Kitsariyaxi 15

1 Niuki Muhawi hepaɨtsita mieme: ‘Axi kiekariyari Muhawi kwieyaritsie mukuma, kaniuka’unarieni, xeitɨkariyaritsie kaneutipariyarieni. Kixi kiekariyari Muhawi kwieyaritsie mukuma, kaniuka’unarieni, xeitɨkariyaritsie kaneutipariyarieni. 2 Riwuni kiekatari tukita mekaneutahakeni, kakakaɨyarixi memɨte’atimawiyarɨwatsie, memɨtitsuanikɨ. Muhawi kaniutatsuakani Newu hetsiemieme meta Merewa. Yunaitɨ yumu’utsie mekanimu’uxirietɨkani, meta yɨmɨxiya naime mekanataxitɨkani. 3 Yunaitɨ, mekaniutitsuanani, kaye ‘utɨma mekaniu’uwani, hiwerika kamixayari me’anakatɨtɨkaitɨ. Kii heima mekaniutitsuanani meta teɨteri memayukuxexeɨriwatsie. 4 Hetsiwuni meta ‘Eraré karima mekaniutihiwani, Yahatsa mɨrakutewatsie paitɨ kana’eniɨriɨkɨni wahiwari. ‘Ayumieme memɨkamama muhawitsixi mekaniutihiwani, peru mekaniutiyɨyɨakani marikakɨ. 5 Ne ‘iyari Muhawi hetsiemieme kaniutahiwani, memuyu’unatɨwe Tsuhaxi paitɨ mekanekɨkani, meta ‘Ekɨrati-Tseritsiya paitɨ. Ruhiti paitɨ mekananutikɨkani me’utitsuatɨ, ‘uximatɨarikatsata, mekaniutihiwani me’u’uxetɨri Kurunahini huyeyari ‘utɨma. 6 Haa kanakawaxɨani Nimirini mieme, tupiriya kaniutiyɨnare. ‘Ɨtsiri kaniumaweni, tiyɨratɨ tixaɨtɨ pɨkatiyuhayewaxɨ. 7 ‘Ayumieme mekatenetɨni, Hapuri ‘akiyari manuyeka matsi huma paitɨ, waɨkawa piinitɨarika memɨte’ukuxeɨriekai. 8 Me’u’uxetɨ memutihiwa Muhawi kwieyari manuye’atɨkatsie paitɨ kaniumieni. ‘Ekɨrahini paitɨ watsuari kaniye’axeni, metatsiere Wexi-‘Erini kaniye’axeni. 9 Rimuni hayaritsie xuriyakɨ pɨhɨpɨne, matsi tawarita kwiniya nekanikawiwimɨkɨ: xeime maye nepanɨnɨ’ani muhawitsixi memuyuta’unaxɨa wahetsiemieme meta kemɨ’ane ‘akuxi kwiepa memu’uwani wahetsiemieme.