ዮሃንሳ ቆንጨ 9

1 ሄሳፈ ጉየ፥ እቻሻን ኪታንቾይ ባ ሞይዝያ ፑንን ሳሎፐ ዱገ ሳአ ኩንድዳ ፆልንቶ በአስ። ሄ ፆልንቱዋስ ዎልቃማ ኦላ ቁልፐይ እመትስ። 2 ፆልንቶይ ኦላ ዶይዳ ዎደ ዳልጋ ጮጨፐ ከይያ ጩያ መላ ጩያይ ሄ ኦላፈ ከይስ። ሄ ኦላፈ ከይዳ ጩያን አውነ ሳሎይ ምዶሶና። 3 ሄ ጩያፐ ቦለይ ከይድ ሳአን ዎስ። ሳአን ደእያ ኮርነታስ ደእያ ዎልቃ መላ ዎልቃይ ቦለታስ እመትስ። 4 ፆሳ ማታመይ ሶምኦን ባይና አሳ ፃላላፐ አትሽን፥ ሳአን ደእያ ማታ ዎይኮ ም ዎይኮ አይ ጭልኦባ ግድን ቆሆና መላ ቦለታስ ኦደትስ። 5 ቦለት አሳ እቻሹ አጌና ጋካናዉ ፓፃ ካአና መላ ማት እመትስፐ አትሽን፥ አሳ ዎና መላ ግደና። ኮርነይ አሰ ዱክን ዛመይሳ መላ ቦለይ ዱክድ ዛምሴስ። 6 ሄ ጋላሳታን አሳይ ሀይቆ ኮያና፥ ሽን ደመና። ኤንቲ ሀይቃናዉ አሞታና፥ ሽን ሀይቆይ ኤንታፈ ሃካና። 7 ቦለይ ኦላስ ጊግድ ኡትዳ ፓራ ዳኔስ። ቦልያ ሁጰን ዎርቃ ካላች ደኤስ፤ ኤንታ ሶምኦይካ አሳ ሶምኦ ዳኔስ። 8 እያ ብናናይ ማጫሳ ብናና መላ አዱሰ። ኤንታ አቻይካ ጋሞ አች ዳኔስ። 9 ኤንታዉ ትራ ቦላ ዎያ ብራታ ፁሩረይ ደኤስ፤ ኤንታ ቀፍያ ግርሳይ ኦለታናዉ ጋላብያ ፓራነ ፓራ ጋርያ ግርሳ መላ። 10 ኤንታዉ ኮርነ ጎይና ዳንያ ጎይንነ ዱክያ ዪሽ ደኤስ። ሄ ጎይናን እቻሹ አጌና አሳ ቆሀና መላ ማት እመትስ። 11 ኤንታና ሃርያ ካዎይ ደኤስ፤ ሄ ካዎይ ኦላ ኪታንቹዋ። እያ ሱንይ እብራወ ዶናን አብዶና፤ ቃስ ግርከ ዶናን አጶልዮና ጌተቴስ። እያ ሱን ብርሸይ “ይሰይሳ” ጉሱ። 12 ኮይሮ አየይ አስ፤ ሄኮ፥ ቡሮ ሀራ ናምኡ አየት ኤሶን ሀናና። 13 ኡሱፑን ኪታንቾይ ባ ሞይዝያ ፑንስ። ፆሳ ስንን ኤቅዳ፥ ዎርቃ ያርሾ በሳን ደእያ ኦይዱ ካጨታፐ እስ ግርስ ስአስ። 14 ሄ ግርሳይ ሞይዘ ኦይክዳ ኡሱፑን ኪታንቹዋኮ፥ “ኤፍራፂሳ ጌተትያ ግታ ሻፋን ቃሸትዳ ኦይዱ ኪታንቾታ ብርሻ” ያግስ። 15 ቢታ ቦላ ደእያ አሳፐ ስኩዋ ዎና መላ ሄ ሳትያስ፥ ሄ ጋላሳስ፥ ሄ አጌናስነ ሄ ላይስ ጊግድ ኡትዳ ኦይዱ ኪታንቾት ብርሸትዶሶና። 16 ኦላ ፓራ ቶግያ ኦላንቾታ ፓይዶይ ዳሮ ፄቱ ምሎነ ግደይሳ ስአስ። 17 ቃስ ታ ቆንጨን ፓራታነ ሄ ፓራታ ቶግዳ አሳ በአስ። ሄ አሳይ ትራን ዎያ ብራታ ፁሩረይ ታማ ቦንቆ መላ ዞኦ፥ ያክንተ መላ፥ ካሬ ካሎሰ መላነ ዲነ መላ ጭሊሎ። ፓራታ ሁጰይ ጋሞ ሁጰ መላ፤ ኤንታ ዶናፐ ታም፥ ጩይነ ዲነይ ከይስ። 18 ፓራታ ዶናፐ ከይዳ ታማን፥ ጩያንነ ዲንያን ሄ ሄ ጋዶታን ሳአን ደእያ አሳፐ ስኮይ ሀይቅስ። 19 ሄ ፓራታ ዎልቃይ ኤንታ ዶና ግዶንነ ጎይናን ደኤስ። ኤንታ ጎይናይካ ሾሻ ሁጰ መላ፤ ኤንቲ እያራ አሳ ቆሆሶና። 20 ሀ ጋዶታፐ አትዳይሳት ባንታ ኩሸ ኦሱዋፐ ስምቦኮና። ኤንቲ ቱና አያናን ዎርቃፈ፥ ብራፐ፥ ናሰ ብራታፐነ ሹቻፈ ኦሰትዳ ኤቃስ ጎይኖሶና። ፄላናዉ፥ ስአናዉ፥ ሄመታናዉ ዳንዳኦና ኤቃታስ ጎይነይሳ አግቦኮና። 21 አሳይ ዎይሳ፥ ብተይሳ፥ ላይማተይሳነ ካይሰይሳ አግድ ማሮታ ኦይችቦኮና።