गलातिगोळ 2

¹ चौदा वर्ष इन बाद्दा ना बरनबास उन सांगुळ मात्‍त यरूशलेम इक होदीन, अदिक तीतुस उक भी सांगुळ ओतीन.

² नान होगोद ईश्वरीय प्रकाशन इन अनुसार आत; अदिक जो खुशखबरी ना गैरयहूदीगोळ दा प्रचार माळतीन, अदरी ना आंदरी हेळ बुटीन, लेकीन आबना दा आंदरी जो धोड्डेर सम्सकु आगोर, ताकी हिंग आगबाळुल कि नान ई समय इन या पिछला दवळ धूप बेकार ठहरूसुल.

³ लेकीन तीतुस उक भी जो नान सांगुळ ईरोन अदिक गैरयहूदी आन, खतना माळसुसोर साटी मजबुर माळकु आगीदील.

⁴ ईद आ ख्वाटा वार्टुर कारण आत जो चोरी देल बंदीदुर, कि आ स्वतंत्रता अन जो मसीह यीशु दा नामी सिक्याद, भेद ताकोमकु नाम मा नियंत्रण हासिल माळुल.

⁵ ऊंद घळीतीम आंदुर्द हात्‍ती आगोद नाव मान्सीदील, इदुरसाटी कि खुशखबरी इन उपज नीम दा बन्सकु ईरूल.

⁶ बाक जो लॉकुर येनारा सम्सकु आगोर आंदुर चाहे ह्यांग भी ईतीदार नानी इदुर से येनु लेना-देना हैलेच; परमेश्वर यारदु पक्षपात माळालुन आंदुर से जो येनारा सम्सकु आगोर, नानी येनु भी प्राप्त आगीदील.

⁷ लेकीन इदुर विपरीत याग आंदुर विश्वास इक नोळदुर कि ह्यांग यहूदी लॉकुर साटी खुशखबरी इन क्याल्सा पतरस उक कोटकु आत, हांग अच गैरयहूदीगोळ साटी नानी खुशखबरी केळसोद कोटकु आत.

⁸ यतिकी याव पतरस से खतना माळ्द लॉकुर दा प्रेरिताई इन क्याल्सा बळा प्रभाव सहित माळसुसदुन, आवा नान से भी गैरयहूदीगोळ दा प्रभावशाली क्याल्सा माळसुसदुन,

⁹ अदिक याग आंदुर आ अनुग्रह अक जो नानी सिक्‍कीत जान्स कोंडुर, रा याकूब, अदिक कैफा, अदिक यूहन्ना जो मंडली इन खंबा सम्सकु आगोर, नानी अदिक बरनबास उक संगती इन ऊमा कय कोट्टुर कि नाव गैरयहूदीगोळ हात्‍ती होदेव अदिक आंदुर खतना माळ्द लॉकुर हात्‍ती;

¹⁰ सिर्फ ईद अंदुर कि नाव कंगालगोळ्द सुधी ताकोंडेव, अदिक ईदा क्याल्सा अक माळोद ना खुद भी कोशिश माळीन.

¹¹ लेकीन याग कैफा अन्ताकिया दा बंदुन, रा ना आऊन बाय मा आऊन सामना माळदीन, यतिकी आव दोषी ठहरूसीदुन.

¹² इदुरसाटी कि याकूब उन दी टु येनारा लॉकुर बरोर से पयले आव गैरयहूदीगोळ सांगुळ तिनतोगोन, लेकीन याग आंदुर बंदुर रा खतना माळ्द लॉकुर अंज्क इन कारण आव हिंद सरकुसेदुन अदिक किनारा माळली कुरतुन.

¹³ आऊन सांगुळ जमा यहूदीगोळ भी कपट माळदुर, ईल ताका कि बरनबास भी आंदुर कपट दा बिदोदुन.

¹⁴ लेकीन याग ना नोळदीन कि आंदुर खुशखबरी इन सच्चाई मा सीधा चाल नळालुर, रा ना सप्पा मुंदुर मुंद कैफा से अंदीन, “याग नी यहूदी आगकु गैरयहूदीगोळ घाई नळुत्या अदिक यहूदीगोळ घाई ईलारा नी गैरयहूदीगोळी यहूदीगोळ घाई नळुली येती अनत्या?”

¹⁵ नाव रा जनम टु यहूदी हुयेव, अदिक पापी गैरयहूदीगोळ दा टु हैलेच.

¹⁶ तरी ईद जान्सकु कि मंळसा व्यवस्था अन क्याल्सागोळ देल ईला, लेकीन सिर्फ यीशु मसीह मा विश्वास माळोद द्वारा न्यायी ठहरूसतान, नाव खुद भी मसीह यीशु मा विश्वास माळदेव कि नाव व्यवस्था अन क्याल्सागोळ देल ईला, लेकीन मसीह मा विश्वास माळदुर देल न्यायी ठहरूसदेव; इदुरसाटी कि व्यवस्था अन क्याल्सागोळ देल यातोदु प्राणी न्यायी ठहरूसतीदील.

¹⁷ नाव जो मसीह दा न्यायी ठहरूसोद चाहासतेव, अगर खुद अच पापी होट्टेव रा येन मसीह पाप इन सेवक आन? यागलु ईला!

¹⁸ यतिकी जो येनारा ना केळ्द बुटीन अगर अदरी मात्‍त माळतीन, रा तान तान इक अपराधी ठहरूसतीन.

¹⁹ ना रा व्यवस्था अन द्वारा व्यवस्था अन साटी सोतोदीन कि परमेश्वर मसीह अन्द साटी जित्‍ता ईराइन.

²⁰ ना मसीह अन सांगुळ क्रूस मा येर्सकु आगीन, ईग ना जित्‍ता ईतीदील, लेकीन मसीह नान दा जित्‍ता आन; अदिक ना मय दा ईग जो जित्‍ता आईन रा सिर्फ आ विश्वास देल जित्‍ता आईन जो परमेश्वर उन पार उन मा आद, याव नान से प्यार माळदुन अदिक नान साटी तान तान इक कोट बुट्टुन.

²¹ ना परमेश्वर उन अनुग्रह अक बेकार ठहरूसालीन; यतिकी अगर व्यवस्था अन द्वारा न्यायीपन आगाईत, रा मसीह अन सायोद बेकार आगाईत.