एस्तेर 1

¹ क्षयर्ष हेसुर इन राजा अन दिनगोळ दा ई मातगोळ आदव: ईव आवा क्षयर्ष हुन, जो ऊंद सौ सत्ताईस राज्यगोळ मा, मतलब भारत टु हुळकु कूश द्याश ताका राज माळोन.

² अवा दिनगोळ दा याग क्षयर्ष राजा तान आ राजगद्दी मा विराजमान ईरोन जो शूशन गढ़ हेसुर इन राजधानी दा ईरोद.

³ अल आव तांद शासन काल इन तिसरा वर्ष दा तान सप्पा हाकिमगोळ अदिक कर्मचारीगोळी कळु बुटुन. फारस अदिक मादै द्याश इन सेनापति अदिक राज्य-राज्य अन प्रधान अदिक हाकिम आऊन मुंद आगेदुर.

⁴ आव आंदरी हापाळ दिन मतलब ऊंद सौ अस्सी दिन ताका तान राजकीय वैभव इन धन अदिक तान महानता अन अनमोल चीजगोळी तोर्सतेला ईत्‍तुन.

⁵ ई दिनगोळ बित्सदुर मा राजा सप्पा स्याणेर धोड्डेर लॉकुरी जो शूशन गढ़ हेसुर इन राजधानी दा जमा आगीदुर, राजभवन इन बगीचा अन आंगुळ दा येळ दिन ताका ऊमली कोट्टुन.

⁶ अलेव पळदागोळ बिळेव अदिक निळा रंग इन सूत इनव ईरव, अदिक सन अदिक जांभळा रंग इन जाळीगोळ देल बेळ्ली अन छल्लागोळ दा, संगमरमर इन खम्भागोळ देल हतकु ईरव; अदिक अलेव चौकीगोळ व्हान्ना बेळ्ली नव ईरव; क्याचांद अदिक बिळेव, पिवळा अदिक करेव संगमरमर इनव बन्सदव फर्श मा हतकु ईरव.

⁷ आ भोज दा राजा अन्द योग्य अंगुर इन रास्सा अलग अलग रूप इन व्हान्ना अन्द पात्रगोळ दा हाक्कु राजा अन्द उदारता देल हापाळ सा कुळ्सकु आगोद.

⁸ कुडोद रा नियम इन अनुसार आगतोगोद, यारीकारा मजबुर माळकु ईला कुळ्स तोगोर; यतिकी राजा तान भवन इन सप्पा भण्डारीगोळी आग्या कोटीदुन, कि जो पावना ह्यांग चाहास्यान आऊन सांगुळ हांगा बरताव माळेतीर.

⁹ रानी वशती भी राजा क्षयर्ष इन भवन दा आर्तेरी भोजन कोट्टुर.

¹⁰ सातवा दिशी, याग राजा अन मन अंगुर इन रास्सा दा मग्न ईरोद, आग आव महूमान, बिजता, हर्बोना, बिगता, अबगता, जेतेर अदिक कर्कस हेसुर इनोर येळ किन्नरगोळ जो क्षयर्ष राजा अन साटी स्यावा टहल माळतोगोर, आग्या कोट्टुन,

¹¹ कि रानी वशती अक राजमुकुट धारण माळ्द राजा अन मुंद तरी; यदुर देल कि द्याश द्याश इन लॉकुर मा अदिक हाकिमगोळ मा आकिन सुंदरता प्रगट आगेगुल; यतिकी आक नोळदुर दा सुंदर ईरोर.

¹² किन्नरगोळ द्वारा राजा अन ई आग्या ताकोमकु रानी वशती बरोर से इनकार माळदुर. इदुर मा राजा हापाळ सिट्टी बंदुन.

¹³ आग राजा समय समय इन भेद जानसावाळेर पंडितगोळ से केळदुन, राजा रा नीति अदिक न्याय इन सप्पा ग्यानिगोळ से हिंगा माळतोगोन.

¹⁴ आऊन हात्‍ती कर्शना, शेतार, अदमाता, तर्शीश, मेरेस, मर्सना अदिक ममूकान हेसुर इनोर फारस अदिक मादै द्याश इनोर येळ प्रधान ईरोर, जो राजा अन दर्शन माळतोगोर, अदिक राज्य दा मुख्य मुख्य पदगोळ मा नियुक्त माळकु आगीदुर.

¹⁵ राजा केळदुन, “रानी वशती राजा क्षयर्ष उन, किन्नरगोळ द्वारा कोळ्द आग्या अन्द उल्लंघन माळदुर, रा नीति अन अनुसार आकिन सांगुळ येन माळ पायजे.”

¹⁶ आग ममूकान राजा अदिक हाकिमगोळ उपस्थिती दा उत्तर कोट्टुन, “रानी वशती जो अनुचित क्याल्सा माळ्यार, अद सिर्फ राजा देल अच ईला लेकीन आक सप्पा हाकिमगोळ देल अदिक आ सप्पा द्याशगोळ लॉकुर से भी जो राजा क्षयर्ष उन सप्पा राज्यगोळ दा ईरतार.

¹⁷ यतिकी रानी इन ई क्याल्सा अन चर्चा सप्पा आर्तेर दा आदीत अदिक याग ईद अंदकु आदीत, ‘राजा क्षयर्ष रानी वशती अक तान मुंद तरोद आग्या कोटीदुन लेकीन आक बंदिदील,’ आग आंदुर भी तान तान गांडुरी तुच्छ समस्यार.

¹⁸ ईंद इन दिशी फारसी अदिक मादी हाकिमगोळ आर्तेर यार रानी अन ई मात केळ्यार, आंदुर भी राजा अन सप्पा हाकिमगोळ से हिंगा अनली कुरतार; ई प्रकार हापाळ अच घृणा अदिक सिट्ट पैदा आदीत.

¹⁹ अगर राजा मंजुर ईतीदाद, रा ईद आग्या तेगुल, अदिक फारसी अदिक मादीगोळ कानून दा भी लिख्सकु आगुल, यदुर देल यागलु बदलुस बाळुल, कि रानी वशती राजा क्षयर्ष उन मुंद बाक यागलु बरबाळुल, अदिक राजा पटरानी अन पद यातोदारा दुसरा अक कोट्ट बुळुल जो आकिन से वळ्लेर ईरूल.

²⁰ याग राजा अन ई आग्या आऊन सप्पा राज्यगोळ दा केळ्सकु आदीत, आग सप्पा हिंग्सुर तान तान गांड उन, चाहे आव धोड्डेव ईरूल या स्याणेव, आदर सम्मान माळतेला ईत्‍तार.”

²¹ ईद मात राजा अदिक हाकिमगोळी पसंद बत्‍त अदिक राजा ममूकान उन सलाह मान्स कोंडुन अदिक तान राज्य दा,

²² मतलब हापाळ सा राज्य अन अक्षरगोळ दा अदिक हापाळ सा जाती अन भाषा दा चिट्टीगोळी कळुदुन, कि सप्पा गंळ्सुर तान तान मान्या अधिकार नळसुल, अदिक तान जात इन भाषा माताळुल.