Leemiso Maxaafa 7

1 Ta na7aw, ta qaala naaga; ta kiitaa ne wozanan wotha. 2 De7on daanaw ta kiita ootha; ta timirtiya ne ayfe na77eda naaga. 3 Ne kushen enta qacha; ne wozanan enta xaafa. 4 Cincatethi ne michida, akeeka ne mata dabboda xeella. 5 Enti nena layma maccasapenne ba qaalan cimmiya hara maccasape naagana. 6 Issi gallas ta maskootera kare xeellas. 7 Eratethi pacida na7atethata be7as; enta giddofe issoy daro eeya. 8 He na7atethay ogera bishe, issi layma maccase keethaa matara aadhees; I soo efiya ogiya simmidi I sooko bis. 9 He wode sa7i laadees. 10 Maccasiya iya demmasu; iya layma gideysa I ma7oy erisees; iya asa cimmanaw halchada keyasu. 11 Iya xaltaamanne yeelli bayna maccas; son wopu gada uttuku. 12 Iya issi toho ogen, issi toho giyan, issi toho dabaaban eqada naagawusu. 13 Iya he na7atetha qoommada yeerasu; iya tishshi oothada xeellashe haysada yaagasu; 14 “Taani ta yarshuwa yarshada, ta qangetha hachi gathas. 15 Yaatada nena mokanaw keyas; nena daro koyas; hiza nena demmas. 16 Taani Gibxefe yida, alleeqetida afila hiixas. 17 Taani ta hiixa, karbefe, almunepenne qarafape, oosetida shittuwa puukas. 18 Haaya; wontana gakanaw siiqo aloos; qoometidi ufaytoos. 19 Ta azinay son deenna; haaho biitta bis. 20 Miishe karxiita kunthidi bida gisho, ageena kumonna soo simmenna” yaagasu. 21 Ba mal7o odan iya balethasu; ba liiqo inxarsan iya cimmasu. 22 Boori shukettanaw beysada, gaari eesotidi xihen geleysada, I iyo kaallidi bis. 23 Toori iya wozanaa caddidaada hanis; gite giddo gelida kafo daanis; hessi ubbay iya shempuwa dhaysanaw haneysa eribeenna. 24 Hiza ta na7aw, tana si7a; ta doonape keyiya qaala hayza. 25 Ne wozanay maccasa geedo boopo; I ogiyan gelada dhayopa. 26 Iya cadda yeggidaysati daro; iya wodhidaysati guutha gidokona. 27 I soy duufoko efiya oge; hayqoko kaalethiya horoga.