Salmos 137

1 Babilônia tetã py yakã oĩ va’e yvýry roguapy roinya py rojae’o va’ekue Jerusalém tetã re orema’endu’a vy. 2 Oremba’epu ixã reta va’e roupi imoiny va’ekue ha’e py yvyra ikuai va’e rakã re. 3 Mba’eta escravo-rã orereraa are kuery ojerure roporaei aguã. “Peporaei na orevy Sião regua mboraei”, he’i okuapy. 4 Ha’e gui mba’exa ‘rã tu roporaei mboraei Senhor pegua yvy mboae re orekuai vy? 5 Mba’eta ndee Jerusalém tetã gui xerexarai ri ramo xepo aiporu kuaa regua ta’ipirupa. 6 Xeapekũ tojapa xejuru py re xapy’a rei ndere naxema’endu’avei rã, e’ỹ vy Jerusalém gui mba’emo arovy’ave ramo. 7 Senhor, nema’endu’a ke Edom pygua kuery rembopaga aguã Jerusalém tetã oitya jave ikuaiague re. Mba’eta ha’e kuery ma “Peitypa ke, peitypa yvy katy peve!” he’i okuapy va’ekue. 8 Babilônia tetã pygua kuery, peneretã voi ombovaipa pyrã oĩ. Ovy’a ete ‘rã orere pejapoague re penembopaga va’e. 9 Ovy’a ‘rã penda’y kuery voi ojopy vy ita re omou’ũmba avi va’e. Nhanderuete ojeroviapy oikoa jarovy’a aguã regua Mboraeirã Davi ombopara va’ekue.