दानिय्येल 5

¹ ऊंद दिशी राजा बेलशस्सर तान ऊंद हजार प्रधानगोळ इक धोळ भोज कोट्टुन. आव आंदुर सांगुळ दाखमधु कुळदुन.

² दाखमधु कुळदुर बाद्दा बेलशस्सर तान क्याल्सा माळावाळेर इक आदेश कोट्टुन कि आऊन आप्प नबूकदनेस्सर द्वारा यरूशलेम इन मंदिर टु तनकु आत व्हान्ना-बेळ्ली इन बर्तन आऊन मुंद तंदकु आगुल, ताकी आ बरतनगोळ दा आव, आऊन प्रधान, आऊन रानीगोळ अदिक रखेल दाखमधु कुडुल.

³ आग जो व्हान्ना-बेळ्ली इन बर्तन यरूशलेम दा परमेश्‍वर उन मंदिर टु तनकु आगीदव, अवरी क्याल्सा माळावाळेर राजा बेलशस्सर उन मुंद पेश माळदुर. आग राजा अदिक आऊन प्रधानगोळ, रानीगोळ अदिक रखेलगोळ आ बर्तनगोळ दा दाखमधु हाक्कु कुळदुर.

⁴ आंदुर दाखमधु कुडुकु व्हान्ना, बेळ्ली, पीतल, लोहा हुळ्ली अदिक कल्ल इन द्यावगोळ्द मूर्तिगोळ्द स्‍तुति माळली कुरतुर.

⁵ अदा समय दा बेळ्ल कांळ्सली कुरतव. ईव मंळसा अन्द कय इन बेळ्लगोळ घाई ईरव. आंदुर दीवट इन मुंद राजमन्‍दिर इन दीवार मा, जो चुना देल पोचकु ईरोद, येनारा लिख्सदुर. याग कय दीवार मा लिखसोद आग राजा हथेली इक नोळदुन.

⁶ राजा अन्द मार्र इन रंग बदलुसेत. आऊन मन दा हापाळ विचार बंदव, जो आऊक व्याकुल माळ बुट्टव. आऊन कय-काल नळ्गली कुरतव, अदिक टाँगरागोळ आपस दा टकरूसली कुरतव.

⁷ आव ऊंचा दण्ण दा आदेश कोट्टुन कि तांत्रिक, कसदी पंडित अदिक जादू-टोना माळावाळेर आऊन मुंद प्रस्‍तुत माळकु आगुल. तांत्रिक, कसदी पंडित अदिक जादू-टोना माळावाळेर बरूल. राजा बेबीलोन इन ई ग्यानीगोळ से अंदुन, “जो मंळसा दीवार इन ई लेख इक वाचुस कोंडान, अदिक अदुर्द मतलब नान इक हेळ्यान, ना आऊक राजसी कपळागोळ देल विभूषित माळाईन. आऊन कुतक्या दा व्हान्ना अन्द माला हाकाईन, अदिक आव नान राज्‍य इन तीसरा प्रमुख शासक आदान.”

⁸ राजा अन्द ग्यानी बुळ्क बंदुर, पर आंदुर दीवार मा लिखस्द लेख इक वाचुस सकिदील अदिक राजा अक अदुर्द मतलब हेळ सकिदील.

⁹ इदुर मा राजा बेलशस्सर हापाळ घबरूसेदुन अदिक आऊन मार्र इन रंग बदलुसेत. आऊन प्रधानगोळ भी हापाळ व्याकुल आगेदुर अदिक समझुस सकिदील कि येन माळेव अदिक येन ईला.

¹⁰ राजा अदिक सामंतगोळ्द आवाज केळकु राजमाता भोज-भवन दा बंदुर. आव अदिक अनली कुरतुर, “महाराज, लाखों वर्ष ताका जित्ता ईरूल! नी तान दिल इन विचारगोळ्द कारण व्याकुल आगबाळ अदिक नीन मार्र इन रंग बदलुसबाळ.

¹¹ नीन राज्‍य दा ऊंद हिंग मंळसा आन आऊन दा पवित्र परमेश्‍वर उन आत्मा निवास माळतद. नीन आप्प उन राज्‍यकाल दा ऊंद हिंग घटना घटुसीत इदुर देल ईद पता नळुत कि आ मंळसा दा ज्योति अदिक समझ आद, द्यावगोळ्द बुद्धि इन घाई आऊन दा भी बुद्धि आद. अत: नीन आप्प राजा नबूकदनेस्सर आऊक ज्‍योतिषिगोळ, तांत्रिकगोळ, कसदी पंडितगोळ अदिक जादू-टोना माळावार्ळेद मुखिया माळ बुट्टीदुन;

¹² यतिकी आऊन दा वळ्लीद आत्‍म ग्यान अदिक समझ ईरोद, अदिक आव कांसा अन्द मतलब हेळ सकोन, पहेलिगोळ इक समझुसोन अदिक समस्‍यागोळ इक सुलझुसोन. ईद सप्पा गुण दानिएल दा ईरव, आऊन हेसुर नीन आप्प बेलतशस्‍सर ईटदुन. अत: ईग नी दानिएल उक कारू. आव नीन इक दीवार पर लिखस्द लेख इन मतलब हेळ्यान.”

¹³ क्याल्सा माळावाळेर दानिएल उक राजा बेलशस्सर उन मुंद प्रस्‍तुत माळदुर. राजा दानिएल से अंदुन, “येन नी आवा दानिएल हुय जो यहूदा प्रदेश टु बंदी बन्सकु बंदीद, अदिक यारी नान आप्प यहूदा प्रदेश टु तंदीदुन?

¹⁴ ना केळदीन कि पवित्र परमेश्‍वर उन आत्मा नीन दा निवास माळतद अदिक नीन दा ग्यान, समझ अदिक वळ्लीद बुद्धि भी आद.

¹⁵ नान द्याश इन ग्यानी लॉकुर, ज्‍योतिषी नान मुंद राजमन्‍दिर दा तंदकु आंदुर कि आंदुर ई लेख इक वाचुसुल अदिक नान इक इदुर्द मतलब हेळुल. लेकीन आंदुर हेळ सकीदील.

¹⁶ ना केळदीन कि नी न केवल कांसा अन्द मतलब हेळ सकत्या बल्‍कि समस्‍यागोळ इक सुलझुस भी सकत्या. अगर नी दीवार इन ई लेख इक वाचुस कोंड्या अदिक इदुर्द मतलब नान इक हेळ्या रा ना नीन इक राजसी कपळा देल विभूषित माळाईन, नीन कुतक्या दा व्हान्ना हाकाईन अदिक नीन इक तान राज्य इन तीसरा प्रमुख शासक माळ बुळाईन.”

¹⁷ आग दानिएल राजा अन्द मुंद बंदकु ईद उत्तर कोट्टुन, “महाराज, नी तान ईद पुरस्‍कार तान हात्ती इच ईट अदिक यावारा दुसरा मंळसा अक कोट बुळ. फिर भी ना नीन साटी ई लेख इक वाचुसाईन अदिक इदुर्द मतलब हेळाईन.”

¹⁸ “महाराज, सर्वोच्‍च परमेश्‍वर नीन आप्प नबूकदनेस्सर उक राज्‍य, महानता, कीर्ति अदिक वैभव प्रदान माळीत.

¹⁹ यतिकी परमेश्‍वर नीन आप्प उक महान माळीदुन इदुरसाटी विश्‍व इन सप्पा कौमगोळ, राष्ट्र अदिक अलग-अलग भाषागोळ मात माताळावाळेर आऊन मुंद नळगोर अदिक अंजतोगोर. नीन आप्प यारी चाहासोन आऊक कोनसुस बुळोन अदिक यारी चाहासोन, आऊक जीत्ता बिट्ट बिळोन. आव तान इच्छा अन्द या मंळसा अक चाहासोन आऊन पदोन्नति माळ बुळोन, अदिक यारी चाहासोन आऊक पद टु ल्‍यालमा ईळ्स बुळोन.

²⁰ याग नीन आप्प उन दिल अहंकार देल तुम्मेत, याग नीन आप्प उन आत्मा कठोर बनसेत अदिक आव घमण्‍ड दा बंदकु अनुचित क्याल्सा माळली कुरतुन, आग परमेश्‍वर आऊक आऊन राजसिंहासन टु ईळ्स बुट्टुन अदिक आऊन से आऊन ऐश्‍वर्य कसु बुट्टुन.

²¹ आ मंळसा-समाज टु व्हार्या माळकु आदुर अदिक आंदुर्द दी पशु उन दिल इन घाई बनसेत. आंदुर जंगली गधागोळ सांगुळ आळी दा ईरतोगोर. आंदुर वस्तागोळ घाई काड्डा तिनतोगोर. आंदुर मय आकाश इन ओद देल हसीद आगतोगोद. आग आंदरी अनुभव आत कि केवल सर्वोच्‍च परमेश्‍वर अच मंळसागोळ राज्‍य मा शासन माळतान अदिक आव यारी चाहासतान, आऊक राजा अन्द रूप दा प्रतिष्‍ठित माळतान.”

²² “हे बेलशस्सर, नी आऊन पार हुय, अदिक सप्पा येनारा जानस्कु भी तान दिल इक नम्र माळीदिल.

²³ नी स्‍वर्ग दा विराजमान अधिपति इन प्रति अहंकार दा ताल्ला नेग्द अदिक आऊन मंदिर इन पवित्र बरतन नीम्द मुंद प्रस्‍तुत माळकु आदव, अदिक नी, नीम्द सामंतगोळ, नीम्द रानीगोळ अदिक रखेलगोळ आ बरतनगोळ दा सार्रा हाक्कु कुळदुर. नीव सार्रा कुडुकु बेळ्ली-व्हान्ना, पीतल, लोहा, हुळ्ली अदिक पाषाण इन द्यावगोळ्द मूर्तिगोळ्द स्‍तुति माळदीर, जो नोळालव, अदिक केळालव, अदिक येनु समसालव. हे बेलशस्सर! या परमेश्‍वर उन कय दा नीम्द जीव आद, जो नीम्द जीवन इक तान नियंत्रण दा ईटतान, आऊन सम्‍मान नीव माळीदिल.”

²⁴ “अत: सर्वोच्‍च परमेश्‍वर तान दरबार टु ऊंद कय प्रेषित माळदुन अदिक ईद लेख लिखसुसदुन.”

²⁵ जो लेख लिख्‍सकु आग्याद अदुर्द विवरण ईद आद: “मने, मने, तकेल” अदिक “पर्सीन”.

²⁶ ईद वाक्य इन ईद मतलब आद : “मने” मतलब आळुकु; परमेश्‍वर नीम्द राज्‍य-काल इन दिनगोळ्द गिनती माळकु अदुर्द अंत माळ बुट्टुन.

²⁷ “तकेल” मतलब तौलुस्कु; नीव कसौटी रूपी तराजू मा तौलुस्कु आगीर, अदिक हल्‍का सिद्ध आदीर.

²⁸ “परेस” “मतलब वाट्सकु; नीम्द राज्‍य मादीगोळ अदिक फारसीगोळ कौमगोळ्द न्याड्या वाट्सकु आंदरी कोटकु आत.”

²⁹ ईद केळतेला अच बेलशस्सर आदेश कोट्टुन कि दानिएल उक राजसी कपळा हाकसुसकु आगुल, आऊन उन कुतक्या दा व्हान्ना अन्द माला हाक्कु आगुल. राजा अन्द आदेश इन पालन माळकु आत. बेबीलोन दा घोषणा माळकु आत कि दानिएल राज्‍य इन तीसरा प्रमुख शासक हुन.

³⁰ यावारा अदा ईळ्लक इक कसदीगोळ राजा बेलशस्सर उक कोंद बुट्टुन,

³¹ अदिक आऊन राज्‍य मादीगोळ्द दारा अक प्राप्‍त आगेत. आ समय दारा अन्द उमर लगभग बासठ वर्ष इन ईरोद.