यहोशू 14

¹ जो-जो भाग इस्त्राएलगोळ कनान द्याश दा नोळदुर, आंदरी एलीआजर याजक, अदिक नून उन पार यहोशू, अदिक इस्त्राएली गोत्रगोळ पुर्वज इन घराना अन मुख्य मुख्य मंळसागोळ आंदरी कोट्टुर आंदुर ईंदुर उर.

² जो आग्या यहोवा मूसा अन द्वारा साळे ऊंम्बत गोत्रगोळ साटी कोटीदुन, अदुर अनुसार आंदुर हिस्सा चिट्टी हाक्कु कोटकु आदव.

³ मूसा रा येढ्ढवार गोत्रगोळ हिस्सा यरदन इन आप्पाटी कोटीदुन; लेकीन लेवीगोळी आव आंदरी येनु भाग कोटीदील.

⁴ यूसुफ उन वंश इन रा येढ्ढ गोत्र आगीदव, मतलब मनश्शे अदिक एप्रैम; अदिक आ द्याश दा लेवीगोळी येनु भाग कोटकु आगीदील, सिर्फ ईरव नगर, अदिक जनावर अदिक धन ईटोरसाटी चराईगोळ आंदरी सिकदव.

⁵ जो आग्या यहोवा मूसा अक कोटीदुन अदुर अनुसार इस्त्राएलगोळ माळदुर; अदिक आंदुर द्याश इक वाट्स बुट्टुर.

⁶ आग यहूदा यहोशू उन हाती गिलगाल दा बंदुन; अदिक कनजी यपुन्ने उन पार कालेब आऊन से अंदुन, “नी जान्सतीद्या कि यहोवा कादेशबर्ने दा परमेश्वर उन जन मूसा से नान अदिक नीन बारा दा येन अंदीदुन.

⁷ याग यहोवा अन दास मूसा नानी ई द्याश इन भेद ताकोमोर साटी कादेशबर्ने टु कळीदुन आग ना चालीस वर्ष इनव ईरीन; अदिक सच्चा मन देल आऊन हाती बातणी तंदीन.

⁸ अदिक नान साथी जो नान सांगुळ बंदीदुर आंदुर रा प्रजा अन लॉकुर्द मन निराश माळ बुट्टुर, लेकीन ना तान परमेश्वर यहोवा अन पुरा रीति देल मात मान्सदीन.

⁹ आग आ दिशी मूसा किर्‍या तीनकु पुरा रीति देल ‘नान परमेश्वर उन मातगोळ्द अनुकरण माळ्यान, ईद कारण नि:सन्देह याता जमीन मा नी तान काल मंळस्या अद सदा साटी नीन अदिक नीन वंश इन हिस्सा आदीत.’

¹⁰ अदिक ईग नोळ, यागुटु यहोवा मूसा से ईद वचन अंदीदुन आग टु पैतालीस वर्ष आगेग्याव, यदुर दा इस्त्राएलगोळ आळी दा वयाळतेला ईत्तुर; आंदुर दा यहोवा तान अनोद अनुसार नानी जीत्ता ईटदुन; अदिक ईग ना पच्यासी वर्ष ईनव आईन.

¹¹ याट ताकत मूसा अन कळोद समय दा नान दा ईरोद आटा ताकत ईग भी नान दा आद; युद्ध माळोर साटी बुळ्क व्हार्या होगोर बरोर साटी याट आ समय नान दा सामर्थ्य ईरोद आट ईग भी नान दा सामर्थ्य आद.

¹² इदुरसाटी ईग अद पहाळी नानी कोळ यदुर चर्चा यहोवा आ दिशी माळीदुन; नी रा आ दिशी केळीद्या कि अल अनाकी वंश इनोर ईरतार, अदिक धोड्डेव धोड्डेव गढ़वाळा नगर भी आव; लेकीन येन पता सम्भव आद कि यहोवा नान सांगुळ ईत्तान, अदिक आऊन अनोद अनुसार ना आंदरी आंदुर द्याश दा टु तेगु कोमाईन.”

¹³ आग यहोशू आऊक आशीर्वाद कोट्टुन; अदिक हेब्रोन नगर यपुन्ने अन पार कालेब उन भाग माळ बुट्टुन.

¹⁴ ई कारण हेब्रोन नगर कनजी यपुन्ने अन पार कालेब उन बाग ईंद ताका बन्सकु आद, यतिकी आव इस्त्राएल उन परमेश्वर यहोवा अन पुरा रीति देल अनुसरण माळीदुन.

¹⁵ पयले हेब्रोन इन हेसुर किर्यतर्बा ईरोद; आव अर्बा अनाकीगोळ दा सबसे धोड्डेव मंळसा ईरोन. अदिक आ द्याश इक लळाई देल शांती सिक्त.