यहेजकेल 1

¹ तीसवा वर्ष इन चौथा तिंगुळ इन पाचवा दिशी, ना बन्दीगोळ बीच दा कबार गांगा अन किनारा मा ईरीन, आग स्वर्ग खुलसेत, अदिक ना परमेश्वर उन दर्शन नोळदीन.

² यहोयाकीन राजा अन गुलामी इन पाचवा वर्ष इन चौथा तिंगुळ इन पाचवा दिशी,

³ कसदी अन द्याश दा कबार गांगा अन किनारा मा, यहोवा अन वचन बूजी इन पार यहेजकेल याजक उन हाती पोहचुस्त; अदिक यहोवा अन सामर्थ आऊन मा प्रगट आत.

⁴ याग ना नोळली कुरतीन, रा येन नोळतीन कि उत्तर दिशा टु धोळ्द बादल, अदिक लहरूसतेला बेक्की सांगुळ धोळ्द आंधी बरेत्याद, अदिक बादल इन नाकु दी ऊजुळ अदिक बेक्की इन बीचो-बीच टु चमकुस्द पीतल घाई येनारा कांळ्सतद.

⁵ अदिक अदुर बीच दा टु नाक जीवधारीगोळ घाई येनारा होट्टव. आंदुर रूप मंळसागोळ घाई ईरोद,

⁶ लेकीन आंदुर दा टु हर ऊंद उन नाक नाक बाय अदिक नाक नाक पंख ईरव.

⁷ आंदुर काल सीधा ईरव, अदिक आंदुर काल इन तलवा पाड्डा अन खुरगोळ घाई ईरव, अदिक अव चमकुसदव पीतल इन घाई ईरव.

⁸ अऊर नाकु दी पंख इन ल्यालमा, मंळसागोळ घाई इच कय ईरव, नाकु प्राणी गोळोव चेहरा अदिक पंख ई प्रकार ईरव:

⁹ आंदुरव पंख आबुर दाबुर से परस्पर जुळ्सकु ईरव, आंदुर नळाहोती तान कण्णगोळ दा सीधा नळोर, अदिक तिर्गोव ईला.

¹⁰ नाकु उन चेहरा अन रूप ई प्रकार ईरोद: सप्पा प्राणी इन चेहरा मुंदु टु मंळसा अन घाई ईरोद, ऊजवा दी हुल्ल इन घाई ईरोद, अदिक डाक्या दि वस्ता अन अदिक हिंदळोद दी गिधाळ घाई ईरव.

¹¹ आंदुर चेहरा हींग अच ईरव. आंदुर बाय अदिक पंख म्याकुच इन दी अलग अलग ईरव, हर ऊंद जीवधारी इन येढ्ढ येढ्ढ पंख ईरव, जो आबुर दाबुर इन पंखगोळ से मीलुसकु ईरोर, अदिक येढ्ढ येढ्ढ पंखगोळ से आंदुर शरीर ढाप्सकु ईरोद.

¹² अव सीधा तान तान मुंद अच नळुतोगोर; येल आत्मा होगोद चाहसोद, अव आतल्या होगोव, अदिक नळुतेला तिर्गव ईला.

¹³ जीवधारीगोळ रूप अंगारगोळ अदिक होततेला मशालगोळ घाई कांळ्सव, अदिक अद बेक्की जीवधारीगोळ बीच ईत्त आत्त नळुत वयाळ्त हापाळ ऊजोळ कोळतेला ईत्त; अदिक आ बेक्की देल बिजली होळतोगोद.

¹⁴ जीवधारीगोळ्द नळोद-वयाळोद बिजली घाई ईरोद.

¹⁵ याग ना जीवधारीगोळ इक नोळीन, रा येन नोळदीन कि जागा मा आंदुर हाती नाकु बायगोळ गिनती इन अनुसार, ऊंद ऊंद चक्का ईरोद.

¹⁶ चक्कागोळ रूप अदिक बनावट स्वर्णमणी इन घाई ईरोद, अदिक नाकु उन ऊंदा रूप ईरोद; अऊर रूप अदिक बनावट हिंग ईरोद ह्यांग ऊंद चक्का अन बीच दुसरा चक्का आगुल.

¹⁷ नळाहोती अव तान नाकु दी नळु सकोव, अदिक नळदुर दा तिर्गोव ईला.

¹⁸ आ नाकु चक्का अन घेरा हापाळ धोड्डेव अदिक अंज्क बरापरी ईरव, अदिक अऊर घेरा दा नाकु दी कण्ण अच कण्णगोळ तुमकु ईरव.

¹⁹ याग जीवधारी नळु तोगोव, आग चक्कागोळ भी अऊर सांगुळ नळुतोगोव; अदिक याग जीवधारी जमीन मा टु येळ तोगोव, आग चक्का भी येळ तोगोव.

²⁰ यात आत्मा होगोद चाहसोद, आत्त अच अव होगोव, अदिक चक्का जीवधारीगोळ सांगुळ यळतोगोव; यतिकी अऊर आत्मा चक्का दा ईरोद.

²¹ याग अव नळुतोगोव आग ईव भी नळुतोगोव; अदिक याग याग अव नीदरव आग ईव भी निदरव; अदिक याग अव जमीन मा टु येळतोगोव आग चक्का भी अऊर सांगुळ येळतोगोव; यतिकी जीवधारीगोळ आत्मा चक्का दा ईरोद.

²² जीवधारीगोळ्द ताल्ला अन म्याकुच आकाश- मण्डल घाई- येनारा ईरोद जो बर्फ इन घाई भयानक रीती देल चमकुसोद, अदिक अद आंदुर ताल्लागोळ म्याकुच फैलुसकु ईरोद.

²³ आकाश मण्डल इन ल्यालमा, अऊर पंख आबुर दाबुर दी सीधा फैलुसकु ईरव; अदिक हर ऊंद जीवधारी इन येढ्‌ढ येढ्ढ अदिक भी पंखगोळ ईरव यदुर देल अऊर शरीर मुचकु ईरव.

²⁴ अऊर नळाहोती अऊर पंखगोळ्द फळफळाहट इन भास नानी हापाळ नीर, या सर्वशक्तिमान इन वाणी, या सेना अन हलचल इन घाई केळ बरोद; अदिक याग अव नीदुर तोगोव, आग तान पंख लटकुस बुळोव .

²⁵ बाक अऊर ताल्ला अन म्याकुच जो आकाश मण्डल ईरोद, अदुर म्याकुच टु ऊंद शब्द केळ बरोद; अदिक याग अव नीदरव, आग तान पंखगोळ लटकुस बुळव.

²⁶ जो आकाश मण्डल अऊर ताल्ला अन म्याकुच ईरोद, अदुर म्याकुच मान्सी येनारा नीलमणि इन घाई बन्सकु सिंहासन ईरोद; ई सिंहासन इन म्याकुच मंळसा अन घाई यावारा कांळ्सोन.

²⁷ अऊर नेळु टु हुडुकु म्याकुच इन दी नानी मान्सी झलकुस्द पीतल इन घाई कांळ्सत, अदिक अदुर बुळ्क अदिक नाकु दी बेक्की घाई कांळ्सोद; बाक आ मंळसा अन नेळु टु हुडुकु ल्यालमा भी नानी बेक्की इन घाई कांळ्सोद; अदिक अदुर नाकु दी ऊजुळ ईरोद .

²⁸ ह्यांग माळ बरा दिशी बादल दा धनुष कांळ्सकु बीळतद, हांग अच नाकु दीकळोद ऊजुळ कांळ्स तोगोद. यहोवा अन रूप इन तेज हिंगा ईरोद. अदरी नोळकु, ना बाय इन भार देल बिद्दीन, आग ना ऊंद शब्द केळदीन ह्यांग कि यावारा मातगोळ माळतान.