२ पतरस 1

¹ शमौन पतरस उन दी टु, जो यीशु मसीह अन्द दास अदिक प्रेरित आर, आ लॉकुर हेसुर यार नामव परमेश्वर अदिक उद्धारकर्ता यीशु मसीह अन्द न्याय इन द्वारा नाम घाई किमती विश्वास प्राप्त माळ्यार.

² परमेश्वर उन अदिक नाम प्रभु यीशु उन पयचान इन द्वारा अनुग्रह अदिक शांती नीम दा बहुतायत देल वाळुस्त होगुल.

³ यतिकी परमेश्वर उन ईश्वरीय सामर्थ्य सप्पा येनारा जो भक्तिमय जीवन हततद, नामी अदुर्दा पयचान इन द्वारा कोटान, याव नामी तान अच महिमा अदिक सदगुण इन अनुसार कारदान.

⁴ यऊर द्वारा आव नामी किमती अदिक हापाळ अच धोळ्द वादा कोटुन: कि इऊर द्वारा नीव आ भ्रष्टता देल बीळस्कु, जो दुनिया दा बेकार अभिलाषागोळ देल आगतद, ईश्वरीय स्वभाव इन सहभागी आगेगी.

⁵ ईदा कारण सप्पा प्रकार इन कोशिश माळकु तान विश्वास दा भक्तिभाव इक जोळसी; अदिक भक्तिभाव दा ग्यान इक,

⁶ अदिक तान ग्यान दा आत्मसंयम इक जोळ्स, अदिक आत्मसंयम दा धीरज इक जोळसी, अदिक धीरज दा परमेश्वर उन भक्ति इक,

⁷ अदिक नीम्द परमेश्वर उन भक्ति दा मसीह भाईचारा अक; अदिक मसीह भाईचारा दा प्यार इक जोळ्सी.

⁸ यतिकी ईव पुरा गुणगोळ्द जरवत आद, अदिक अगर ईव मातगोळ नीम दा बहुतायत देल आव रा ईद नीमी नाम्द प्रभु यीशु मसीह अन ग्यान दा क्रियाशील अदिक प्रभावशाली माळ्याव.

⁹ लेकीन अगर नीम दा ईव मातगोळ ईलच, रा नीम इक दुर दृष्टी ईला नीव कुढ्ढ आईर तथा मारतोगीर कि नीम्द पयला अन पाप तोळकु आगेग्याव.

¹⁰ ईदा कारण हे वार्टुरा, तान कारूकु आगोद, अदिक निवळुस्द आगोद इक सिद्ध माळोर साटी वळ्लीद रीति देल कोशिश माळतोगी, यतिकी अगर हिंग माळीर रा यागलु ठोकर तिनतीदील;

¹¹ बल्‍की ई रीति देल नीव नाम्द प्रभु अदिक उद्धारकर्ता यीशु मसीह अन्द अनन्त राज्य दा धोळ्द आदर इन सांगुळ प्रवेश माळ सकीर.

¹² इदुरसाटी अगर नीव ईव मातगोळी जान्सतीर, अदिक जो सच्चाई इन वचन नीमी सिक्याद अदुर दा बन्सकु ईरतीर, तरी ना नीमी ईव मातगोळ्द याद तोरसोर साटी हमेशा तयार ईराइन.

¹³ ना ईद तान साटी सही सम्सतीन कि यागासताका ना ईद मय दा जित्‍ता आईन, आगासताका ना नीमी याद तोर्सतेला ईराइन.

¹⁴ यतिकी ना जान्सतीन कि ना तान नाशवन्त मय बिळावाळा आईन, ह्यांग कि नामव प्रभु यीशु मसीह नानी ईद हेळीदुन.

¹⁵ इदुरसाटी ना तान दी टु पुरा कोशिश माळाईन कि नान सोत्‍तुर बाद्दा भी नीव लॉकुर ईव सप्पा मातगोळ इक हमेशा याद माळ सकीर.

¹⁶ यतिकी याग नाव नीमी तान प्रभु यीशु मसीह अन सामर्थ्य इन अदिक आगमन इन समाचार कोटीदेव, रा अद चतुराई देल नटकु कात्‍तागोळ्द अनुकरण ईला ईरोद बल्‍की नाव खुद अच आऊन महानता अक नोळीदेव.

¹⁷ यतिकी याग आऊक परमेश्वर आप्प से आदर अदिक प्रशंसा सिक्त अदिक आ प्रतापमय महिमा दा टु ईद वाणी बत्‍त, “ईव नान प्रिय पार हुन, यार देल ना खुश आईन.”

¹⁸ याग नाव आऊन सांगुळ पवित्र पहाळी मा ईरेव अदिक आकाश टु ईद वाणी बर्त केळदेव.

¹⁹ नाम हात्‍ती जो भविष्यवक्तागोळ वचन आद, अद ई घटना देल मजबूत ठहरूस्त. नीव ईद वळ्लीद माळतीर जो ईद सम्सकु आऊन मा ध्यान माळतीर कि आव ऊंद दिंग्या हुन, जो अंधार जागा दा आ समय ताका उजुळ कोळतेला ईरतद यागासताका कि व्हातुर आगाल अदिक व्हातुर इन तारा नीम्द मन दा चमकुसाल्द.

²⁰ सब से धोळ मात ईद आद कि नीमी ईद जान्स कोम पायजे कि शास्त्र अन यातोदारा भी भविष्यवाणी यातोदु भविष्यवक्ता अन नीजी विचारगोळ्द आधार मा कोळ्द स्पष्टीकरण आल्लच.

²¹ यतिकी यातोदारा भी भविष्यवाणी मंळसा अन इच्छा देल यागलु आगीदील, लेकीन भक्त जन प्रभावित आगकु पवित्र आत्मा अन द्वारा परमेश्वर उन दी टु माताळतोगोर.