याकूब 5

¹ हे अमीरगोळा, केळ रा कोमी, नीव तान बरावाळा विपत्‍तीगोळ मा वर्ली अदिक ऊँचा स्वर देल विलाप माळी.

² नीम धन हुळतोग्याद अदिक नीम फळक्यागोळी उदई हत्‍तेग्याद.

³ नीम व्हान्ना-बेळ्ली दा जंग हत्‍तेग्याद; अदिक अद जंग नीम मा गवाही कोट्टीत, अदिक बेक्‍की घाई नीम मास तिंद बुट्टीत. नीव आखरी दुनिया दा धन जमा माळीर.

⁴ नोळी, याता क्याल्सावाळेर नीम केई दा मजदूरी माळदुर, आंदुर्द अद मजदूरी जो नीव ध्वाका कोटकु ईट बुट्टीर किटरेत्याद, अदिक कडावाळेर्द आक्रोश सर्वशक्तिमान प्रभु उन किव ताका ओळेग्याद.

⁵ नीव पृथ्वी मा भोग-विलास दा हतकु ईत्‍तीर अदिक हापाळ सुख भोग्सदिर; नीव ई वध इन दिन इन साटी तान मन इंद पालन-पोषण माळकु खुद इक मोटा-तरोताजा माळदीर.

⁶ नीव न्यायी मंळसा अक दोषी ठहरूसकु कोंद बुट्टीर, आव नीम सामना ईला माळायदुन.

⁷ इदुरसाटी हे वार्टुरा अदिक आकतींगेरा, प्रभु उन आगमन ताका धीरज ईटी. नोळी, किसान पृथ्वी इन किमती फसल इन आशा ईटतेला पयला अदिक आखरी माळ बिळास ताका धीरज ईटतान.

⁸ नीव भी धीरज ईटी; अदिक तान आशा अक माळकु ईटी, यतिकी प्रभु उन आगमन हात्‍ती होट बंदाद.

⁹ हे वार्टुरा अदिक आकतींगेरा, आबुर दाबुर प्रती सिकायत माळबाळी ताकी परमेश्वर नीम न्याय माळबाळुल; नोळी, न्यायाधीश प्रगट आगदुर मा आन.

¹⁰ हे वार्टुरा अदिक आकतींगेरा, याता भविष्यवक्तागोळ प्रभु उन हेसुर देल मात माळदुर, आंदरी दुख नेगोद समय आंदुर धैर्य अक ऊंद आदर्श समसी.

¹¹ नोळी, नाव आ भविष्यवक्तागोळी यार धीरज ईटदुर धन्य अनतेव. नीव अय्यूब उन धीरज इन बारा दा रा केळदीर अच, अदिक प्रभु उन दी टु जो अदुर्द प्रतिफल आत अदरी भी अर्त कोंडीर, यदुर देल प्रभु उन यक्कुल करूणा अदिक दया प्रगट आगतद.

¹² लेकीन हे नान वार्टुरा अदिक आकतींगेरा, सब से धोळ मात ईद आद कि किर्‍या ईला तिनोद, ना आकाश इन, ना धरती इन, ना यातोवारा दुसरा चिज इन; लेकीन नीम मातकात हव इन हव, अदिक ईला अन्द ईला ईरूल, कि परमेश्वर उन न्याय नीम मा बरबाळुल.

¹³ अगर नीम दा यावारा विपत्‍ती दा बिदान? रा आंदरी प्रार्थना माळ पायजे. येन नीम दा यावारा खुश आन? रा आंदरी स्तुति अन्द भजन हाळ पायजे.

¹⁴ येन नीम दा यावारा रोगी आन? रा आंदरी पायजे कि मंडली इन स्याणा गवाहगोळी कारूल, कि आंदुर आंदुर साटी प्रार्थना माळुल अदिक आंदुर मा प्रभु उन हेसुर देल जैतून इन याण्णा हचुल.

¹⁵ अदिक विश्वास इन प्रार्थना अन्द द्वारा रोगी ऊळस्यान अदिक प्रभु आऊक मात्‍त स्वस्थ मय प्रदान माळ्यान; अदिक अगर आव पाप भी माळीदान, रा अव भी माफ आगेदव.

¹⁶ इदुरसाटी नीव आपस दा आबुर दाबुर मुंद तान-तान पापगोळी मान्स कोमी, अदिक आबुर दाबुर साटी प्रार्थना माळी, यदुर देल चंगा आगेगी: न्यायी जन इन प्रार्थना प्रभावशाली अदिक परिणाम कारक आगतद.

¹⁷ एलिय्याह भी रा नाम घाई दुख-सुख भोगसावाळा मंळसा ईरोन; अदिक आव गिळगिळास्कु प्रार्थना माळदुन कि माळ बरबाळुल; अदिक साढ़े मुर वर्ष ताका पृथ्वी मा माळ बंदिदील.

¹⁸ बाक आव प्रार्थना माळदुन, रा आकाश टु माळ बत्‍त, अदिक पृथ्वी फलवन्त आत्‍त.

¹⁹ हे नान वार्टुरा, अगर नीम दा टु यावारा सत्य अन हादी टु भटकुस्यान अदिक यावारा आऊक हादी मा तरूल,

²⁰ रा आव ईद जान्स कोमुल कि जो यावारा यातोदारा भटकुस्त पापी इक हादी मा तंदान, आव ऊंद जीव इक सोत्‍तुर देल ऊळस्यान अदिक अनेक पापगोळ मा परदा हाक्यान.