यूहन्ना 9

¹ होगाहोती यीशु ऊंद मंळसा अक नोळदुन जो जनम टु कुढ्ढ ईरोन.

² आऊन चेलागोळ आऊन से केळदुर, “हे गुरु, याव पाप माळीदुन कि ईव कुढ्ढ पैदा आदुन, ई मंळसा या ईऊन मोय या ईऊन आप्प?”

³ यीशु उत्‍तर कोट्टुन, “ना रा ईव पाप माळीदुन, ना ईऊन मोय ना आप्प; लेकीन ईद इदुरसाटी आत कि परमेश्वर उन क्याल्सा आऊन मा प्रगट आगुल.

⁴ याव नानी कळ्यान, नामी आऊन क्याल्सा हागुल ईरतेला अच माळोद जरूरी आद; अद ईळ्लक बरोद आद यदुर्दा याऊ क्याल्सा माळ सकतीदिल.

⁵ यागासताका ना दुनिया दा आईन, आगासताका दुनिया अन ज्योति आईन.”

⁶ ईद अनकु आव जागा मा ऊगुळदुन, अदिक आ ऊगळा देल मुण्ण इक काल्सदुन, अदिक अद मुण्ण आ कुढ्ढ उन कण्णगोळ मा हचकु

⁷ आऊन से अंदुन, “होग, शीलोह अन कुण्ड दा तोळकोम” आव होगकु तोळदुन, अदिक नोळतेला वापस बंदुन.

⁸ आग आऊन बाजुवाळेर अदिक यार पयले आऊक भीख बेळतेला नोळीदुर, अनली कुरतुर, “येन ईव आवा आल्लच, जो कुर्तकु भीख बेळतोगोन?”

⁹ येनारा लॉकुर अंदुर, “ईव आवा हुन,” दुसरागोळ अंदुर, “ईला, लेकीन आऊन घाई आन.” आव अंदुन, “ना आवा हुईन.”

¹⁰ आग आंदुर आऊन से केळली कुरतुर, “नीन कण्णगोळ ह्यांग खुलसेदव?”

¹¹ आव उत्‍तर कोट्टुन, “यीशु हेसुर इन ऊंद मंळसा मुण्ण काल्सदुन, अदिक नान कण्णगोळ मा हचकु नान से अंदुन, ‘शीलोह दा होगकु तोळकोम,’ इदुरसाटी ना होदीन अदिक तोळदिन अदिक नोळली कुरतीन.”

¹² आंदुर आऊन से केळदुर, “आव यल आन?” आव अंदुन, “ना जान्सालीन.”

¹³ लॉकुर आऊक जो पयले कुढ्ढ ईरोन फरीसीगोळ हात्‍ती ओतुर.

¹⁴ याता दिशी यीशु मुण्ण काल्सकु आऊन कण्णगोळी तेरदीदुन, अद आराम इन दिन ईरोद.

¹⁵ बाक फरीसीगोळ भी आऊन से केळदुर कि आऊन कण्णगोळ याता रीति देल खुलसेदव. आव आंदुर से अंदुन, “आव नान कण्णगोळ मा मुण्ण हचदुन, बाक ना तोळु कोंडीन, अदिक ईग ना नोळ सकतीन.”

¹⁶ इदुर मा येनारा फरीसी अनली कुरतुर, “ई मंळसा परमेश्वर उन दी टु आल्लच, यतिकी आव आराम इन दिन मानसालुन.” दुसरागोळ अंदुर, “पापी मंळसा हिंग चमत्कार ह्यांग तोर्स सकतान?” इदुरसाटी आंदुर दा फूट बिदोत.

¹⁷ आंदुर आ कुढ्ढ मंळसा से मात्‍त अंदुर, “आव नीन कण्णगोळी खोलस्यान. नी आऊन बारा दा येन अनत्या?” आव अंदुन, “आव भविष्यवक्ता आन.”

¹⁸ लेकीन यहूदीगोळी विश्वास आगीदील कि आव कुढ्ढ ईरोन अदिक ईग नोळतान, यागासताका आंदुर आऊन, यार्द कण्णगोळ खुलसेगीदव, आऊन मोय-आप्प उक कारूकु

¹⁹ आंदुर से केळीदील, “येन ईव नीम पार हुन, यारी नीव अनतीर कि कुढ्ढ पैदा आगीदुन? बाक ईग ह्यांग नोळतान?”

²⁰ आऊन मोय-आप्प उत्‍तर कोट्टुर, “नाव रा जान्सतेव कि ईव नाम पार हुन, अदिक कुढ्ढ पैदा आगीदुन:

²¹ लेकीन नाव ईद जानसालेव कि ईग ह्यांग नोळतान, अदिक ना ईद जान्सतेव कि याव आऊन कण्णगोळी तेरदुन. आव स्याणा आन, आऊन से अच केळ कोमी: आव तान बारा दा खुद अंद बुटान.”

²² ई मातगोळी आऊन मोय आप्प इदुरसाटी अंदुर यतिकी आंदुर यहूदीगोळ से अंजोर, यतिकी यहूदी ऊंद मत आगेगीदुर कि अगर यावारा अंदान कि आव मसीह हुन, रा आव सभागृह टु तेगुकु आदान.

²³ ईदा कारण आऊन मोय आप्प अंदुर, “आव स्याणा आन, आऊन से अच केळ कोमी.”

²⁴ आग आंदुर आ मंळसा अक जो कुढ्ढ ईरोन, दुसरा घन कारूकु आऊन से अंदुर, “परमेश्वर उन स्तुती माळ. नाव रा जान्सतेव कि आ मंळसा पापी आन.”

²⁵ आव उत्‍तर कोट्टुन, “ना जानसालीन कि आव पापी आन या हैलेच; ना ऊंद मात जान्सतीन कि ना पयले कुढ्ढ ईरीन अदिक ईग नोळतीन.”

²⁶ आंदुर आऊन से मात्‍त अंदुर, “आव नीन सांगुळ येन माळदुन? अदिक याता प्रकार देल नीन कण्णगोळी खोल्सदुन?”

²⁷ आव आंदुर से अंदुन, “ना रा नीम से अंद कोंडीन, अदिक नीव केळीदील; ईग दुसरा घन येती केळोद चाहासतीर? येन नीव भी आऊन चेला बनसोद चाहासतीर?”

²⁸ आग आंदुर आऊक बुरा भला अनली कुरतुर, “नी अच आऊन चेला आय, नाव रा मूसा अन चेला हुयेव.

²⁹ नाव जान्सतेव कि परमेश्वर मूसा से मातगोळी हेळदुन; लेकीन ई मंळसा अक जानसालेव कि येलेव हुन.”

³⁰ आव आंदरी उत्‍तर कोट्टुन, “ईद रा आश्चर्य अन मात आद कि नीव जानसालीर कि आव येलेव हुन, लेकीन आव नान कण्णगोळी खोल्स बुटुन.

³¹ नाव जान्सतेव कि परमेश्वर पापीगोळ्द केळालुन, लेकीन अगर यावारा परमेश्वर उन भक्त आन अदिक आऊन इच्छा मा नळुतान, रा आव आऊन केळतान.

³² दुनिया अन सुरूवात देल ईद यागलु केळदुर दा बंदिदील कि यावारा जनम इन कुढ्ढ उन कण्णगोळी खोल्सदुन.

³³ अगर ईव मंळसा परमेश्वर उन दी टु ईला ईरायदुन, रा येनु भी ईला माळ सकायदुन.”

³⁴ आंदुर आऊक उत्‍तर कोट्टुर, “नी रा बिलकुल पापगोळ दा पैदा आग्या, नी नामी येन कल्सत्या?” अदिक आंदुर आऊक व्हार्या तेग्द बुटुर.

³⁵ यीशु केळदुन कि आंदुर आऊक व्हार्या तेग्द बुटुर, अदिक याग आऊन से भेंट आत रा अंदुन, “येन नी परमेश्वर उन पार उन मा विश्वास माळत्या?”

³⁶ आव उत्‍तर कोट्टुन, “हे प्रभु, आव याव हुन, कि ना आऊन मा विश्वास माळाईन?”

³⁷ यीशु आऊन से अंदुन, “नी आऊक नोळ्या, अदिक जो नीन सांगुळ मातगोळी हेळेत्यान आव आवा हुन.”

³⁸ आव अंदुन, “हे प्रभु, ना नीन मा विश्वास माळतीन.” अदिक आऊक बांगकु प्रणाम माळदुन.

³⁹ आग यीशु अंदुन, “ना ई दुनिया दा न्याय इन साटी बंदीन, ताकी जो नोळालुर आंदुर नोळुल, अदिक जो नोळतार आंदुर कुढ्ढ आगेगुल.”

⁴⁰ जो फरीसी आऊन सांगुळ ईरोर आंदुर आऊन ई मातगोळी केळकु आऊन से अंदुर, “येन नाव भी कुढ्ढ आयेव?”

⁴¹ यीशु आंदुर से अंदुन, “अगर नीव कुढ्ढ ईरायदीर रा पापी ईला ठहरूसायदीर; लेकीन ईग अनतीर कि नाव नोळतेव, इदुरसाटी नीम दा पाप बन्सकु ईरतद.