इब्रानिगोळ 5

¹ हर ऊंद महायाजक मंळसागोळ दा टु अच निवळुस्कु आगतान, अदिक लॉकुर्द प्रतिनिधीत्व माळोर साटी परमेश्वर इन स्यावा साटी नियुक्ती माळकु आगतद ताकी आव पापगोळ साटी भेंट अदिक बलिदान येर्सुल.

² यतिकी खुद भी हापाळ रीति देल कमजोरी इन हात्‍ती आन इदुरसाटी आव अग्यानीगोळ अदिक भुला भटका लॉकुर सांगुळ कोमलता देल व्यवहार माळ सकतान.

³ इदुरसाटी आऊक पायजे कि ह्यांग लॉकुर साटी हांग अच तान साटी भी पाप-बली येरसुल.

⁴ ईद मुख्य याजक आदर इन पद याऊ तान तान इक निवळुस्कु ताकोमालुन, याग कि हारून उन घाई परमेश्वर उन दी टु ठहरूसकु आगालुन.

⁵ हांग अच मसीह भी महायाजक आगोद आदर तांदुर देल ग्रहण माळीदील, बल्‍की परमेश्वर आऊन से अंदुन “नी नान पार हुय, अदिक ईंद ना नीन आप्प बनसीन.”

⁶ ईदा प्रकार आव दुसरा जागा दा भी अनतान, “नी मलिकिसिदक इन रीति मा हमेशा साटी याजक आय.”

⁷ यीशु तान शरीर दा ईरोद दिनगोळ दा धोळ्द शब्द दा वर्ल-वर्लकु अदिक कण्ण इन नीर वाहुसकु आऊन से जो आऊक मृत्यु देल ऊळ्स सकोन, प्रार्थना अदिक विनती माळदुन, भक्ति अदिक नम्रता अन कारण परमेश्वर आऊन केळदुन.

⁸ लेकीन अगर आव परमेश्वर उन ईरोन तरी भी दुखगोळ झेल्सतेला आव आग्या अन पालन माळोद कलतुन.

⁹ अदिक सिद्ध बन्सदुर मा, तान सप्पा आग्या मानसावाळेर साटी अनन्त काल इन उद्धार इन स्त्रोत बन्सेदुन,

¹⁰ अदिक आ परमेश्वर उन दी टु मलिकिसिदक इन रीति मा महायाजक बनस्कु आदुन.

¹¹ इदुर बारा दा नामी हापाळ सा मातगोळ माताळोव आव, लेकीन यऊर्द वर्णन माळोद कठिन आद, यतिकी नीव सम्सदुर दा हापाळ धीरा आईर.

¹² वास्तव दा ई समय ताका रा नीमी शिक्षक आगेगोद हुन, तरी भी ईद जरूरी आगेग्याद कि यावारा नीमी परमेश्वर उन वचनगोळ्द शिक्षा सुरूवात टु मात्‍त कलसुल. नीव रा हिंग आगेदीर कि नीमी ठोस भोजन इन बदला ईग भी हाल अच पायजे.

¹³ यतिकी जो हाल कुडुतान आव चिग्द अच आन अदिक आऊक सही गलत इन येनु अनुभव ईराल.

¹⁴ लेकीन ठोस भोजन स्याणागोळ साटी आद, आव याव तान अनुभव देल वळ्लीद अदिक बुरा अन्द ग्यान माळोद कलतोग्यान.