उत्पत्ति 35

¹ आग परमेश्वर याकूब से अंदुन, “ईल टु होटकु बेतेल इक होग, अदिक अल्‍या ईर; अदिक अल परमेश्वर उन साटी वेदी माळ, याव नीनी आ समय दर्शन कोट्‍टुन या समय नी तान वार्ट एसाव उन अंज्‍क देल ओळतोग्‍या.”

² आग याकूब तान घराना, अदिक आ सप्‍पा से भी जो आऊन सांगुळ ईरोर, अंदुन, “ई समय नीम हाती जो पराया द्यावगोळ आर, आंदरी दुर माळ बुळी अदिक तान तान इक शुद्ध माळकु तान कपळा बदलुस बुळी.

³ अदिक बरी, नाव ईल टु होटकु बेतेल इक होगाता; अल ना परमेश्वर उन साटी ऊंद वेदी माळाईन, याव संकट इन दिनगोळ दा नांद केळदुन, अदिक याता हादी देल ना नळु तोगीन, अदुर दा नान सांगुळ ईत्‍तुन.”

⁴ ईद केळकु आंदुर याकूब उक सप्‍पा पराया द्याव कोट्‍ट बुट्‍टुर, जो आंदुर तान हाती ईटीदुर. ईदुर अलावा कीव इन कुण्‍डगोळ भी कोट्‍टुर. याकूब ई सप्‍पा अक आ बांज मार्र इन ल्‍यालमा नळ्‍सदुन, जो शकेम इन हाती ईरोद.

⁵ याग आंदुर अल टु होट्‍टुर आग पुरा नगर मा परमेश्वर उन अंज्‍क बिदकु ईरोद. याऊ भी याकूब उन चिकोर्द पीछा माळीदिल.

⁶ याकूब आ सप्‍पा मुंदुर सांगुळ जो आऊन सांगुळ ईरोर, कनान द्‍याश इन लूज नगर इक बंदुन. अद नगर इक बेतेल भी अनकु आगतद.

⁷ अल आव ऊंद वेदी माळदुन, अदिक आ जागा अन हेसुर एल-बेतेल ईटदुन; यतिकी याग आव तान वार्ट उन अंज्‍क देल ओळतोगोन आग परमेश्वर आऊन मा अल्‍या‍ प्रगट आगीदुन.

⁸ अदिक रिबका अक हाल कुळसावळ्‍त दाई दबोरा सोतोदुर, अदिक बेतेल इन बांज मार्र इन हाती आकी मुण्‍ण कोटकु आत, अदिक आ बांज मार्र इन हेसुर अल्‍लोनबक्‍कूत ईटकु आत.

⁹ बाक याकूब उन पद्‍दनराम टु बंदुर बाद्‍दा परमेश्वर दुसरा घन आऊक दर्शन कोटकु आशीष कोट्‍टुन.

¹⁰ अदिक परमेश्वर आऊन से अंदुन, “ईगास ताका रा नीन हेसुर याकूब ईत्‍त; लेकीन मुंदु टु नीन हेसुर याकूब ईरतीदील, नी इस्त्राएल कहलुस्‍या.” ई प्रकार आव आऊन हेसुर इस्त्राएल ईटदुन.

¹¹ बाक परमेश्वर आऊन से अंदुन, “ना सर्वशक्तिमान प्रभु हुईन. नी फलुस फुलुस अदिक वाळुस; अदिक नीन से ऊंद जाती बल्‍की जातीगोळ्‍द ऊंद धोळ मंडली भी पैदा आदीत, अदिक नीन वंश दा राजा पैदा आदार.

¹² अदिक जो द्‍याश ना अब्राहम अदिक इसहाक उक कोटीन, अदा द्‍याश नीनी कोळतीन, अदिक नीन हिंद नीन वंश इक भी कोळाईन.”

¹³ आग परमेश्वर आ जागा दा, येल आव याकूब से मातगोळ माळदुन, आंदुर हाती टु म्‍याकुच येरेदुन.

¹⁴ अदिक या जागा दा परमेश्वर याकूब से मातगोळ हेळदुन, अल याकूब कल्‍ल इन ऊंद खंबा नीदरूसदुन, अदिक अदुर मा अंगुर इन रास्सा अदिक जैतुन इन याण्‍णा हाक्‍क बुट्‍टुन.

¹⁵ येल परमेश्वर याकूब से मातगोळ माळदुन, आ जागा अन हेसुर आव बेतेल ईटदुन.

¹⁶ बाक आंदुर बेतेल टु नळोद चालु माळदुर; अदिक एप्राता नगर थ्वाळासा अच दुर ईरोद कि राहेल इक पार हाळोद दुख सिकली कुर्त.

¹⁷ याग आकी हापाळ दुख येळतोगोद आग दाई आकिन से अंदुर, “अंजबाळ; ईग भी नीनी पार अच आदीत.”

¹⁸ आग हिंग आत कि आक सोतोदुर, अदिक जीव होळ्‍त-होळ्‍त आक आ पार उन हेसुर बेनोनी ईटदुर; लेकीन आऊन आप्‍प आऊन हेसुर बिन्यामीन ईटदुन.

¹⁹ अदिक राहेल सोत्‍तुर, अदिक एप्राता, मतलब बैतलहम हादी दा, आकी मुण्‍ण कोटकु आत.

²⁰ अदिक याकूब आकिन कब्र मा ऊंद खंबा नीदरूसदुन: राहेल इन कब्र अन अद खंबा ईंद ताका बन्सकु आद.

²¹ बाक इस्त्राएल तान यात्रा चालु माळदुन अदिक एदेर हेसुर इन गुम्‍मट इन मुंद तान ड्‍यारा नीदरूसदुन.

²² याग याकूब आ द्‍याश दा ईरोन, आग ऊंद दिशी हिंग आत कि रूबेन होगकु तान आप्‍प उन रखैल बिल्हा अन सांगुळ कुकर्म माळदुन; अदिक ईद मात इस्त्राएल उक मालुम आत. याकूब उक हनुन पारगोळ ईरोर.

²³ अदुर दा टु लियाह अन चिकोर ईंदुर ईरोर; मतलब याकूब उन धोळ पार रूबेन, बाक शिमोन, लेवी, यहूदा, इस्साकार, अदिक जबूलून.

²⁴ अदिक राहेल इन चिकोर ईंदुर ईरोर; मतलब यूसुफ, अदिक बिन्यामीन.

²⁵ अदिक राहेल इन दासी बिल्हा अन चिकोर ईंदुर ईरोर; मतलब दान, अदिक नप्ताली.

²⁶ अदिक लियाह अन दासी जिल्‍पा अन चिकोर ईंदुर ईरोर : मतलब गाद, अदिक आशेर. याकूब उन इंदुर अच चिकोर आदुर, जो आऊन से पद्‍दनराम क्षेत्र दा पैदा आदुर.

²⁷ अदिक याकूब मम्रे दा, जो किर्यतर्बा, मतलब हेब्रोन हुन, येल अब्राहम अदिक इसहाक परदेशी आगकु ईतीदुर, तान आप्‍प इसहाक उन हाती बंदुर.

²⁸ इसहाक उन ऊमर ऊंद सौ अस्‍सी वर्ष इन आत.

²⁹ अदिक इसहाक उन जीव बीटोत, अदिक आव सोतोदुन, अदिक आव बाट्‍ट अदिक पुरा ऊमर इन आगकु तान लॉकुर दा होगकु सीकेदुन; अदिक आऊन पार एसाव अदिक याकूब आऊक मुण्‍ण कोट्‍टुर.