इफिसिगोळ 4

¹ इदुरसाटी ना जो प्रभु दा बंदीन नीम से विनती माळतीन कि या बुलाहट देल नीव कारूकु आगीदीर, अदुर लायक व्यवहार माळी,

² मतलब पुरा दीनता अदिक नम्रता सहित, अदिक धीरज हुळकु प्यार देल आबुर दाबुर्द सहन माळी;

³ अदिक मेल इन बंधन दा आत्मा अन्द एकता ईटोद यत्न माळी.

⁴ ऊंद अच मय आद अदिक ऊंद अच आत्मा; ह्यांग नीमी जो कारूकु आगीदीर तान कारूकु आगोर देल ऊंद अच आशा आद.

⁵ ऊंद अच प्रभु आन, ऊंद अच विश्वास ऊंद अच बपतिस्मा,

⁶ अदिक सब मुंदुरव ऊंद अच परमेश्वर अदिक आप्प आन, जो सप्पा मुंदुर म्याकुच अदिक सप्पा मुंदुर बीच दा अदिक सब मुंदुर दा आन.

⁷ लेकीन नाम दा टु हर ऊंद मंळसा अक मसीह अन्द दान इन परिमाण इन अनुसार अनुग्रह सिक्याद.

⁸ इदुरसाटी आव अनतान: “आव ऊँचाई मा येरदुन अदिक बंदीगोळ इक कटकु ओतुन, अदिक मंळसागोळ इक दान कोट्टुन.”

⁹ आऊन येरदुर देल, अदिक येन सिकतद सिर्फ ईद कि अद पृथ्वी इन ल्यालमा जागागोळ्द दा ईळसी भी दुन.

¹⁰ अदिक जो ईळदुन ईव आवा हुन जो पुरा आकाश टु म्याकुच येरे भी दुन कि सब येनारा परिपुर्ण माळुल.

¹¹ आव थ्वाळासा लॉकुरी प्रेरित नियुक्त माळकु, अदिक थ्वाळासा लॉकुरी भविष्यवक्ता नियुक्त माळकु, अदिक थ्वाळासा लॉकुरी खुशखबरी केळावाळेर नियुक्त माळकु, अदिक थ्वाळासा लॉकुरी रखवाला अदिक उपदेशक नियुक्त माळकु कोट बुट्टुन,

¹² यदुर देल पवित्र लॉकुर सिद्ध आगेगुल अदिक स्यावा अन्द क्याल्सा माळकु आगुल अदिक मसीह अन्द मय इक उन्नती सिक्‍कुल,

¹³ यागासताका कि नाव सब इन सब विश्वास अदिक परमेश्वर उन पार उन पहचान दा ऊंद आगबाळुल, अदिक ऊंद सिद्ध मंळसा आगबाळुल अदिक मसीह अन्द पुरा डील-डौल ताका ना वाळुसुल.

¹⁴ ताकी नाव मुंदु टु चिकोर ईरतीदील जो मंळसागोळ्द ठग-विद्या अदिक चतुराई देल, आंदुर भ्रम इन युक्तिगोळ्द अदिक उपदेश इन हर ऊंद ध्वाका देल उछलस्कु अदिक ईल अल तिर्गुसकु आगताव.

¹⁵ बल्‍की प्यार दा सच्चाई देल माताळतेला सब मातगोळ दा अदुर्दा जो ताल्ला आद, मतलब मसीह दा वाळुसतेला होगुल,

¹⁶ यदुर देल पुरा मय, हर ऊंद जोळ इन सहायता देल ऊंद सांगुळ मिलुसकु अदिक ऊंद सामर्थ्य सांगुळ गठुस्कु, आ प्रभाव उन अनुसार जो हर ऊंद अंग इन ठीक-ठीक कार्य माळोर द्वारा आऊन दा आगतद, तान तान इक वाळुसतद कि आव प्यार दा उन्नती माळतेला होगुल.

¹⁷ इदुरसाटी ना ईद अनतीन अदिक प्रभु दा आग्रह माळतीन कि ह्यांग गैरयहूदी लॉकुर तान मन इन अनर्थ रीति मा नळुतार, नीव ईगी टु बाक हिंग व्यवहार माळबाळेतीर.

¹⁸ यतिकी आंदुर बुद्धी भ्रष्ट आगेग्याद, अदिक आ अग्यानता अन्द कारण जो आंदुर दा आद अदिक आंदुर मन इन कठोरता अन्द कारण आंदुर परमेश्वर उन जीवन टु अलग माळकु आदुर;

¹⁹ अदिक आंदुर सुन्न आगकु लुचपन दा हतेदुर कि सब प्रकार इन खराब क्याल्सा लालसा देल माळुल.

²⁰ पर नीव मसीह अन्द हिंग शिक्षा ताकोंडीदील.

²¹ बल्‍की नीव खराखुरा आऊंदा केळदीर अदिक, ह्यांग यीशु दा सच्चाई आद, अदुर दा कल्सकु भी आग्यार

²² कि नीव पिछला चाल चलन इक हाळोद मंळसातत्व अक जो भरमुसावळ्त अभिलाषागोळ्द अनुसार भ्रष्ट आगेगतद, ईळु बुळी

²³ अदिक तान मन इन आत्मिक स्वभाव दा व्हाशोद बन्सतेला होगी,

²⁴ अदिक व्हाशोद मंळसातत्व अक हाक्‍क कोमी जो परमेश्वर उन अनुरूप सच्चाई इन न्यायीपन अदिक पवित्रता दा सजुस्कु आग्याद.

²⁵ ई कारण ख्वाटा माताळोद बिटकु हर ऊंद मंळसा तान मान्ना हातळोर से सही माताळुल, यतिकी नाव आपस दा आबुर दाबुर अंग हुयेव.

²⁶ सिट्ट रा माळी, पर पाप माळबाळी; सुर्य मुळका ताका नीम्द गुस्सा ईरबाळुल,

²⁷ अदिक ना शैतान उक मवका कोळी.

²⁸ काळताना माळावाळा बाक काळताना माळबाळुल, बल्‍की वळ्लीद क्याल्सा माळोर साटी तान कयगोळ देल मेहनत माळुल, इदुरसाटी कि यारी प्रयोजन आद आऊक कोळली आऊन हात्‍ती येनारा ईरूल.

²⁹ यातोदु सही मात नीम्द बाय देल होळबाळुल, पर जरवत इन अनुसार अदा होळुल जो उन्नती इन साटी वळ्लीद ईरूल, ताकी आऊन से केळावाळेर मा अनुग्रह ईरूल.

³⁰ परमेश्वर उन पवित्र आत्मा अक दुख माळबाळी, यदुर देल नीम मा छुटकारा अन्द दिन इन साटी छाप कोटकु आग्याद.

³¹ सब प्रकार इन कळवाहट, अदिक प्रकोप अदिक सिट्ट, अदिक कलह, अदिक अपमान, सप्पा बैरभाव समेत नीम से दुर माळकु आगुल.

³² आबुर दाबुर मा कृपा माळी अदिक मेहरबान आगी, अदिक ह्यांग परमेश्वर मसीह दा नीम्द अपराध माफ माळदुन, हांग अच नीव भी आबुर दाबुर्द अपराध माफ माळी.