उत्पत्ति 3

¹ यहोवा परमेश्वर यास आळी दाकळव जनावर माळीदुन, आ सब दा हाव चालाक ईरोद; अद हाव आर्त इन से अंत, “येन खरा आद कि परमेश्वर अंदान, ‘नीव ईद बगीचा अन्‍द यातोदु मार्र इन काय तिनबाळेतीर’?”

² आर्त हाव से अंदुर, “ई बगीचा अन मार्र इन काय नाव तीन सकतेव;

³ लेकीन जो मार्र बगीचा अन बीच दा आद, अदुर काय इन बारा दा परमेश्वर अंदान कि न रा नीव तीनेतीर अदिक न अदरी मुटेतीर, ईला रा सोतोदीर.”

⁴ आग हाव आर्त से अंत, “नीव सही दा सायतीदिल!

⁵ बल्‍की परमेश्वर जान्‍सतान कि या दिशी नीव अदुर काय तिंदीर अदा दिशी नीम कण्‍ण खुलसेदव, अदिक नीमी भला बुरा अन्द ग्‍यान सीकीत अदिक नीव परमेश्वर उन घाई आगेदीर.”

⁶ याग आर्त नोळदुर कि आ मार्र इन काय तीनोर साटी वळ्‍लीद, अदिक नोळदुर दा हापाळ लुभावना, अदिक ग्यान कोळोर साटी चहासा लायक आद; आग आक अदुर काय मुरूकु तिंदुर, अदिक तान गांड उक भी कोट्‍टुर, अदिक आव भी तिंदुन.

⁷ आग आ येढ्‍ढु मुंदुरव कण्‍णगोळ खुलसेदव, अदिक आंदरी मालुम आत कि आंदुर ऊगळा आर; इदुरसाटी आंदुर अंजीर इन याल्ला जोळ्स जोळ्‍सकु लंगोट माळदुर.

⁸ आग यहोवा परमेश्वर, जो हागुल इन ठंडा समय बगीचा दा वयाळ तोगोर, आंदरी शब्‍द केळ बत्‍त. आग आदम अदिक आऊन हिंग्‍स बगीचा अन मार्र इन बीच परमेश्वर उन से होचकोंडुर.

⁹ आग यहोवा परमेश्वर आदम उक कारूकु आऊन से केळदुन, “नी येल आय?”

¹⁰ आव अंदुन, “ना नीन शब्‍द बगीचा दा केळकु अंजेदीन, यतिकी ना ऊगळा ईरीन; इदुरसाटी होचकोंडीन.”

¹¹ परमेश्वर अंदुन, “याव नीनी हेळदुन कि नी ऊगळा आय? याता मार्र इन काय ना नीनी तीनली मना माळीदिन, येन नी अदुर काय तींद्‍या?”

¹² आदम अंदुन, “याता आर्त इक नी नान सांगुळ ईरली कोट्या आका आ मार्र इन काय नानी कोट्‍टुर, अदिक ना तिंदीन.”

¹³ आग यहोवा परमेश्वर आ आर्त से अंदुन, “नी ईद येन माळ्‍द?” आर्त अंदुर, “हाव नानी बहकुस बुळ्‍त, आग ना तिंदीन.”

¹⁴ आग यहोवा परमेश्वर हाव से अंदुन, “नी जो ईद माळ्‍द इदुरसाटी नी सप्‍पा मान्‍यागोळोव जनावरगोळ, अदिक सप्‍पा आळी दाकळव जनावर से येक्‍कुल श्रापित आय; नी व्‍हाटा अन सहारा देल नळद्‍या, अदिक जीवन तीम मुण्‍ण नेकतेला ईत्‍या:

¹⁵ अदिक ना नीन अदिक ई आर्त इन बीच दा, अदिक नीन वंश अदिक ईकीन वंश इन बीच दा सिट्‍ट पैदा माळाईन; आव नीन ताल्‍ला अक कुचलुस्‍यान अदिक नी आऊन तर काल इक कच्‍या.”

¹⁶ बाक आर्त से आव अंदुन, “ना नीन दुख अदिक नीन व्‍हाट्‍यादी आगोद दुख इक हापाळ वाळुसाईन; नी हापाळ दुख सहन माळकु पार उक पैदा माळ्‍या; अदिक नीन लालसा नीन गांड उन मा ईत्‍तीत, अदिक आव नीन मा प्रभुता माळ्‍यान.”

¹⁷ अदिक आदम से आव अंदुन, “नी जो तान हिंग्‍स उन मात केळ्‍द, अदिक या मार्र इन काय इन बारा दा ना नीनी आग्‍या कोटीदीन कि नी अदरी तिनबाळेत, अदरी नी तिंद इदुरसाटी जागा नीन कारण श्रापित आद. नी अदुर ऊपज जीवन तीम दुख इन सांगुळ तिनतोद्‍या;

¹⁸ अदिक अद नीन साटी मुळ्‍ल बेळ्‍दीत, अदिक नी केई इन ऊपज तिंद्या;

¹⁹ अदिक तान मेहनत इन कमाई इन रोट्‍टी तिनतोद्‍या, अदिक आखरी दा मुण्‍ण दा सिकेद्‍या यतिकी नी अदुर दा टु उच तेगुकु आग्या; नी मुण्‍ण रा हुय अदिक मुण्‍ण दा का मात सिकेद्‍या.”

²⁰ आदम तान हिंग्‍स उन हेसुर हवा ईटदुन; यतिकी यास मंळसा जित्ता आर आ सप्‍पा मुंदुर आदिमाता आका आदुर.

²¹ अदिक यहोवा परमेश्वर आदम अदिक आऊन हिंग्‍स उन साटी तोगुल इन अँगरखा माळकु आंदरी हाकसुस बुट्‍टुन.

²² बाक यहोवा परमेश्वर अंदुन, “मंळसा भला बुरा अन ग्‍यान ताकोमकु नाम दा टु ऊंद इन घाई आगेग्‍यान: इदुरसाटी ईग हिंग आग बाळुल कि आव कय वाळुसकु जीवन इन मार्र इन काय भी मुरूकु तीन कोमुल अदिक सदा जीवित ईरूल.”

²³ इदुरसाटी यहोवा परमेश्वर आऊक अदन इन बगीचा दा टु तेगु बुट्‍टुन कि आ जागा मा खेती माळुल यदुर दा टु आव माळकु आगीदुन.

²⁴ इदुरसाटी आदम उक आव तेगु बुट्‍टुन अदिक जीवन इन हादी इन पहरा कोळोर साटी अदन इन बगीचा अन पूर्व दी जीत्‍ता प्राणीगोळी, अदिक नाकु दी वयाळावाळा ज्‍वालामय तलवार इक भी हासील माळ कोंडुन.