सभोपदेशक 9

¹ ना ई सप्पा मातगोळ इक जाचदीन-परखुसदीन अदिक मन देल गम्भीरतापूर्वक विचार माळदीन. आग नान इक ग्यात आत कि न्यायी अदिक बुद्धिमान मंळसा अदिक आंदुर्द सत्कर्मगोळ्द फल परमेश्वर उन कयगोळ दा आद. मंळसा ईद जानसालुन कि परमेश्वर आऊन क्याल्सा देल प्रसन्न आन अथवा आऊक आऊन क्याल्सागोळ से घृणा आद. अत: आऊन मुंद सप्पा व्यर्थ आद.

² सप्पा अन्द नियति ऊंद अच आद: न्यायी अदिक अन्यायी, भला अदिक बुरा, शुद्ध अदिक अशुद्ध, बलि येरसावाळा-बलि ईला येरसावाळा. जो नियति वळ्लेव मंळसा अन्द आद अदा पापी मंळसा अन्द आद. जो तान किर्‍या अक पुरा माळतान, आऊन नियति अदा आद, जो तान किर्‍या अन्द उल्लंघन माळतान.

³ जो बुराईगोळ ई धरती मा विराजमान आद अऊर दा ऊंद ईद गलत आद: सप्पा मंळसा ऊंद अच गति अक प्राप्त आगतार. मंळसागोळ्द दिल बुराई देल तुमकु आद. यागासताका आंदुर जीत्ता ईरतार, आंदुर दा पागलपन समुस्कु ईरतद. अदुर बाद्दा आंदुर सोतकु मंळसागोळ दा मिलुस्तार.

⁴ यागासताका मंळसा जीत्ता ईरतान, आऊन दिल दा आशा अन्द दिंग्या टिमटिमुस्कु ईरतद, यतिकी जीत्ता नाय सोतकु हुल्ल इन से वळ्लीद आद.

⁵ जो जीत्ता आन, आंदुर जान्सतार कि आंदरी ऊंद दिन सायोदा बिदीत, लेकीन जो सोतोग्यार, आंदुर येन जानस्तार? आंदरी प्रतिफल सिकेग्याद. आंदुर्द स्मृति मिटुसेग्याद.

⁶ आंदुर्द प्यार, आंदुर्द घृणा, आंदुर्द दुश्मनी सप्पा नष्ट आगेत. ई धरती इन क्याल्सा-व्यापार दा ईद आंदुर्द यातोदु भाग हैलेच.

⁷ तान मान्नी होगी, खुशी देल रोट्टी तीनी, अदिक दिल इन उमंग देल अंगुर इन रास्सा कुढी, यतिकी जो नीव माळतीर, अदरी परमेश्वर पयला टु तान स्वीकृति कोट्ट बुट्टुन.

⁸ नीम्द कपळा हमेशा‍ स्वच्‍छ ईरूल, नीम्द ताल्ला मा हमेशा याण्णा हतकु ईरूल.

⁹ परमेश्वर धरती मा बेकार जीवन इन यास भी दिन कोट्टुन, अऊर दा तान प्रिय हिंग्स उन सांगुळ जीवन इन आनन्द भोगसी, यतिकी जीवन दा ईदा नीम्द भाग आद. जो मेहनत नीव धरती मा माळतीर अदुर्दा नीम्द हिस्सा आद.

¹⁰ नीम्द कय दा जो भी क्याल्सा बरूल, अदरी पुरा ताकत देल माळी, यतिकी अधोलोक दा, यल तान सोत्तुर बाद्दा नीव होदीर, न क्याल्सा आद, न विचार. अल न ग्यान आद, न बुद्धि.

¹¹ ना मात: अनुभव माळदीन कि ई धरती मा तेज ओळावाळा धावक जिक्सालुन, अदिक न बलवान योद्धा लळाई जिक्सतान. बुद्धिमान मंळसा अक भोजन सिकाल्द, अदिक न समझदारगोळ इक धन-सम्पत्ति. विद्वानगोळ मा याऊ कृपा माळालुर. ईव सप्पा समय अदिक संयोग इन वश दा आद.

¹² मंळसा तान समय जानसालुन. जसा मेनगोळ कुटिल जाल दा फसुसतद, जसा पक्षीगोळ फंदा दा फसुसतद, हांग अच मंळसा समय इन जाल दा फसुसतान. ईद जाल अचानक आंदुर मा बिळतद.

¹³ ना धरती मा बुद्धि इन ऊंद उदाहरण नोळदीन. ईद नान इक बड़ा महत्वपूर्ण हत.

¹⁴ ऊंद स्यांळतुसा नगर ईरोद. अदुर दा गिना-चुना लॉकुर ईरतोगोर. ऊंद दिशी अदुर मा यावारा धोळ राजा आक्रमण माळ बुट्टुन, अदिक अदरी घेर्स कोंडुन. अदुर नाकु दी धोळ घेराबन्दी माळ बुट्टुन.

¹⁵ आ स्यांळतुसा नगर दा ऊंद गरीब, लेकीन बुद्धिमान मंळसा ईरोन. आव तान बुद्धि देल आ नगर इक ऊळ्सदुन. फिर भी आ गरीब उक सप्पा लॉकुर मार्तोदुर.

¹⁶ लेकीन गरीब मंळसा अन्द बुद्धी इन याऊ सम्मान माळीदिल, आऊन मातगोळ मा ध्यान कोटीदील तौभी ना अनतीन: बल देल बुद्धि वळ्लीद आद.

¹⁷ मूर्खगोळ बीच राजा अन चिळ्लासोद से आबना दा बुध्दीमान उन मातगोळ केळ कोमोद ज्यादा वळ्लीद आद.

¹⁸ युद्ध इन शस्त्रगोळ से बुद्धि उत्तम आद, लेकीन ऊंद पापी हापाळ भला क्याल्सागोळ इक नष्ट माळ बुळतान.