२ कुरिन्थि 6

¹ नाव जो परमेश्वर उन सहकर्मी आयेव ईद भी हेळतेव कि आऊन अनुग्रह जो नीम मा आत, अदरी वाया होगगोळबाळी.

² यतिकी आव रा अनतान, “तान खुश आगोद समय दा ना नीन केळ कोंडीन, अदिक उद्धार इन दिन ना नीन सहायता माळदीन.” नोळी, ईग अद खुश इन समय आद; नोळी, ईग अद उद्धार इन दिन आद.

³ नाव यातोदु मात दा ठोकर तिनोद यातोद भी मवका कोळालेव ताकी नाम स्यावा मा यातोद भी दोष बरबाळुल.

⁴ लेकीन हर मात देल परमेश्वर उन सेवकगोळ्द घाई तान लायकत इक प्रगट माळतेव, बळा धीरज देल, क्लेशगोळ देल, दरिद्रगोळ देल, संकटगोळ देल,

⁵ क्वाळा तिनोद देल, कैद आगदुर देल, दंगा देल, मयनत देल, च्याता ईरोद देल, उपास माळदुर देल,

⁶ पवित्रता देल, आ ग्यान देल, धीरज देल, परमेश्वर उन प्यार अदिक कृपा देल, पवित्र आत्मा देल,

⁷ सही प्यार देल, सच्चाई इन वचन देल, परमेश्वर उन सामर्थ्य देल, न्यायीपन इन हथियारगोळ देल जो उजवा डाक्या कयगोळ दा आव,

⁸ आदर अदिक निरादर देल, बेकार कीर्ति अदिक वळ्लीद कीर्ति देल. अगर भरमुसावाळेर घाई मालूम आगतेव तरी भी सही आयेव;

⁹ अनजानगोळ्द घाई आयेव, तरी भी प्रसिद्ध आयेव; सोत्‍तुर घाई आयेव अदिक नोळी जित्‍ता आयेव; बळ्सकोमावाळेर्द घाई आयेव पर जीव देल कोनसुस्कु आगालेव;

¹⁰ शोक माळावाळेर्द घाई आयेव, पर हमेशा खुश ईरतेव; कंगालगोळ्द घाई आयेव, पर हापाळ मुंदुर इक धनवान माळ बुळतेव; हिंग आयेव जसा नाम हात्‍ती येनु हैलेच तरी भी सब येनारा ईटतेव.

¹¹ हे कुरिन्थिगोळा, नाव तान मन तेरूकु नीम से मातगोळ हेळेव, नाम मन नीम दी तेरूकु आव

¹² नीम साटी नाम मन दा यातोदु संकोच हैलेच, लेकीन नीम्द अच मनगोळ दा संकोच आद.

¹³ लेकीन तान चिकोर जान्सकु नीम से अनतीन कि नीव भी अदुर बदला दा तान मन तेर्द बुळी.

¹⁴ अविश्वासीगोळ्द सांगुळ संबंध माळकु जुआळी दा जुत्सबाळी, यतिकी न्यायीपन अदिक अन्याय इन येन मेल-जोल आद? या उजुळ अदिक अंधार इन येन संगती?

¹⁵ अदिक मसीह अन्द शैतान उन सांगुळ येन लगाव? या विश्वासी इन सांगुळ अविश्वासी इन येन नाता?

¹⁶ अदिक मूर्तीगोळ्द सांगुळ परमेश्वर उन मंदिर इन येन संबंध? यतिकी नाव रा जित्‍ता परमेश्वर उन मंदिर हुयेव; ह्यांग परमेश्वर अंदान, “ना आंदुर दा ईराइन अदिक आंदुर दा नळुतोगाईन; अदिक ना आंदुर परमेश्वर आगाईन, अदिक आंदुर नान लॉकुर आदार.”

¹⁷ इदुरसाटी प्रभु अनतान, “आंदुर न्याड्या दा टु होळी अदिक ब्यार्र ईरी; अदिक अशुध्द वस्तु उक मुट बाळी, रा ना नीमी ग्रहण माळाईन;

¹⁸ अदिक ना नीम आप्प आगाईन, अदिक नीव नान पार अदिक पोर आदीर. ईद सर्वशक्तिमान प्रभु परमेश्वर उन वचन हुन.”