JOHAN 6

1 Te phoeiah Jesuh tah Galilee Tiberias tuili rhalvangan la cet. 2 Aka tlo rhoek soah a saii miknoek te a hmuh uh dongah amah te hlangping loh muep a vai. 3 Te dongah Jesuh te tlang la luei tih a hnukbang rhoek taengah pahoi ngol. 4 Te vaengah Judah rhoek kah yoom khotue te om tom coeng. 5 Jesuh loh a mik te a dai hatah a taengla hlangping muep ha lo te a hmuh. Te dongah Philip la, " He rhoek loh a caak uh ham buh te melam n’lai uh eh? " a ti nah. 6 Amah loh saii ham a cai te a ming dongah anih te noemcai ham ni a ti nah. 7 Philip loh Jesuh te, “Denarii yahnih neh vaidam te a yool he poel boeih a doe uh amah amih ham rhoeh mahpawh,” a ti nah. 8 A hnukbang rhoek khuikah pakhat Simon Peter kah a mana Andrew loh a taengah, 9 “Nga lungnit neh cangtun vaidam hluem nga aka khueh tongpa ca tah om ta he, tedae he rhoek he heyet hamla balam lae a om?” a ti nah. 10 Jesuh loh, " Hlang rhoek te ngol sak uh ," a ti nah. Tekah hmuen ah khopol muep a om dongah hlang hlangmi te thawngnga tluk ngol uh. 11 Te dongah Jesuh loh vaidam te a loh tih a uem phoeiah aka vael rhoek taengah a tael. Te vanbangla nga te khaw a ngaih yet te a paek. 12 A hah uh phoeiah a hnukbang rhoek te, " Aka coih a nueipil rhoek te coi uh,te daengah ni pakhat khaw a poci pawt eh? ," a ti nah. 13 Te dongah a caak uh phoeikah cangtun vaidam panga kah a coih a nueipil te a coi uh vaengah voh hlainit dongah a sang uh. 14 Miknoek a saii te hlang rhoek loh a hmuh tih, “Anih tah Diklai dongla aka pawk tonghma rhep ni,” a ti uh. 15 Amah te tuuk tih manghai la khueh ham paan la a cai uh te Jesuh loh a ming. Te dongah amah bueng tlang la koep khoe uh. 16 Hlaem a pha vaengah tah a hnukbang rhoek te tuili la suntla uh. 17 Lawng khuila kun uh tih tuili rhalvangan kah Kapernaum la cet uh. Te phoeiah a hmuep loh a kae coeng dae Jesuh tah amih taengah pawk hlan. 18 Te vaengah khohli puei hli tih tuili te a haeng. 19 Phalong pakul panga neh sawmthum tluk a kaih uh vaengah Jesuh te tuili soah cet tih lawng taengla halo te a hmuh uh tih a rhih uh. 20 Tedae amih te, " Kai ni rhih uh boeh ," a ti nah. 21 Te vaengah ngaingaih uh tih amah te lawng khuila a doe uh. Te daengah a caeh thil uh kho te lawng loh tlek a pha. 22 Tekah a vuen ah tuili rhalvangan kah hlangping aka pai loh lawng pakhat bueng pawt atah teah a tloe a om pawt khaw, lawng khuiah Jesuh loh a hnukbang rhoek a caeh puei kolla a hnukbang rhoek bueng a caeh uh te khaw a hmuh uh. 23 Tiberias lamkah lawng a tloe rhoek tah Boeipa loh vaidam te a uem tih a caak nah uh hmuen te vat a pha uh. 24 Jesuh neh a hnukbang rhoek a om pawt te hlangping loh a hmuh. Te dongah amih tah lawng khuila kun uh tih Jesuh toem ham Kapernaum la pawk uh. 25 Amah tuili ah val a hmuh uh vaengah, “Rhabbi, me vaengah lae hela na om,” a ti nauh. 26 Jesuh loh amih te a doo tih, " Nangmih te rhep rhep kan thui, miknoek na hmuh uh dongah pawt tih, vaidam te na caak uh tih na hah uh dongah ni kai nan toem uh . 27 Aka poci thai caak ham pawt tih dungyan hingnah la aka naeh caak ham mah saiiuh. Te tah Pa Pathen kah kutnoek a daeng tangtae hlang capa loh nangmih m’paek ni ,," a ti nah. 28 Te dongah amah te, “Pathen kah khoboe te n’saii ham atah balae ka saii eh?,” a ti nauh. 29 Jesuh loh amih te a doo tih, " A tueih hlang na tangnah uh te Pathen kah khoboe ni he ," a ti nah. 30 Te dongah amah te, “Te koinih miknoek balae na saii? Ka hmuh uh daengah ni nang kan tangnah uh van eh. Balae na saii eh? 31 A pa rhoek loh khosoek ah manna te a caak uh. Amih kah caak ham te vaan lamkah vaidam a paek te a daek tangtae om van,” a ti nauh. 32 Te dongah Jesuh loh amih te, " Nangmih te rhep, rhep kan thui, Moses loh vaan lamkah vaidam te nangmih m’paek moenih, tedae a Pa loh vaan lamkah oltak vaidam te nangmih m’paek . 33 Pathen kah vaidam tah vaan lamkah aka rhum la om tih Diklai ah hingnah a paek ," a ti nah. 34 Te dongah amah te, “Boeipa, tekah vaidam te kaimih vawp vawp m’pae,” a ti nauh. 35 Jesuh loh amih te, " Kai tah hingnah vaidam ni, kai taengah aka pawk tah a bungpong tlaih pawt vetih kai aka tangnah tah tui koep hal tlaih mahpawh . 36 Tedae nangmih loh kai nan hmuh uh lalah nan tangnah uh moenih ka ti . 37 Pa loh kai m’paek boeih te tah kamah taengla ha pawk vetih, kai taengah aka pawk te tah phawn ka haek tlaih mahpawh . 38 Vaan lamkah ka suntlak he kamah kongaih saii ham pawt tih kai aka tueih kah kongaih te saii ham ni . 39 He tah kai aka tueih kah kongaih ni. Te daengah ni kamah m’paek boeih te ka hlong pawt eh. Tedae a hnukkhueng khohnin ah te te ka thoh ni . 40 He tah a pa kah kongaih ni. Te daengah ni capa aka hmu tih amah te aka tangnah boeih loh dungyan hingnah a dang eh . 41 Kai tah vaan lamkah aka suntla vaidam ni ," a ti dongah amah taengah Judah rhoek loh a kohuet pauh. 42 Te dongah, “Anih he Joseph capa Jesuh moenih a? “A manu neh a napa te khaw mamih loh m’ming uh. Metlam lae, ‘Vaan lamkah ka rhum, ’ a ti he?” a ti uh. 43 Jesuh loh amih te a doo tih, " Khat neh khat kohuet uh boeh . 44 Kai aka tueih pa loh anih te a doek pawt atah kai taengah ha pawk thai moenih. Anih te kai loh a hnukkhueng khohnin ah ka thoh ni . 45 Tonghma cabu dongah a daek te om coeng tih Pathen kah a thuituen la boeih om uh ni. Pa taengkah a yaak tih aka cang boeih tah kai taengla ha pawk . 46 Pathen taengah aka om pawt atah pakhat long khaw pa te a hmuh moenih. Amah long tah pa te a hmuh coeng . 47 Nangmih taengah rhep rhep ka thui, aka tangnah loh dungyan hingnah a khueh . 48 Kai tah hingnah buh ni . 49 Na pa rhoek loh khosoek ah manna a caak uh tih duek uh . 50 He tah vaan lamkah aka suntla vaidam la a om dongah aka ca tah duek van pawh . 51 Kai tah vaan lamkah aka suntla tih aka hing vaidam ni. Khat khat long ni he kah vaidam he a caak atah yoeyah la hing ni. Kai tah Diklai hingnah la aka om ka pumsa ni vaidam la kam paek eh? ,” a ti nah. 52 Te dongah Judah rhoek tah amamih hnuei uh thae tih, “Anih loh a saa te caak ham mamih m’paek thai aya?,” a ti uh. 53 Te dongah Jesuh loh amih te, " Nangmih te rhep, rhep kan thui, hlang capa kah a saa te na ca uh pawt tih a thii te na ok uh pawt atah, namamih khuiah hingnah na khueh uh moenih . 54 Ka saa aka ca tih ka thii aka o tah dungyan hingnah a khueh. A hnukkhueng khohnin ah anih te kai loh ka thoh ni . 55 Ka saa tah caak tang la om tih ka thii tah ok koi tang la om . 56 Ka saa aka ca neh ka thii aka o tah ka khuiah te naeh tih kai khaw anih khuiah ka naeh . 57 Aka hing a pa loh kai n’tueih tih a pa rhangneh kai ka hing bangla ka saa aka ca tah kai rhangneh hing van ni . 58 He tah vaan lamkah aka suntla vaidam ni. Na pa rhoek loh a caak uh tih a duek uh bang moenih. Tekah vaidam aka ca tah yoeyah la hing ni ," a ti nah. 59 He rhoek he Kapernaum kah tunim ah a thuituen vaengah a thui. 60 A hnukbang rhoek loh muep a yaak uh vaengah, “Hekah olka he kaelkhak la om, u long a yakming thai eh?” a ti uh. 61 He kawngah a hnukbang rhoek a kohuet uh te Jesuh amah loh a ming dongah amih te, " He loh nangmih n’khah a? 62 Hlang capa te lamhma kah a om nah la a luei te na hmu uh koinih ta ? 63 Mueihla tah aka hing sak la om tih, pumsa tah a hong lam pataeng a hoeikhang sak moenih. Nangmih taeng ah ka thui olka rhoek te Mueihla la om tih hingnah la om . 64 Tedae nangmih khuiah aka om pakhat loh a tangnah moenih ," a ti nah. Te tah aka tangnah pawt la om tih te tah amah aka voei la a om khaw a tongnah lamlong ni Jesuh loh a ming. 65 Te phoeiah, " A pa lamloh a taengah paek la a om pawt atah kai taengla ha pawk thai pawt te nangmih taengah kan thui he ," a ti nah. 66 Te lamkah tah a hnukbang rhoek te a hnuk la muep nong uh tih a taengah pongpa uh pawh. 67 Te dongah Jesuh loh hlainit rhoek te, " Nangmih khaw caeh na ngaih uh pawt nim? ," a ti nah. 68 Amah te Simon Peter loh, “Boeipa, u taengah nim ka caeh uh eh? 69 Kumhal hingnah ol na khueh te ka tangnah uh dongah nang tah Pathen kah hlangcim ni tila ka ming uh,” a ti nah. 70 Jesuh loh amih te, " Kai loh nangmih hlainit te kan tuek moenih a? Tedae nangmih khuiah rhaithae pakhat om ," a ti nah. 71 Simon capa Judas Iskariot ni a thui. Hlainit khuiah anih pakhat loh Jesuh te voeih hamla cai.