Iyyoba Maxaafa 26

1 Iyyobi haysada yaagidi zaaris; 2 “Neeni wolqi baynaysa ayba maaddadii? Daaburanchuwa waata ashshadii? 3 Cincatethi pacidaysas ay zore immadii? Ay mela eratethi qoncisadii? 4 Neeni ha qaala odetana mela nena maaddiday oonee? Ne odan mela nena denthethiday oodde ayyaanee?” yaagis. 5 Beldadoosi zaaridi, “Hayqida asaa ayyaanati, garsan haatha giddon de7eysati kokoroosona. 6 Xoossa sinthan Si7ooley qonce; aybika iya genthanaw danda7enna. 7 Xoossay pudeha salota coo miccis; sa7aa kaqoy bayna bessan kaqis. 8 I shaaratan haathe kunthees; haatha deexuwan shaarati daaketokona. 9 I ba shaara miccidi, kumtha ageena kammees. 10 Poo7o dhumape shaakanaw, abba gaxan Xoossay zawa wothis. 11 I hanqetiya wode, salo tuuqeti dagaman kokoroosona. 12 Ba wolqan abba si77i oothees; ba cincatethan Ra7aaba geetetiya do7aa dhaysees. 13 I ba shempuwan salota geeshshees; iya kushey xongetiya shooshaa caddees. 14 Haysati Xoossay oothiya oosotape guuthata; nu iya kalkashaa xalaala si7oos; iya wolqaa deshuwa akeekanaw danda7ey oonee?” yaagis.