निर्गमन 23

¹ “ख्वाटा मातगोळ फैलुसबाळेतीर. अन्यायी गवाह ईतकु दुष्ट मंळसा अन साथ कोळ बाळेतीर.

² बुराई माळोर साटी ना रा हापाळ मुंदुर हींद आगेगीतीर; अदिक ना आंदुर हींद ओयाळतेला मुकदमा दा न्‍याय बिगळुसली गवाही कोळेतीर;

³ अदिक कंगाल उन मुकदमा दा आऊन भी पक्ष माळ बाळेत.

⁴ “अगर नीन दुश्मन उन वस्ता या गदा भटकुसतेला नीनी सिकुल, रा अदरी आऊन हात्ती जरूर वापस तनकोळेत.

⁵ बाक अगर नी तान दुश्मन उन गदा अक बोझ इन मारा देल वोतकु नोळ्या, रा चाहे अदरी अदुर्द स्वामी इन साटी बिळ्सली नीन मन आगतीदील, तरी भी जरूर स्वामी इन साथ कोटकु अदरी बिळ्स बुळेत.

⁶ “नीन लॉकुर दा टु जो गरीब ईरूल आऊन मुकदमा दा न्याय बिगळुस बाळेत.

⁷ ख्वाटा मुकदमा देल दुर ईरेत, अदिक निर्दोष अदिक न्यायी इक घात माळबाळेत, यतिकी ना दुष्ट मंळसा अक निर्दोष ठहरूसतीदील,

⁸ रिश्वत ताकोम बाळेत, यतिकी रिश्वत नोळावाळेर इक भी कुढ्ढ माळ बुळतद अदिक न्‍यायी मंळसागोळ्द मातगोळी ऊलटुस बुळतद.

⁹ “परदेशी मा अंधार माळ बाळेत; नीव रा परदेशी इन मन इन मातगोळी अरूतीर, यतिकी नीव भी मिस्त्र द्याश दा परदेशी ईरीर.

¹⁰ “आर साल रा तान जमीन दा बोऊसेतीर अदिक अदुर्द उपज जमा माळेतीर;

¹¹ लेकीन सातवा साल दा अदरी पळ्याव ईरगोळेतीर अदिक हांगा बिट्ट बुळेतीर, मतलब नीन वार्ट बन्धुगोळ दा टु जो कंगाल ईतीदार आंदुर अदुर दा ऊगुस्द तिंदार, अदिक आंदुर तिनकु आगदुर बाद्दा जो मिक्कीत अव जनावरगोळ तिंदाव. तान अंगुर अदिक जैतून इन बेली दा टु भी हिंगा माळेत.

¹² आर दिन ताका तान क्याल्सा कळी माळेतीर, अदिक सातवा दिशी आराम माळेतीर ताकी नान वस्ता अदिक गदागोळ भी विश्राम माळुल, अदिक नीन दासगीतेर्द पारगोळ अदिक परदेशी भी तान जीव ठंडा माळ सकुल.

¹³ जो येनारा ना नीम से अंदीन अदुर दा सावधान ईरेतीर; अदिक दुसरा देवतागोळ्द हेसुर इन चर्चा माळबाळेतीर, उलटा अव नीम बाय दा टु केळकु भी आगबाळुल.

¹⁴ “हर साल मुर घन नान साटी हाब्बा मनुसेतीर.

¹⁵ अखमीरी रोट्टी इन हाब्बा मनुसेतीर; अदुर दा नान आग्या अन अनुसार अबीब तिंगुळ इन नियत समय मा येळ दिन ताका अखमीरी रोट्टी तिनतोगेतीर, यतिकी अदा तिंगुळ दा नीव मिस्त्र दा टु होटकु बंदीदीर. याऊ निरा कय देल नान मुंद बरबाळुल.

¹⁶ याग नीन बोऊस्द केई इन पयला उपज तयार आगुल, आग कटाई इन हाब्बा मान्सेत. साल इन आखरी दा याग नी मयनत इन काय जमा माळकु ढेर हच्या, आग जमावळा अन हाब्बा मान्सेत.

¹⁷ हर साल मुरू घन नीन सप्पा मंळसागोळ प्रभु यहोवा अक तान मार्रा तोर्सुल.

¹⁸ “नान बलि इन जनावर इन रक्ता खमीरी रोट्टी इन सांगुळ येर्स बाळेतीर, अदिक ना नान हाब्बा अन वळ्लीद बलिदान दा टु येनारा व्हातुर ताका ईरगोळेतीर.

¹⁹ तान जमीन इन पयला उपज इन पयला हिस्सा तान परमेश्वर यहोवा अन भवन दा तरेतीर. मर्री इन पाड्डा अदुर्द मोय इन हाल दा बेईस बाळेतीर.

²⁰ “केळ, ना ऊंद दूत नीन मुंद मुंद कळुतीन जो हादी मा नीन रक्षा माळीत, अदिक याता जागा अक ना तयार माळीन अल नीनी पोहचुसीत.

²¹ अदुर मुंद सावधान ईरेत, अदिक अदुर्द मान्सेत, अदुर विरोध माळबाळेत, यतिकी अद नीम अपराध क्षमा माळतीदील; इदुरसाटी कि अदुर दा नान हेसुर ईरतद.

²² अगर नी खराखुरा अदुर्द केळ्या अदिक जो येनारा ना अनाईन अद माळ्या, रा ना नीन दुश्मन इन दुश्मन अदिक नीन द्रोहीगोळ्द द्रोही आगाईन.

²³ ईत्ता रिति देल नान दूत नींद मुंद मुंद नळुतेला नीनी एमोरी, हित्ती, परिज्जी, कनानी, हिब्बी, अदिक यबूसी लॉकुर अल पोहचुसीत, अदिक ना आंदुर्द सत्यानाश माळ बुळाईन.

²⁴ आंदुर देवतागोळी दण्डवत माळबाळेतीर, अदिक ना आंदुर उपासना माळेतीर, अदिक ना आंदुर घाई क्याल्सा माळेतीर, उलटा आ मुर्तिगोळ्द पुरा रिति देल सत्यानाश माळ बुळेतीर, अदिक आ लॉकुर्द स्तंभगोळ्द तुकळा तुकळा माळ बुळेतीर.

²⁵ नी तान परमेश्वर यहोवा अन उपासना माळेत, आग आव नीन अनाज नीर मा आशीष कोट्टान, अदिक नीन बीच दा टु रोग दुर माळ्यान.

²⁶ नीन द्याश दा ना रा यारदारा गर्भ बिद्दीत अदिक ना यारारा वांजला ईत्तार; अदिक नीन उमर ना पुरा माळाईन.

²⁷ यास लॉकुर बीच दा नी होद्या आ सप्पा लॉकुर मन दा ना तान अंज्क पयले टु हिंग समुस बुळाईन कि आंदरी व्याकुल माळ बुळाईन, अदिक ना नीनी सप्पा दुश्मनगोळ्द बेन तोर्साईन.

²⁸ अदिक ना नीन से पयले गंदवल कळाईन जो हिब्बी, कनानी, अदिक हित्ती लॉकुरी नीन मुंदु टु तुरकाळ्सकु दुर माळ बुट्टव.

²⁹ ना आंदरी नीन मुंदु टु ऊंदा साल दा तेग्द बुळालीन, हिंग आगबाळुल कि द्याश ऊजळुसेगुल, अदिक पालतु जनावर वाळुसकु नीनी दुख कोळली हतुल.

³⁰ यागासताका नीन संख्या वाळुसकु द्याश इक तान अधिकार दा माळ कोमाल आगासताका ना आंदरी नीन मुंदु टु थ्वाळा थ्वाळा माळकु तेगुतेला ईराईन.

³¹ ना क्याचाँद समुद्र टु हुडुकु पलिश्तीगोळ्द समुद्र ताका अदिक आळी टु हुडुकु फरात महानद ताका द्याश इक नीन वश दा माळ बुळाईन; ना आ द्याश इन ईरावाळेर इक भी नीन वश दा माळ बुळाईन, अदिक नी आंदरी तान मुंदु टु बरबस तेगद्या.

³² नी ना रा आंदुर से वाचा कटेत अदिक ना आंदुर देवतागोळ से.

³³ आंदुर नीन द्याश दा ईरली ईला पायजे, हिंग आगबाळुल कि आंदुर नीन से नान विरूद्‍ध पाप माळसुसुल; यतिकी अगर नी आंदुर देवतागोळ्द आराधना माळ्या, रा ईद नीन साटी फंदा बन्सीत.”