Iyyoba Maxaafa 23

1 Iyyobi haysada yaagidi zaaris; 2 Hachika ta cametada zuuzumayis; ta ooley mino gidikoka iya kushey ta bolla deexeysa aggibeenna. 3 Iya demmana bessaa ta erida gidarkina; I de7iya bessaa ta gakarkina! 4 Taani ta metuwa iya sinthan wothanashin! Ta doona mooton kunthanashin! 5 I taw zaaranay aybeko eranashin, I ay giyako be7anashin! 6 I ba gita wolqan taara eqetanesha? Akay, I tana si7ana. 7 Yan suure asi iyara mootetanaw danda7ees; ta daynnay tana merinaw shatinthana. 8 Shin taani doloha biiko I yan deenna; taani wuloha biiko iya yan demmike. 9 I pudehan oothiya wode taani iya be7ike; dugeha bagga simmiya wode taani iya demmike. 10 Shin I ta tanguwa ubbaa erees; I tana paaciya wode taani worqada geeyada keyana. 11 Ta tohoy iya tanguwa kaallidi bees; iya ogiyape haddirsi ushachi simmabike. 12 Iya doonape keyiya kiitaape taani shaaketabike; iya qaala ta wozanan wothas. 13 Xoossay laametenna; Iyara eqetanay baawa, I koydaba oothees. 14 I ta bolla qopidaysa polis; hessa mela hara daro halchoti iyaw de7oosona. 15 Hessa gisho, iya sinthan eqanaw daro yashshees; hessa ubbaa qopiya wode kokorayis. 16 Xoossay ta wozanay doccana mela oothis; Ubbaa danda7iya Xoossay tana daganthis. 17 Sakana dhumay ta som7uwa goozikoka, tana he dhumay haasaya diggibeenna.