योना 4

¹ ईद मात योना अक हापाळ अच बेकार हत, अदिक आऊक सिट्ट बत्त.

² आव प्रभु से प्रार्थना माळदुन. आव अंदुन, “‘हे यहोवा, नान नीन से ईद प्रार्थना आद: याग ना तान द्याश दा ईरीन, आग ना नीन से ईदा रा अंदीदिन? ईग रा अदा मात आत. ईदा कारण ना तुरंत तर्शीश नगर इक ओळीदिन. ना जानसीन कि नी कृपालु अदिक दयालु परमेश्वर आय. नी देरी देल गुस्सा माळावाळा अदिक करूणा अन्द सागर आय. नी दुख हाक्कोद तान निर्णय इक भी बदलुसत्या.

³ इदुरसाटी ईग ना नीन से ईद विनती माळतीन: हे यहोवा, नी नान जीव नान से ताकोम कोम. नान साटी जीत्ता ईरोर से वळ्लीद सायोद आद.’

⁴ यहोवा अंदुन, ‘येन नीन ईद सिट्ट माळोद उचित आद?’”

⁵ आग योना नगर टु व्हार्या होट्टुन. आव नगर इन पूर्व दा ईरली कुरतुन. आव तान ताल्ला मा ऊंद छपर्या हाकदुन. आव छपर्या अन सावली दा कुर्तोदुन अदिक नोळली कुरतुन कि नगर इन ईग येन आदीत?

⁶ प्रभु परमेश्वर योना अन्द ताल्ला अन्द म्याकुच येरंडी इन ऊंद मार्र बेळ्सदुन कि अद योना अन्द ताल्ला मा सावली माळुल अदिक आऊक आराम कोळ सकुल. योना ई मार्र इक नोळकु हापाळ खुश आदुन.

⁷ दुसरा दिशी याग व्हातुर आत, आग परमेश्वर ऊंद किळा अक कळुदुन. कीळा येरंडी इन मार्र इक कच्त अदिक येरंडी इन मार्र वंळ्गेत.

⁸ याग सूर्य होळ्त आग परमेश्वर पूर्व दिशा टु गरम हवा वाहुसदुन. योना अन्द ताल्ला मा सूरज इन किरणगोळ बिद्दव अदिक आव मुर्छित आगली हतदुन; योना मृत्यु इन इच्छा माळली कुरतुन. आव अंदुन, “नान साटी जीत्ता ईरोर से सायोद वळ्लीद आद.”

⁹ आग परमेश्वर योना से केळदुन, “येन ईद उचित आद कि नी येरंडी इन मार्र इन कारण नाराज आय?” योना उत्तर कोट्टुन, “हव वळ्लीद आद, ईदुर देल नान जीव भी होदीत तरी भी नळदीत.”

¹⁰ प्रभु आऊक उत्तर कोट्टुन, “नी आ येरंडी इन मार्र इन साटी येती दुखी आय, यार साटी नी यातोदु मयनत माळीदिल. नी अदरी हचीदिल अदिक वाळुसीदिल; अद ऊंद ईळ्लकी बेळुत अदिक दुसरा ईळ्लक दा नष्ट आगेत.

¹¹ ई महानगर नीनवे दा ऊंद लाख ईप्पत हजार से येक्कुल मंळसा आर, जो तान ऊजवा डाक्या कय इन भी अंतर अरालुर. इदुर अलावा निर्दोष पशु भी आव. आग येन नानी ई महानगर इन साटी दया ईला माळ पायजे?”