३ यूहन्ना 1

¹ नान स्याणा अन दी टु प्रिय गयुस उन हेसुर, यार से ना सही प्यार ईटतीन.

² हे प्रिय, नान ईद प्रार्थना आद कि ह्यांग नी आत्मिक उन्नती माळेत्या, हांग अच नी सप्पा मातगोळ दा उन्नती माळ अदिक भला चंगा ईर.

³ यतिकी याग वार्टुर बंदकु नीन आ सच्चाई इन गवाही कोट्टुर, यदुर मा खराखुरा नळुत्या, रा ना हापाळ खुश आदीन.

⁴ नानी इदुर से यक्कुल मात्‍त यातोदु खुशी इन जरवत हैलेच यदरी ना केळाईन, कि नान चिकोर सच्चाई मा नळुतार.

⁵ हे प्रिय, जो येनारा नी आ वार्टुर सांगुळ माळत्या, जो परदेशी आद, अदरी सच्चाई देल माळत्या.

⁶ आंदुर मंडली इन मुंद नीन प्यार इन गवाही कोटार. अगर नी आंदरी आ प्रकार देल विदा माळ्या यात्‍ता प्रकार देल परमेश्वर उन लॉकुर साटी उचित आद रा वळ्लीद माळ्या.

⁷ यतिकी आंदुर आ हेसुर साटी होटार, अदिक दुसरा जाती नोर लॉकुर से येनु ताकोमालुर.

⁸ इदुरसाटी नाव मसीह लॉकुरी हिंग लॉकुर्द स्वागत माळ पायजे, यदुर देल नाव भी सच्चाई अन्द पक्ष दा आंदुर सहकर्मी आदेव.

⁹ ना मंडली इक येनारा लिखसीदिन, लेकीन दियुत्रिफेस जो आंदुर दा धोड्डेव आगोद चाहासतान, नामी ग्रहण माळालुन.

¹⁰ इदुरसाटी याग ना बराईन रा आऊन क्याल्सागोळ्द जो आव माळेत्यान, सुधी तोरसाईन, कि आव नाम बारा दा बेकार-बेकार मातगोळ माताळतान; अदिक इदुर मा भी संतोष ईला आगकु खुद अच वार्टुर इक ग्रहण माळालुन, अदिक आंदरी जो ग्रहण माळोद चाहासतार मना माळतान अदिक मंडली दा टु तेग्द बुळतान.

¹¹ हे प्रिय, बुराई इन ईला लेकीन भलाई इन अनुयायी आगी. जो भलाई माळतान, आव परमेश्वर उन दी टु हुन; लेकीन जो बुराई माळतान, आव परमेश्वर उक नोळीदील.

¹² देमेत्रियुस उन बारा दा सप्पा मुंदुर, उलटा सच्चाई भी खुद अच गवाही कोळ्त; अदिक नाव भी गवाही कोळतेव, अदिक नी जान्सत्या कि नाम गवाही सही आद.

¹³ नानी नीनी हापाळ येनारा लिखसोद रा ईरोद, लेकीन स्याही अदिक कलम देल लिखसोद चाहासालीन.

¹⁴ लेकीन नानी आशा आद कि नीन से राटनेरी मुलाकात माळाईन, आग नाव आमने-सामने मातकात हेळाता.

¹⁵ नीनी शांती सिक्त ईरूल. ईलेर संगी नीनी नमस्कार माळतार. अलेर संगीगोळ हेसुर ताकोम ताकोमकु नमस्कार माळ कोमेत.