उत्पत्ति 1

¹ सुरूवात दा परमेश्वर आकाश अदिक पृथ्‍वी इंद रचना माळदुन.

² पृथ्‍वी बेकार अदिक सुनसान बिदकु ईरोद, अदिक गहरा नीर इन म्‍याकुच अंधार ईरोद; अदिक परमेश्वर उन आत्मा नीर इन म्‍याकुच वयाळतोगोद.

³ याग परमेश्वर अंदुन, “ऊजोळ आगेग,” रा ऊजोळ आगेत.

⁴ अदिक परमेश्वर ऊजोळ इक नोळदुन कि वळ्‍लीद आद; अदिक परमेश्वर ऊजोळ इक अंधार टु अलग माळदुन.

⁵ अदिक परमेश्वर ऊजुळ इक हागुल अदिक अंधार इक ईळ्‍ल्‍क अंदुन. अदिक द्‍यावगा आत बाक व्‍हातुर आत. ई प्रकार पयला दिन आगेत.

⁶ बाक परमेश्वर अंदुन, “नीर इन बीच दा ऊंद ईत्‍ता अंतर आगुल कि नीर येढ्‍ढ भाग आगेगुल.”

⁷ आग परमेश्वर ऊंद अंतर माळकु अदुर ल्‍यालमागोळोद नीर अदिक अदुर म्‍याकुच इन नीर इक अलग अलग माळदुन; अदिक हांग अच आत.

⁸ अदिक परमेश्वर आ अंतर इक आकाश अंदुन. बाक द्‍यावगा आत बाक व्‍हातुर आत. ई प्रकार दुसरा दिन आत.

⁹ बाक परमेश्वर अंदुन, “आकाश इन ल्‍यालमागोळोद नीर ऊंद जागा दा जमा आगेगुल अदिक वळ्गींद जागा कांळ्‍सुल,” अदिक हांग अच आत.

¹⁰ परमेश्वर वळ्गींद जागा अक पृथ्‍वी अंदुन, बाक जो नीर जमा आत अदरी आव समुद्र अंदुन: अदिक बाक परमेश्वर नोळदुन कि वळ्‍लीद आद.

¹¹ बाक परमेश्वर अंदुन, “पृथ्‍वी टु हिवरा कचरा, अदिक बींजावाळा श्‍याणेव श्‍याणेव मार्र, अदिक काय कोळावाळा मार्र भी यदुरव बींजा अऊर दा टु ऊंद ऊंद इन जात इन अनुसार आद, पृथ्‍वी मा जगसुल,” अदिक हांग अच आद.

¹² ई प्रकार पृथ्‍वी टु हिवरा कचरा, अदिक श्‍याणेव श्‍याणेव मार्र, यदुर दा तान तान जात इन अनुसार बींजा ईरतद, अदिक काय कोळावाळा मार्र यदुरव बींजा ऊंद ऊंद जात इन अनुसार अऊर दा ईरताव जगसुल: अदिक परमेश्वर नोळदुन कि वळ्‍लीद आद.

¹³ अदिक द्‍यावगा आत अदिक बाक व्‍हातुर आत. ई प्रकार तीसरा दिन आगेत.

¹⁴ बाक परमेश्वर अंदुन, “दिन इक ईळ्‍ल्‍क टु अलग माळोर साटी आकाश इन अंतर दा ज्‍योतीगोळ आगुल; अदिक अव चिन्हगोळ, अदिक नियत समयगोळ अदिक दिनगोळ, अदिक वर्षगोळ कारण आगुल;

¹⁵ अदिक अव ज्‍योतीगोळ आकाश इन अंतर दा पृथ्‍वी मा ऊजोळ कोळावाळा भी ठहरूसुल,” अदिक हांग अच आत.

¹⁶ आग परमेश्वर येढ्‍ढ धोड्‍डेव ज्‍योतीगोळ माळदुन; अदुर दा टु धोळ्‍द ज्योति इक हागुल दा प्रभुता माळोरसाटी अदिक श्‍याण ज्योति इक ईळ्‍ल्‍क दा प्रभुता माळोरसाटी माळदुन; अदिक तारागोळ इक भी माळदुन.

¹⁷ परमेश्वर अवरी आकाश इन अंतर मा इदुरसाटी ईटदुन कि अव पृथ्‍वी मा ऊजोळ कोळुल,

¹⁸ यतिकी हागुल अदिक ईळ्‍ल्‍क मा प्रभुता माळुल, अदिक ऊजुळ इक अंधकार से अलग माळुल: अदिक परमेश्वर नोळदुन कि वळ्लीद आद.

¹⁹ अदिक द्‍यावगा आत बाक व्‍हातुर आत. ई प्रकार चौथा दिन आगेत.

²⁰ बाक परमेश्वर अंदुन, “नीर जीत्‍ता प्राणीगोळ से हापाळ अच तुम्‍मेगुल, अदिक पक्षी पृथ्‍वी इन म्‍याकुच आकाश इन अंतर मा उळुसुल.”

²¹ इदुरसाटी परमेश्वर जाती जाती इन धोळ धोळ नीर दाकळव जन्‍तुगोळ्‍द, अदिक आ सप्‍पा जीत्‍ता प्राणीगोळव भी रचना माळदुन जो नळुताव वयाळताव अऊर देल नीर हापाळ अच तुम्‍मेत, अदिक ऊंद ऊंद जाती इन ऊळुसावाळा पक्षीगोळ्द भी रचना माळदुन: अदिक परमेश्वर नोळदुन कि वळ्‍लीद आद.

²² अदिक परमेश्वर ईद अनकु अवरी आशीर्वाद कोट्‍टुन, “वाळुसतेला होगी, अदिक समुद्र अन नीर दा तुम्‍मेगी, अदिक पक्षी पृथ्‍वी मा वाळुसुल.”

²³ अदिक द्यावगा आत बाक व्‍हातुर आत. ई प्रकार पाचवा दिन आगेत.

²⁴ बाक परमेश्वर अंदुन, “पृथ्‍वी माकळव ऊंद ऊंद जाती इन जीत्‍ता प्राणी, मतलब घरेलु पशु, अदिक रांगसावाळा किळा, अदिक पृथ्‍वी इन वनपशु, जाती जाती इन वन-पशुगोळी, जाती जाती इन अनुसार पैदा आगुल,” अदिक हांग अच आत.

²⁵ ई प्रकार परमेश्वर पृथ्‍वी इन जाती जाती इन वन-पशुगोळी, अदिक जाती जाती इन जमीन मा सप्‍पा रांगसावाळा किळागोळी माळदुन: अदिक परमेश्वर नोळदुन कि वळ्‍लीद आद.

²⁶ बाक परमेश्वर अंदुन, “नाव मंळसा अक तान स्‍वरूप इन अनुसार तान समानता दा माळेव; अदिक अव समुद्र दाकळव मेनगोळ, अदिक आकाश इन पक्षीगोळ, अदिक मान्‍यागोळोव पशुगोळ, अदिक पुरा पृथ्‍वी मा, अदिक सप्‍पा रांगसावाळा किळागोळ मा जो पृथ्‍वी मा रांगस्‍ताव, अधिकार ईटी.”

²⁷ आग परमेश्वर मंळसा अक तान स्‍वरूप इन अनुसार पैदा माळदुन, तांद अच स्‍वरूप इन अनुसार परमेश्वर आऊक पैदा माळदुन; गंळ्स अदिक आर्त माळकु आव मंळसागोळ्‍द रचना माळदुन.

²⁸ अदिक परमेश्वर आंदरी आशीर्वाद कोट्‍टुन, अदिक आंदुर से अंदुन, “वाळुसी, अदिक पृथ्‍वी मा तुम्‍मेगी, अदिक अदरी तान अधिकार दा माळकोमी; अदिक समुद्र दाकळव मेनगोळ, अदिक आकाश इन पक्षीगोळ, अदिक पृथ्‍वी मा रांगसावाळा सप्‍पा जन्‍तुगोळ मा अधिकार ईटी.”

²⁹ बाक परमेश्वर आंदुर से अंदुन, “केळी यास बींजावाळा श्‍याणेव श्‍याणेव मार्र पुरा पृथ्‍वी इन म्‍याकुच आव अदिक यास मार्रगोळ दा बींजावाला काय ईरताव, अव सप्‍पा ना नीमी कोटबुट्टीन; अव नीम भोजन इन साटी हूँ.

³⁰ अदिक यास पृथ्‍वी इन पशु, अदिक आकाश इन पक्षी, अदिक पृथ्‍वी मा रांगसावाळा किळागोळ आव, अऊर दा जीवन इन प्राण आद, आ सप्‍पा अक तीनोर साटी ना सप्‍पा हिवरा हिवरा श्‍याणेव श्‍याणेव मार्र कोटीन,” अदिक हांग अच आत.

³¹ आग परमेश्वर जो येनारा माळीदुन सप्‍पा अक नोळदुन, कि अद हापाळ अच वळ्‍लीद आद, द्‍यावगा आत बाक व्‍हातुर आत. ई प्रकार आरवा दिन आगेत.