गलातिगोळ 5

¹ मसीह स्वतंत्रता अन साटी नामी स्वतंत्र माळ्यान; इदुरसाटी इदुर्दा अच स्थिर ईरी, अदिक दासत्व अन जुआ दा मात्‍त बिळबाळी.

² नोळी, ना पौलुस नीम से अनतीन कि अगर खतना माळसुसीर, रा मसीह देल नीमी येनु लाभ आगतीदील.

³ तरी भी ना हर ऊंद खतना माळसुसावाळा अक विनती माळतीन कि आऊक सप्पा व्यवस्था मानसोद बिद्दीत.

⁴ नीव जो व्यवस्था अन द्वारा न्यायी ठहरूसोद चाहासतीर, मसीह देल अलग अदिक अनुग्रह देल बिदोगीर.

⁵ यतिकी आत्मा अन कारण नाव विश्वास देल, आशा माळ्द न्यायीपन इन हादी कायतेव.

⁶ मसीह यीशु दा ना खतना अदिक ना खतनारहित येनारा क्याल्सा अन आद, लेकीन सिर्फ विश्वास, जो प्यार इन द्वारा प्रभाव हाकत्या.

⁷ नीव रा भला भाति हरीर. ईग याव नीमी रोक्स बुटुन कि सच्चाई इन भरोसा माळबाळी.

⁸ हिंग सीख नीम कारावाळा अन दी टु हैलेच.

⁹ थ्वाळासा खमीर सप्पा काल्सद हीट इक खमीर माळ बुळतद.

¹⁰ ना प्रभु मा नीम बारा दा भरोसा ईटतीन कि नीम यातोदारा दुसरा विचार ईरतीदील; लेकीन जो नीमी घबरूस बुळतान, आव यावारा येती आगबाळुल फैसला आदीत.

¹¹ लेकीन हे वार्टुरा अदिक आकतींगेरा, अगर ना ईगासताका खतना अन प्रचार माळतीन, रा येती ईगासताका सतुस्कु आगतीन? बाक रा क्रूस इन ठोकर होगतेला ईत्‍त.

¹² भला आगाईत कि जो नीमी डावाडोल माळतार, आंदुर तान मय अच कोद बुळायदुर.

¹³ हे वार्टुरा अदिक आकतींगेरा, नीव स्वतंत्र आगोर साटी कार्सकु आगीर; लेकीन हिंग आगबाळुल कि ईद स्वतंत्रता शारीरिक क्याल्सागोळ साटी मवका बनसुल, बल्‍की प्यार देल आबुर दाबुर दास बन्सी.

¹⁴ यतिकी सप्पा व्यवस्था ई ऊंद अच मात दा पुरा आगेगतद, “नी तान हातळोर से तान घाई प्यार ईट.”

¹⁵ लेकीन अगर नीव आबुर दाबुर इक हल्ल देल कचतीर अदिक हरूकु तिनतीर, रा सावधान ईरी कि आबुर दाबुर सत्यानाश ना माळबुळी.

¹⁶ लेकीन ना अनतीन, आत्मा अन अनुसार नळदीर रा नीव मय इन लालसा यातोदारा रीति देल पुरा माळतीदील.

¹⁷ यतिकी मय आत्मा अन विरोध दा अदिक आत्मा मय इन विरोध दा लालसा माळतद, अदिक ईव आबुर दाबुर विरोधी आव, इदुरसाटी कि जो नीव माळोद चाहासतीर अद माळ सकबाळी.

¹⁸ अदिक अगर नीव आत्मा अन नळ्सदुर देल नळुतीर रा व्यवस्था अन हात्‍ती ईतीदील.

¹⁹ मय इन क्याल्सा रा प्रगट आव, मतलब व्यभिचार, खराब क्याल्सा, लुचपन,

²⁰ मूर्तिपूजा, जादु टोना, दुश्मनी, झगळा, जलन, सिट्ट, विरोध, फूट, स्वार्थीपन,

²¹ जलन, मतवालापन, अवैध संबंध, अदिक ईऊर घाई मात्‍त दुसरा क्याल्सा आव, ईऊर बारा दा ना नीम से पयले टु अच अंद बुळतीन ह्यांग पयले अंद भी कोंडीन, कि ईत्‍ता क्याल्सा माळावाळेर परमेश्वर उन राज्य अन वारीस आगतीदील.

²² लेकीन आत्मा अन काय, प्यार, खुशी, शांती, धीरज, कृपा, भलाई, विश्वास,

²³ नम्रता, अदिक संयम आद; हिंग-हिंग क्याल्सागोळ विरोध दा यातोदारा भी व्यवस्था हैलेच.

²⁴ अदिक जो मसीह यीशु नोर आर, आंदुर मय इक आऊन लालसागोळ अदिक अभिलाषागोळ समेत क्रूस मा येर्स बुटार.

²⁵ अगर नाव आत्मा अन द्वारा जित्‍ता आयेव, रा आत्मा अन अनुसार नळदेव भी.

²⁶ नाव घमण्डी आगकु ना आबुर दाबुर इक छेळसेव, अदिक ना आबुर दाबुर से जलनखोरी माळेव.