LUKA 21

1 A dan vaengah kuirhang rhoek kah a kutdoe tangkabu khuila a sang uh te a hmuh. 2 Te vaengah khodaeng nuhmai pakhat loh mucih panit a sang te a hmuh bal. 3 Te dongah, " Nangmih taengah rhep kan thui, hekah nuhmai khodaeng loh amih boeih lakah muep a sang coeng . 4 Amih tah amamih kah acoih te kutdoe la boeih a sanguh. Anih long tah a vawtthoeknah khui lamkah a khosaknah ham a khueh te boeih a sang coeng ," a ti nah. 5 Bawkim te lungto khaw then tih nawnnah neh a thoeihcam coeng bet a ti uh. 6 " Hekah he na hmuh uh dae khohnin ha pawk ni. Te vaengah a phil pawt te lungto pakhat dongah lungto pakhat khaw hmaai mahpawh ," a ti nah. 7 Amah te a dawt uh tih, “Saya, te koinih te te me vaengah lae a om eh? Miknoek loh a om tom vaengah balae aka om eh?” a ti nauh. 8 Te dongah Jesuh loh. " Ng ’ rhaithi pawt ham hmatuh. Ka ming neh muep ha pawk uh vetih , ’ Kai coeng ni, a tue loh yoei coeng , ’ ti uh cakhaw amih hnukah cet uh boeh . 9 Caem neh soekloeknah na yaak uh vaengah let uh boeh. Te te lamhma la a om ham ngawn a kuek. Tedae a bawtnah long tah pha koeloe mahpawh ," a ti nah. 10 Te phoeiah amih te, " Namtu loh namtu, ram loh ram a thoh thil ni . 11 Lingluei puei neh khokha loh hmuen tom ah tlung vetih duektahaw khaw pul ni. Mueirhih neh vaan lamkah miknoek long khaw mat ha thoeng ni . 12 Tedae te hlan ah te hlang boeih kah a kut te nangmih pum dongla a hlah uh vetih n’hnaemtaek uh ni. Tunim neh thongim la n’thak uh ni. Kai ming kongah manghai tom neh khoboei tom taengla ng’khuen uh ni . 13 Nangmih ham laipai la poeh bitni . 14 Te dongah na thinko khuiah khueh uh lamtah huul uh ham khaw tawn boeh . 15 Kai loh olka neh cueihnah te nangmih kam paek bitni. Te te nangmih aka kingkalh rhoek boeih loh a kamkaih ham neh a oelh ham coeng thai mahpawh . 16 Nangmih te manu napa, manuca rhoek, huiko neh paya laikoi long khaw m’voeih uh vetih n’duek sak ni . 17 Kai ming kongah hlang boeih kah a hmuhuet la na om uh ni . 18 Tedae na lu sokah sampin pataeng poci loengloeng mahpawh . 19 Namamih kah uehnah nen ni na hinglu te na kaelh uh eh . 20 Caem loh Jerusalem a vael uh te na hmuh uh vaengah, anih kah mitmoengnah loh yoei coeng tite ming uh . 21 Te vaengah Judea kah rhoek loh tlang la rhaelrham uh saeh. A laklung kah rhoek long khaw coe uh saeh. Tekah kho kah rhoek khaw a kuila kun boel saeh . 22 Te dongah a daek tangtae te boeih soep sak ham ni te rhoek kah kutthungnah khohnin tah a om . 23 Anunae bungvawn la aka om neh te khohnin kah cacun rhoek aih. Diklai hmankah a kueknah a len neh he pilnam taengah kosi la om bitni . 24 Te vaengah cunghang ha dongah cungku uh vetih namtom boeih taengah a sol uh ni. Namtom rhoek kah a tue a soep duela Jerusalem khaw namtom kah a til ham ni a om eh . 25 Te vaengah tah miknoek boeih loh khomik, hla neh aisi dongah om uh ni. Tuipuei kah olhum neh tuiphu kah ngaihitnah dongah namtom rhoek kah ngaisaknah te diklai ah om ni . 26 Lunglai ah aka thoeng rhihnah neh lamsonah dongah hlang he sut hit uh ni. Vaan kah thaomnah long khaw hinghuen uh ni . 27 Te vaengah khomai dongah thaomnah neh thangpomnah a len neh aka pawk hlang capa te a hmuh uh ni . 28 Nangmih kah tlannah tah a yoei coeng dongah, aka om ham te a moe vaengah pai uh lamtah na lu dangrhoek uh ," a ti nah. 29 Te phoeiah amih ham nuettahnah neh, " Thaibu neh thing boeih ke na hmuh uh . 30 Tahae kah aka boe te aka hmuh rhoek long tah namah neh namah te, khohal vat a pha coeng tila na ming uh . 31 Te vanbangla nangmih long khaw he he ha thoeng tih, na hmuh uh vaengah Pathen kah ram tah pai tom coeng tila ming uh . 32 Nangmih taengah rhep ka thui, boeih a thoeng hlan atah tahae kah cadil loh a khum mueh la om mahpawh . 33 Vaan neh diklai tah khum ni, tedae kai ol khum loengloeng mahpawh . 34 Te dongah namamih te ngaithuen uh lukilnah, rhuihahnah, khosak rhamsak kah mawntangnah dongah na thinko loh n’nan ve. Tekah khohnin loh nangmih soah buengrhuet ha pai ve . 35 Thaang bangla diklai maelhmai tom ah aka ngol rhoek boeih te a thoeng thil ni . 36 Tedae aka thangthui rhoek loh a tue cungkuem dongah hakuh. Te daengah ni om la aka cai boeih he poenghal ham neh, hlang capa hmaiah pai ham na noeng uh eh ," a ti nah. 37 Khothaih puet bawkim ah om tih a thuituen dae khoyin ah tah Olive a ti uh tlang soah cet tih rhaeh. 38 Te vaengah pilnam boeih loh anih ol yaak ham bawkim khuikah amah taengla ana yue uh coeng.