Nɨawari 57

1 Xɨa’ui Kakaɨyari, kenenenenimayaka, keneneutinenimayata, ne ‘ahetsie nepɨtiwiya. ‘A’anate ’etɨriyayatɨa nepɨneti’awieta, naitɨ ‘uximatɨarika ranuyeyayuke nepuwayeyani. 2 Kakaɨyari ‘Amutewi nekanahiwiwani, Kakaɨyari kemɨ’ane mɨnetsiparewie. 3 Muyuawitsie paitɨ ‘akawetɨ kaneniutawikweitsitɨwani, kemɨ’ane memɨnetsi’uweiya menetsimienike kaniwatate’ani. Kakaɨyari yunaki’eriya meta tita yuri mɨraine kanenanɨ’airiemɨkɨ. 4 ‘Ɨrawetsixi teyukwa’amete wahixɨapa nekaniuweni, teɨteri me’ayu’eririyatɨ ne’aurie mekanawetɨkani. Watamete ‘ɨrɨ meta pitsika kanihɨkɨtɨni. Waneni, ‘ixipara mataxikauni kanihɨkɨtɨni. 5 Peru ’ekɨ, Kakaɨyari, muyuawi reuyeta peputewi, ‘axawatɨriya kwie naime kehekɨariwiyani. 6 Winiyari nehuyeta mekaniuwieni, ‘ana nekanewaɨriyatɨ nepatɨa. Nehuyeta mekanewatixawarita, peru mɨkɨ pɨta muwa mepeukaxɨri. 7 Kakaɨyari, ne’iyari pɨheitserie, ne’iyari puyuwaɨriya. Nɨawari ‘ahetsiemieme nepɨtikwika. 8 Ne ‘iyari, kenanutanieri. Kanari meta xaweri xekenanutanenieri. Hekwame tukari tepanutahɨtɨani. 9 Ti’aitame, nepɨmetsinɨawani teɨteri watsata, nɨawari ‘ahetsiemieme nepɨtikwika nuiwarite wahɨxie. 10 ‘Anaki’eriya mɨmariwe muyuawitsie paitɨ mɨye’axekɨ, Yuri kepemɨtarahɨawe haitsie paitɨ pɨye’axe. 11 ‘Ekɨ, Kakaɨyari, muyuawi reuyeta peputewi, ‘axawatɨriya kwie naime kehekɨariwiyani.