Nɨawari 36

1 ‘Axatiyuruwame mɨpaɨ kanaineni: «Kakaɨyari neka’ayexeiyatɨ ne’iyaritsie paitɨ yanepɨ’ane». Kemɨtixeiya Kakaɨyari pɨkamakaxe. 2 Mɨpaɨ pɨtiku’eriwa kename ‘aixɨa tiuka’iyari ‘axamɨti’ane pɨkaxani’erie. 3 Yakɨ xeikɨa pɨtikuxata pɨtiyukananaima, ‘aixɨa mɨti’ane kaneuyehɨani meta ‘aixɨa mɨtiyurienenikɨ. 4 Yu’utatsie kakaitɨ ‘axamɨtiyurienikɨ xeikɨa pɨtiku’eriwa, ‘axamɨ’ane huyeyari pɨkataunie, ‘axamɨti’ane pɨkatiku’eiriwe. 5 Yawé, ‘anaki’eriya muyuawitsie paitɨ pɨye’axe, kepemɨkatiyupata haitsie paitɨ pɨye’axe. 6 Kemɨtiheitserie ‘ahetsɨa mieme hɨri ‘amutɨtɨ hepaɨ pɨ’ane, ke’aixɨa pemɨtiyuriene haramara mɨmariwe ’emeukatewa hepaɨ pɨ’ane. Yawé, ’ekɨ pepɨwa’ɨwiya teɨteri meta yeuta memɨte’u’uwa, 7 witsipɨ’ane ‘anaki’eriya mɨmariwe, Kakaɨyari. Yunaitɨ teɨteri mepikaxexeiya memuyu’awietanikɨ ‘a’anate ’etɨriyayatɨa. 8 ‘Akie meputihuxarɨwe naitɨ mɨtixuawekɨ, ‘ahaa ‘aixɨa ma’ane muwanake pepɨwaharitɨa. 9 ‘Ahetsie tukari mɨtiwiekɨ, ‘Ahekɨariyapa te’u’uwatɨ hekɨariya temuxeiya tepɨyɨwawe. 10 Kenewanaki’erieka kemɨ’ane memɨmetsimate, heitserie memexeiya wahetsiemieme ‘aixɨa ketineyurieneni. 11 Kwinimieme mɨtiyutamariwekata pɨkanetsitaketsinani, Kakaɨyari mɨka’ayexeiya ‘axamɨkanetsiyurienikɨ pepɨka’ipitɨaka. 12 Xekeniwaruxeiya kememɨtehekaxɨrɨwe ‘axateyuruwamete: Kepauka memekaxɨrɨwe kwiepa, tawarita memanuku’uni mepɨkayɨwawe.