16 ሀይስ ፆሳይ ግያባ ስኤይሳ ትንብትያ፥ ኡባ ዳንዳእያ ፆሳፈ ግድዳ ኤራተ ደእያ ኡራይ። ልች ግድ ሶምኦራ ጉፋንን፥ እያ አይፈይ ዶየትዳይስነ ኡባ ዳንዳእያ ፆሳ ቆንጨ በኤይሳ ትንብተይ ሀይሳ። 17 “ታኒ እያ በአይስ፥ ሽን ዎደይ ሀእ ግደና፤ ታ እያ ፄላይስ፥ ሽን ማታን ዴና። ያይቆባ ሼሻፐ ፆልንቶይ ከያና፤ እስራኤለፐ ካዎተ ፃምአይ ከያና። ሞአበ አሳ ሶምኡዋ እ ጋጫና፤ ሴታ አሳ ኡባ ሁጵያ እ ትንቻና። 18 ኤዶመይ ፆነታና፤ እያ ሞርከይ ሳይረይ ኦይከታና፤ ሽን እስራኤለይ ምን ምን ባና። 19 ያይቆባፐ ሃረይስ ከያና፤ ካታማን ፓፃ አትዳይሳታ ይሳና” ያግስ። 20 ሄሳፈ ጉየ፥ ባላም አማለቃ በእድ ሀይሳዳ ያግድ ትንብተ ኦድስ፤ “አማለቅ ካዎተታ ግዶን ኮይሮ፥ ሽን ኤንታ ዉርሰይ ዮ” ያግስ። 21 ቃስ ባላም ቄና በእድ ሀይሳዳ ያግድ ትንብተ ኦድስ። “ህንተ ደእያ በሳይ ሳሮ በሲ፤ ህንተ ኬይ ዛላ ቦላ ኬፀትስ። 22 ሽን አሶረት ህንተና ድእያ ዎደ፥ ህንተ ቄና አሳይ ያና” ያግስ። 23 ዉርሰን ባላም ሀይሳዳ ያግድ ትንብተ ኦድስ፤ “ፆሳይ ሄሳ ኦያ ዎደ፥ ኦን ደኦን ዳናዉ ዳንዳኢ? 24 ማርካበት ቆጵሮሳፐ ያና፤ ኤንቲ አሶረነ ኤቤራ ፆናና፤ ሽን ኤንትካ ቃስ ያና” ያግስ። 25 ሄሳፈ ጉየ፥ ባላም ደንድድ ባ ሶ ስምስ፤ ባላቅካ ባ ኦግያ ብስ።