उत्पत्ति 49

¹ बाक याकूब तान पारगोळ इक ईद अनकु कारदुन, “जमा आगेगी, ना नीम इक हेळाईन कि आखरी दिनगोळ दा नीम मा येन येन बितुसीत.”

² याकूब उन पारगोळा, ऊंद सांगुळ बरी अदिक केळी, तान आप्प इस्त्राएल उन केळी.

³ “हे रूबेन, नी नान धोड्डेव पार हुय, नी नान पयला पार अदिक नान ताकत इन पयला सबुत हुय, नानी नान सप्पा पारगोळ से येक्‍कुल गर्व नीन मा आद अदिक नी सबसे यक्कुल ताकतवर आय.

⁴ नी जो नीर इन घाई उबलुसावाळा आय, नी नान सप्‍पा पारगोळ से येक्‍कुल महत्व अन आग सकतीदील, नी आ आर्त इन सांगुळ मींग्या अदिक आकी अपवित्र माळ्या जो नीन आप्प उन दासी ईरोर, नी तान आप्प उन व्हर्स मा काल ईट्या.”

⁵ “शिमोन अदिक लेवी वार्टुर उर, आंदरी तान तलवारगोळ से आळोद प्रिय आद.

⁶ हे नान जीव, आंदुर मर्म दा बीळ बाळ, हे नान महिमा, आंदुर्द सभा दा मीसळुसबाळ; यतिकी आंदुर कोप देल मंळसागोळी कोंदार, अदिक तान अच इच्छा मा नळुकु वस्तागोळी अपंग माळ्यार.

⁷ आंदुर्द सिट्ट ऊंद अभिश्राप आद, ईंदुर हापाळ कठोर अदिक तान पागलपन दा सिट्ट दा आर, याकूब उन द्याश दा ईंदुर्द परिवारगोळ दा तान जमीन ईरतीदील, आंदुर पुरा इस्त्राएल द्याश दा फैलुस्यार.”

⁸ “यहूदा, नीन वार्टुर नीन प्रशंसा माळ्यार, नी तान दुश्मनगोळी हारूस्या, नीन वार्टुर नीन मुंद झुकस्यार.

⁹ यहूदा आ हुल्ल इन घाई आन याव यातोदारा जनावर इक कोंदान, हे नान पारा, नी तान शिकार मा नीदुरकु हुल्ल इन घाई आय जो आराम माळोर साटी मींगतद. अदिक याऊ ईट हिम्मतवाळा हैलेच कि अदरी छेळस्यान.

¹⁰ यागासताका शीलो बराल्द आगासताका ना रा यहूदा से राजदण्ड बिट्टीत, ना आऊन वंश से व्यवस्था कोळावाळा अलग आदान; अदिक राज्य राज्य अन लॉकुर आऊंद अधीन आगेदार.

¹¹ आव तान गधा अक अंगुर इन बेली इक कटतान, आव तान गधा अन पाड्डा अक सबसे वळ्लीद अंगुर इन बेली इक कटतान, आव तान कपळागोळी ओगोर साटी सबसे वळ्लीद अंगुर इन रास्सा अन उपयोग माळतान.

¹² आऊन कण्ण अंगुर इन रास्सा अन्द घाई क्याच्यान ईरताव. आऊन हल्ल हाल इन घाई बिळेव आव.”

¹³ “जबूलून समुद्र अन हाती ईत्तान, ईऊंद समुद्री तट ड्वांगागोळ साटी सुरक्षित ईत्तीत, ईऊंद प्रदेश सीदोन ताका फैलुसकु ईत्तीत.”

¹⁴ “इस्साकार आ गधा अन घाई आन याव हापाळ कठोर क्याल्सा माळ्यान, आव भारी बोझ आळका कारण पस्त बिदान.

¹⁵ आव नोळ्यान कि आऊन आराम इन जागा वळ्लीद आद, तथा ईद कि आऊन जमीन सुहाबनी आद. आग आव भारी बोझ नेगुली तैयार ईत्तान. आव दास इन रूप दा क्याल्सा माळोद स्वीकार माळ्यान.”

¹⁶ “दान तान लॉकुर्द न्याय हांगा माळ्यान ह्यांग इस्त्राएल उन अन्य परिवार माळतार.

¹⁷ दान हादी माकळोद ऊंद हाव, अदिक हादी माकळोद ऊंद नाग ईत्तीत, जो घ्वाळा अन्द नली इक डंसुसताद, अदुर देल अदुर सवार पछाळ तिनकु हिंद बिदोगतान.”

¹⁸ “हे यहोवा, ना उद्धार इन हादी कायेतीन.”

¹⁹ “डाकुगोळ्द ऊंद गिरोह गाद मा आक्रमण माळीत, लेकीन गाद आंदरी बडुकु तुकाळसीत.”

²⁰ “आशेर द्याश इन जमीन हापाळ वळ्लीद उपज कोट्टीत. आऊक अल्या भोजन सिक्‍कीत जो राजागोळ साटी उपयुक्त आदीत.”

²¹ “नप्ताली स्वतन्त्र वळावाळा हिरण इन घाई आद अदिक आऊन बोली अऊर्द सुन्दर चिकोर घाई आद.”

²² “यूसुफ हापाळ सफल आन, यूसुफ कयगोळ देल हतकु अंगुर इन बेली इन घाई आन, आव सोता अन हाती हतदव अंगुर इन बेली इन घाई आन, बाडा अन सहारा उग्सद अंगुर इन बेली इन घाई आन.

²³ हापाळ सा लॉकुर आऊन विरूद्‍ध आदुर अदिक आऊन से लळुसदुर, धर्नुधारी लॉकुर आऊक पंसद माळालुर.

²⁴ लेकीन आव तान ताकतवर बाण अदिक कुशल भुजागोळ देल युध्द जिक्सदुन, आव याकूब उन ताकतवर परमेश्वर चरवाह, इस्त्राएल इन चट्टान देल शक्ति सिकतद.

²⁵ ईद नान आप्प आ ईश्वर उन क्याल्सा हुन, जो नीन सहायता माळ्यान, आ सर्वशक्तिमान उन जो नीनी म्याकुच टु आशीर्वादगोळी, अदिक ल्यालमा टु गयरा नीर दा टु आशीर्वाद, अदिक माल्लागोळ्द अदिक गर्भगोळ्द आशीर्वाद कोट्टान.”

²⁶ नान मोय आप्प उन हापाळ सा वळ्लेव चीजगोळ आगतेला ईत्तव अदिक नीम आप्प से नानी अदिक येक्‍कुल आशीर्वाद सिक्त, नीम वार्टुर नानी मारोद चाहासदुर, लेकीन ईग नीमी ऊंद धोळ्द पर्वत इन घाई, नान सप्पा आशीर्वाद इन ढग सिक्‍कीत.

²⁷ “बिन्यामीन ऊंद हिंग हस्तकु भेड़ीया अन घाई आन जो व्हातर्या कोनतद अदिक अदरी तीनतद, द्यावगा ईद मिग्द माग्द देल क्याल्सा नळ्सतद.”

²⁸ इस्त्राएल उन हन्नेळ परिवार ईवा हु अदिक आंदुर आप्प याता याता वचन देल आंदरी आशीर्वाद कोट्टुन, आंदुर ईंदुर उर; ऊंद ऊंद इक आशीर्वाद इन अनुसार आव आशीर्वाद कोट्टुन.

²⁹ आग आव आंदरी ईद अनकु आग्या कोट्टुन, “याग ना सायाईन रा ना तान लॉकुर बीच दा ईरोद चाहसतीन, ना तान पुर्वजगोळ सांगुळ हित्ती एप्रोन इन केईगोळ गुफा दा नळ्सकु आगोद चाहसतीन.

³⁰ मतलब अदा गुफा दा जो कनान द्याश दा मम्रे अन मुंदळोद मकपेला अन जमीन दा आद; आ जमीन इक अब्राहम हित्ती एप्रोन उन कय देल इदुरसाटी कोडींदुन, कि अद कब्रस्तान साटी आऊन खुद इन जमीन आगुल.

³¹ अल अब्राहम अदिक आऊन हिंग्स सारा अक मुण्ण कोटकु आगीत, अदिक अल्या इसहाक अदिक आऊन हिंग्स रिबका अक भी मुण्ण कोटकु आत; अदिक अल्या ना लियाह अक भी मुण्ण कोट्टीन.”

³² अद जमीन अदिक अदुर दाकळोद गुफा हित्‍तीगोळ हात्ती टु कोडंकु आगीत.

³³ याकूब याग तान पारगोळी ईद आग्या कोट्टुन, आग तान काल व्हर्स मा नेगुकु जीव बिट्टुन, अदिक तान लॉकुर दा होगकु मीलुसदुन.