ሌምሶ ማፃፋ 1

1 ሀይሳቲ እስራኤለ ካዋ ዳዊታ ናኣ ሶሎሞነ ሌምሶታ። 2 ሌምሶት አሳይ ጭንጫተ፥ ሴራነ ኤራ ሃሳያ አኬካናዉ ማዶሶና። 3 ኤንቲ ጭንጫተ፥ ፅሎተ፥ ሱረ ፕርድነ ሱረ ዎዛን ዳና መላ ታማርሶሶና። 4 ኤያታስ አኬካ እሜስ፤ ናአተታስ ኤራተነ ካሃማተ እሜስ። 5 ጭንጫት ሀ ሌምሶታ ስእድ፥ ኤራ ጉጆሶና፤ አኬካንቾት ሎኦ ዞረ ኤኮሶና። 6 ሄሳን ሌምሶታነ ኤንታ ብርሸ፥ ጭንጫተ ኦዳነ ኤንታ ቃንእሸታ አኬካናዉ ዳንዳኤቴስ። 7 ጎዳስ ያሽ ጭንጫተስ ዶመ፤ ሽን ኤያት ጭንጫተነ ሴራ ካኦሶና። 8 ታ ናአዉ፥ ነ አዋ ዞርያ ስአ፤ ነ አየ ትምርትያ ካፓ። 9 ሄስ ነ ሁጵያስ ቦንቾ ካላቻ፤ ነ ቆያስ ጎዝዳ ግዳና። 10 ታ ናአዉ፥ ነና ናጋራንቾት ጭምኮ ኤሮ ጎፓ። 11 ኤንቲ፥ “ኑራ የ፤ አሰ ዎናዉ ሆክድ ናጎስ፤ ፅሎታ ዎናዉ ቆሰቶስ። 12 ስኦለይ ምተይሳዳ ኑካ ኤንታ ፓፃ ምቶስ፤ ኑ ኤንታ ኦላን የገትያ አሳዳ ኦና። 13 ኑኒ አልኦ ሚሸ ኡባ ደማና፤ ኑ ኬ ቦንቀ ሚሸን ኩንና። 14 ኑራ ላገታ፤ ኑ ደምዳባ እስፈ ሻከታና” ያጋና። 15 ታ ናአዉ፥ ኤንታራ ሄመቶፋ፤ ኤንታ ኦግያራ ባናዉ ነ ቶሁዋ ደንፋ። 16 ኤንቲ ኢታባ ኦናዉ ዎፆሶና፤ አሳ ሱ ጉሳናዉ ያ ሃ ጎሶና። 17 ካፎይ ፄልሽን፥ እያ ኦይካናዉ ግተ የገ ማደና። 18 ሽን ኤንቲ ባንታ ሱ ጉሳናዉ ሆኮሶና፤ ባንታ ሸምፑዋ ዎናዉ ቆሰቶሶና። 19 ገነን ጎአ ደምያ አሳ ዉርሰ ሄሳ መላ፤ ኤንቲ ሺሽዳ ሻሎይ ኤንታ ሸምፑዋ ኤኬስ። 20 ጭንጫተ ዳጋላ ቦላ ኤቃዳ ፄጋዉሱ፤ ዳባባን ባ ቃላ ቁ ኦዳ ስሳዉሱ። 21 ጭንጫተ አስ ሺቅያ በሳን ኤቃዳ ፄጋዉሱ፤ ካታማ ገልያ ፐንገን ኤቃዳ ሀይሳዳ ያጋዉሱ። 22 “ህንተኖ፥ አኬክ ፓጭዳይሳቶ፥ ህንተ አዉደ ጋካናዉ ኤያ ግድድ ዳኔ? ቀልቅሰይሳቶ፥ አዉደ ጋካናዉ ኡፋይታኔ? ኤያቶ፥ አዉደ ጋካናዉ ኤራተ እፃኔ? 23 ታ ሴራ ህንተ ስእዳባ ግድያኮ፥ ታኒ ታ ኤራ ህንተ ቦላ ጉሳና፤ ታ ቃላካ ህንተና ታማርሳና። 24 ሽን ታ ፄግዳ ዎደ ህንተ ኮዮና እፅዳ ግሾ፤ ታኒ ኩሸ ምጭን ኦንካ አኬክቦና ግሾ፤ 25 ታ ዞርያ ህንተ ካዳ ግሾ፤ ታ ሴራካ ኤክቦና ግሾ፤ 26 ህንተና መቶይ ጋክያ ዎደ ታ ሚጫና፤ ህንተ ዳጋማን ኮኮርያ ዎደ ታ ቀልቅሳና። 27 ጋዶይ ኡሾዳ ህንተ ቦላ ያ ዎደ፥ መቶይ ጎተዳ ህንተ ቦላ ኤቅያ ዎደ፥ ኡንእነ ዋየይ ህንተ ቦላ ጋክያ ዎደ፥ ታኒ ህንተና ቀልቅሳና። 28 “ሄ ዎደ ኤንቲ ታና ፄጋና፤ ሽን ታ ኮይከ፤ ኤንቲ ታና ምንድ ኮያና፤ ሽን ደሞኮና። 29 ኤንቲ ኤራተ እፅዳ ግሾ፤ ጎዳ ያሽ ዶርቦና ግሾ፥ 30 ታ ዞርያ ኤክቦና ግሾ፤ ታ ሴራ ካዳ ግሾ፤ 31 ኤንቲ ባንታ ኦሱዋ አይፍያ ማና፤ ባንታ ቆፋ አይፍያ ካላና። 32 አኬክ ፓጭዳይሳታ ጭንጫተፈ ሃከይስ ዎስ፤ ኤያታ ቀል ጉስ ይሴስ። 33 ሽን ታ ኦድያባ ስእያ ኡባይ ሳሮ ዳና፤ መቶ ህርጋፈካ ሸምፓና።"