इफिसिगोळ 1

¹ नान पौलुस उन दी टु जो परमेश्वर उन इच्छा देल यीशु मसीह अन प्रेरित आन, आ पवित्र अदिक मसीह यीशु दा विश्वासी लॉकुर्द हेसुर जो इफिसुस दा आद:

² नाम्द आप्प परमेश्वर अदिक प्रभु यीशु मसीह अन्द दी टु नीमी अनुग्रह अदिक शांती सिकतेला ईरूल.

³ नाम्द प्रभु यीशु मसीह अन्द परमेश्वर अदिक आप्प उन धन्यवाद आगुल कि आव नामी मसीह दा स्वर्गीय जागागोळ दा सब प्रकार इन आत्मिक आशीष कोट्टुन.

⁴ ह्यांग आव नामी दुनिया अन उत्पत्ति टु पयला अदुर्दा नीवळुस कोंडान कि नाव आऊन हात्‍ती प्यार दा पवित्र अदिक निर्दोष आगुल.

⁵ अदिक तान इच्छा अन्द भला अभिप्राय इन अनुसार नामी तान साटी पयला टु ठहरूसदुन कि यीशु मसीह अन्द द्वारा नाव आऊन गोद पार आगुल,

⁶ कि आऊन आ अनुग्रह अन्द महिमा अन्द स्तुति आगुल, यारी आव नामी आ प्रिय दा सेंत-मेंत कोट्टुन.

⁷ नामी अदुर्दा आऊन रक्ता अन द्वारा छुटकारा, मतलब अपराधगोळ्द माफी, आऊन आ अनुग्रह अन्द धन इन अनुसार सिक्याद,

⁸ यारी आव पुरा ग्यान अदिक समझ सहित नाम मा बहुतायत देल माळदुन.

⁹ यतिकी आव तान इच्छा अन्द भेद आ भला अभिप्राय इन अनुसार नामी हेळदुन, यारी आव खुद तान दा ठान्स कोंडीदुन

¹⁰ कि समयगोळ्द पुरा आगोद हिंग प्रबन्ध आगुल कि जो येनारा स्वर्ग दा आद अदिक जो येनारा पृथ्वी मा आद, सप्पा येनारा अद मसीह दा जमा माळुल.

¹¹ अदुर्दा यदुर्दा नाव भी आऊन मनसा देल जो तान इच्छा अन्द मत इन अनुसार सप्पा येनारा माळतान, पयला टु ठहरूसकु आगकु मीरास बनसुल

¹² कि नाव, यार पयला टु मसीह मा आशा ईटीदेव, आऊन महिमा अन्द स्तुति इन कारण आगुल.

¹³ अदिक अदुर्दा नीम मा भी, याग नीव सच्चाई इन वचन केळदीर जो नीम्द उद्धार इन खुशखबरी आद अदिक यदुर मा नीव विश्वास माळदीर, वादा माळकु आत पवित्र आत्मा अन्द छाप हत्‍त.

¹⁴ परमेश्वर उन साटी पैस्या देल कोंडकु आग्यार आंदुर्द छुटकारा अन्द साटी नाम्द मीरास इन बयाना हुन, कि आऊन महिमा अन्द स्तुति आगुल.

¹⁵ ई कारण, ना भी आ विश्वास इन बातणी केळकु जो नीम लॉकुर दा प्रभु यीशु मा आन अदिक सप्पा पवित्र लॉकुर मा प्यार प्रगट आद,

¹⁶ नीम साटी धन्यवाद माळोद बिळालीन, अदिक तान प्रार्थनागोळ दा नीमी याद माळतेला ईरतीन

¹⁷ कि नाम्द प्रभु यीशु मसीह अन्द परमेश्वर जो महिमा अन्द आप्प हुन, नीमी तान पहचान दा ग्यान अदिक प्रकाश इन आत्मा कोळुल,

¹⁸ अदिक नीम्द मन इन कण्णगोळ ज्योतिर्मय आगुल कि नीव जान्स कोमी कि आऊन बुलाहट इन आशा येन आद, अदिक पवित्र लॉकुर दा आऊन मीरास इन महिमा अन्द धन ह्यांग आद,

¹⁹ अदिक आऊन सामर्थ्य नाम दा जो विश्वास माळतार, याट महान आद, आऊन शक्ति इन प्रभाव इन आ कार्य अन्द अनुसार

²⁰ जो आव मसीह दा माळदुन कि आऊक सोत्‍तुर दा टु जित्‍ता माळकु स्वर्गीय जागागोळ दा तान ऊम्मा कय दी कुर्सदुन

²¹ ताकी सब प्रकार इन प्रधानता, अदिक अधिकार, अदिक सामर्थ्य, अदिक प्रभुता अन्द, अदिक हर ऊंद हेसुर इन म्याकुच, जो ना सिर्फ ई दुनिया दा पर बरावाळा दुनिया दा भी ताकोमकु आदीन, कुर्सदुन;

²² अदिक सप्पा येनारा आऊन कालगोळ ल्यालमा माळ बुट्टुन; अदिक आऊक सब वस्तुगोळ मा श्रेष्ट ठहरूसकु मंडली इक कोट बुट्टुन,

²³ ईद आऊन मय हुन, अदिक आऊन परिपुर्णता आद जो सब दा सब येनारा पुरा माळतान.