सभोपदेशक 3

¹ हर ऊंद मात इन उपयुक्त मौका, अदिक धरती मा माळोद क्याल्सा अन्द निर्धारित समय ईरतद:

² जन्म इन समय; अदिक सायोद भी समय, बोऊसोद समय; अदिक बोऊसकु आग्याद अदरी कित्तोद भी समय आद.

³ कोन्नोद समय, अदिक चंगा माळोद समय, ढाऊसोद समय अदिक माळोद भी समय निर्धारित आद.

⁴ वर्लोद समय, अदिक नेग्गोद समय, शोक मानसोद समय, अदिक कुण्णोद भी समय आद.

⁵ कल्लगोळ इक बगरूसोद समय, अदिक कल्लगोळ इक जमा माळोद समय, कुतक्या अक हचोद समय अदिक कुतक्या टु दुर ईरोद भी समय ईरतद.

⁶ ढुंढसोद समय, अदिक काळोद भी समय, ईटोद समय, अदिक भीळोद भी समय निर्धारित आद.

⁷ हरोद समय, अदिक अइक होलोद भी समय, सुंगा ईरोद समय, अदिक माताळोद भी समय निश्चित आद.

⁸ प्यार माळोद समय, अदिक घृणा माळोद भी समय, युद्ध माळोद समय, अदिक शांती माळकु ईटोद भी समय आद.

⁹ क्याल्सा माळावाळा अक ताक मेहनत देल येन लाभ आगतद?

¹⁰ ना नोळदीन कि परमेश्वर मंळसा जाती मा याट भारी बोझ हाक्यान.

¹¹ आव हर ऊंद वस्तु अक आऊन साटी सही समय मा अच माळदुन, आव मंळसा अन मन दा अनन्तकाल इन एहसास इक जाग्सदुन, तरी भी मंळसा सम्स सकालुन कि परमेश्वर सुरूवात टु आखरी ताका येन माळदुन.

¹² अत: नान इक ईद अनुभव आत कि मंळसा अन्द साटी इदुर से वळ्लीद अदिक यातु मात हैलेच कि आव जीवन-तीम सुख देल अदिक खुशी मान्सतेला ईरूल.

¹³ ईद परमेश्वर उन वरदान आद कि हर ऊंद मंळसा व्‍हाट्टतीम तिनुल-कुडुल अदिक खुशी देल मेहनत माळुल.

¹⁴ ना ईद जान्सतीन कि जो येनारा परमेश्वर माळतान, अद हमेशा बन्सकु ईत्तीत; अदुर्दा येनु जोळ्सकु आग सकाल्द अदिक येनु गोर्त माळकु आग सकाल्द. परमेश्वर ईद इदुरसाटी माळदुन ताकी मंळसा आऊन से अंजुल.

¹⁵ जो आद, अद आगेग्याद, अदिक जो आगावाळा आद, अद भी आगेग्याद. परमेश्वर आऊक ढुंढ्सतान, जो खेदाळ्सकु आग्यान.

¹⁶ ना सूर्य अन ल्यालमा धरती मा ईद भी नोळदीन: न्याय इन जागा मा अन्याय आगेत्याद, धार्मिकता अन जागा मा अधर्म आगेत्याद.

¹⁷ ना तान दिल दा अंदीन, “परमेश्वर हर ऊंद मात अदिक हर ऊंद क्याल्सा अन्द समय निश्चित माळकु ईट्यान; अत: आव धार्मिक मंळसा अदिक दुष्ट येढ्ढु मुंदुर्द न्याय माळ्यान.”

¹⁸ ना मंळसा अन्द औलाद इन बारा दा ईद सोचदीन : परमेश्वर आंदरी ईद सच्चाई कलसोर साटी परखुसेत्यान कि आंदुर जनावर उन अलावा येनु हैलेच.

¹⁹ मंळसा अदिक पशु ऊंद अच दशा अक प्राप्त आगतार. ह्यांग पशु सायतद हांग अच मंळसा भी. अऊर सप्पा मुंदुर दा ऊंद अच घाई जीव आद. मंळसा पशु से श्रेष्ट हैलेच. अत: सप्पा व्यर्थ आद.

²⁰ सप्पा आखरी दा ऊंद अच जागा दा होगतार. सप्पा मुण्ण देल बनस्कु आर, अदिक मुण्ण दा अच मिलुसेदार.

²¹ याव अन सकतान कि मंळसा अन्द जीव म्याकुच होगतद अदिक जनावर इन जीव ल्यालमा दी होगकु मुण्ण दा मिलुसेगतद?

²² अत: नानी मालुम आत कि मंळसा अन्द साटी इदुर से येक्‍कुल वळ्लीद मात अदिक यातोदु हैलेच कि आव खुशी देल तान क्याल्सा माळुल, यतिकी क्याल्सा माळोद अच आऊन नियति आद. याव मंळसा यातोवारा मंळसा अन्द सायोद बाद्दा आऊक वापस तंदकु भविष्य अन्द मातगोळ तोर्स सकतान?