यहोशू 17

¹ बाक यूसुफ उन धोड्डेव पार मनश्शे अन गोत्र अन भाग चिट्टी हाकदुर देल ईद ठहरूस्त. मनश्शे अन धोड्डेव पार गिलाद उन आप्प माकीर योद्धा ईरोन, ई कारण आऊन वंश इक गिलाद अदिक बाशान प्रदेश कोटकु आत.

² इदुरसाटी ई भाग दुसरा मनश्शे अन चिकोर साटी आंदुर कुलगोळ अनुसार ठहरूस्त, मतलब अबीएजेर, हेलेक, अस्त्रीएल, शेकेम, हेपेर, अदिक शमीदा; जो तान तान कुलगोळ अनुसार यूसुफ उन पार मनश्शे अन वंश दा मंळसा ईरोर, आंदुर अलग अलग वंशगोळ साटी ठहरूस्त.

³ लेकीन हेपेर जो गिलाद उन पार, माकीर उन नातु, अदिक मनश्शे अन पळनातु ईरोन, आऊन पार सलोफाद उन पारगोळ हैलेच, पोरगोळ अच आदुर; अदिक आंदुर हेसुर महला, नोआ, होग्ला, मिल्का, अदिक तिर्सा आद,

⁴ आग आंदुर एलीआजर याजक, नून उन पार यहोशू, अदिक प्रधानगोळ हाती होगकु अनली कुरतुर, “यहोवा मूसा अक आग्या कोटीदुन, कि आव नामी नाम वार्टुर बीच दा नामी भाग कोळुल.” रा यहोशू यहोवा अन आग्या अन अनुसार आंदरी आंदुर काकागोळ बीच भाग कोट्टुन.

⁵ आग मनश्शे अक, यरदन इन आप्पाटी गिलाद द्याश अदिक बाशान इक बिटकु, हत्त हिस्सा मात्त सीकदव:

⁶ यतिकी मनश्शेगोळ बीच मनश्शे अन पोरगोळी भी हिस्सा सीक्त. अदिक दुसरा मनश्शेगोळी गिलाद द्याश सिक्त.

⁷ मनश्शे अन सीमा आशेर टु हुडुकु मिकमतात ताका पोहचुस्त, जो शकेम उन मुंद आद; बाक आव दक्षिण इन दी वाळुस्कु एनतप्पूह अन निवासिगोळ ताका पोहचुस्त.

⁸ तप्पूह अन जमीन रा मनश्शे अक सिक्त, लेकीन तप्पूह नगर जो मनश्शे अन सीमा मा बसुस्कु आद अद एप्रैमिगोळ्द ठहरूस्त.

⁹ बाक अल टु अद सीमा काना अन नाला ताका ईळुकु अदुर दक्षिण इन ताका पोहचुस्त; ईव नगर मनश्शे अन नगरगोळ बीच दा ईरव तरी भी एप्रैम इन ठहरूसदव; अदिक मनश्शे अन सीमा आ नाला अन उत्तर दी टु होगकु समुद्र मा होळ्त;

¹⁰ दक्षिण इन दीकळोद द्याश रा एप्रैम उक अदिक उत्तर इन दीकळोद मनश्शे अक सिक्त, अदिक आऊन सीमा समुद्री ठहरूस्त; अदिक आंदुर उत्तर दी आशेर टु अदिक पूर्व दी इस्साकार टु होगकु सिक्त.

¹¹ अदिक मनश्शे अक, इस्साकार अदिक आशेर तान तान नगरगोळ सांगुळ बेतशान, यिबलाम, अदिक तान नगरगोळ सांगुळ दोर निवासी, अदिक तान नगरगोळ सांगुळ एनदोर इन निवासी, अदिक तान नगरगोळ सांगुळ तानाक इन निवासी, अदिक तान नगरगोळ सांगुळ मगिद्दो अन निवासी, ईव मुरू जो ऊँचा जागा मा बसुस्कु आव सिकदव.

¹² लेकीन मनश्शेई आ नगरगोळ निवासीगोळी अल टु तेगु सकीदील; इदुरसाटी आंदुर कनानी आ द्याश दा जबरदस्ती बसुस्कु ईत्तुर.

¹³ तरी भी याग इस्त्राएली सामर्थी आगेदुर, आग कनानीगोळ से बेगारी रा माळसुसली कुरतुर, लेकीन आंदरी पुरा रीति देल तेगुकु व्हार्या माळीदिल.

¹⁴ यूसुफ उन सन्तान यहोशू से अनली कुर्त, “नाव रा गिनती दा हापाळ आयेव, यतिकी ईगासताका यहोवा नामी आशीष अच कोळतेला बंदान, बाक नी नाम भाग इन साटी चिट्टी हाक्कु यती ऊंदा हिस्सा ईट्या?”

¹⁵ यहोशू आंदुर से अंदुन, “अगर नीव गिनती दा हापाळ आईर, अदिक एप्रैम इन पहाळी द्याश नीम साटी स्यांळ्द आगुल, जो परिज्जीगोळ अदिक रपाईगोळ अन द्याश जो आळी दा आद, अल होगकु मार्रगोळी कळ्द बुळी.”

¹⁶ यूसुफ उन सन्तान अंदुन, “अद पहाळी द्याश नाम साटी स्यांळ्द आद; अदिक बेतशान अदिक यिज्रेल इन तराई दा ईरावाळेर, यास कनानी लॉकुर जो ल्यालमागोळ द्याश दा ईरतार, आ सप्पा मुंदुर हाती लोहानव रथगोळ आव.”

¹⁷ बाक यहोशू, येन एप्रैमी येन मनश्शेई, मतलब यूसुफ उन सप्पा घराना से अंदुन, “हव, नीव लॉकुर गिनती दा हापाळ आईर, अदिक निम्द सामर्थ्य भी धोळ्द आद, इदुरसाटी नीमी ऊंदा भाग सिकतीदील;

¹⁸ पहाळी द्याश भी नीम्द आगेदीत; यतिकी अद आळी रा आद, लेकीन अदुरव मार्र कडुकोमी , आग अदुर आस पास इन द्याश भी नीम्द आगेदीत; यतिकी बाक कनानी सामर्थी आगुल, अदिक आंदुर हाती लोहानव रथ भी आव, तरी भी नीव आंदरी अल टु तेगु सकीर.”