यहोशू 3

¹ यहोशू व्हातर्या येद्दुन, अदिक इस्त्राएल इन सप्पा लॉकुर यद्दुर अदिक शित्तिम इक आंदुर बिट्ट बुट्टुर. आंदुर यरदन गांगा ताका यात्रा माळदुर. आंदुर आप्पाटी होगोर से पयले यरदन गांगा मा ड्यारा हचदुर.

² अदिक मुर दिन इन बाद्दा स्याणागोळ छावनी इन बीच होगकु

³ प्रजा अन लॉकुरी ईद आग्या कोट्टुर, “याग नीमी तान परमेश्वर यहोवा अन वाचा अन सन्दुक अदिक आ लेवी याजक जो अदरी नेगुकु काणस्यान, आग तान जागा मा टु यदकु आऊन हींद हींद नळेतीर,

⁴ लेकीन आऊन अदिक नीम बीच दा येढ्ढ हजार कय ईट अन्तर ईरूल; नीव सन्दुक इन हाती होगबाळेतीर. ताकी नीव नोळ सकीर, कि याता हादी टु नीमी नळोद आद, यतिकी ईगासताका नीव ई हादी मा आगकु नळदिदील.”

⁵ बाक यहोशू इस्त्राएली लॉकुर से अंदुन, “नीव तान तान इक पवित्र माळी; यतिकी नाळ इन दिशी यहोवा नीम बीच दा आश्चर्यकर्म माळ्यान.”

⁶ आग यहोशू याजकगोळ से अंदुन, “वाचा अन सन्दुक नेगुकु लॉकुर्द मुंद मुंद नळी.” आग आंदुर वाचा अन सन्दुक नेगुकु मुंद मुंद नळदुर.

⁷ आग यहोवा यहोशू से अंदुन, “ईंद इन दिन टु ना सप्पा इस्त्राएलगोळ हाती नींद प्रशंसा माळोद चालु माळाईन, यदुर देल आंदुर जानसुल कि ह्यांग ना मूसा अन सांगुळ ईरतोगीन हांग अच ना नीन सांगुळ भी आईन.

⁸ अदिक नी वाचा अन सन्दुक इक नेगावाळेर याजकगोळी ईद आग्या कोळ, ‘याग नीव यरदन इन नीर इन किनारा मा पोहचुसीर, आग यरदन दा नीदुरकु ईरेतीर.’”

⁹ आग यहोशू इस्त्राएली लॉकुर से अंदुन, “हाती बंदकु तान परमेश्वर यहोवा अन वचन केळी.”

¹⁰ अदिक यहोशू अनली कुरतुन, “ईदुर देल नीव जान्स कोंडीर कि जीत्ता परमेश्वर नीम बीच दा आन, अदिक आव नीम मुंदु टु नि:सन्देह कनानीगोळी, हित्तीगोळी, हिब्बीगोळी, परिज्जीगोळी, गिर्गाशीगोळी, एमोरिगोळी, अदिक यबूसीगोळी आंदुर द्याश दा टु तेगु बुट्टान.

¹¹ केळी, सप्पा पृथ्वी नोर प्रभु अन वाचा अन सन्दुक नीम मुंद मुंद यरदन दा होगदुर मा आद.

¹² इदुरसाटी ईग इस्त्राएल इन गोत्रगोळ दा टु हन्नेळ मंळसागोळी नीवळुसी, आंदुर ऊंद ऊंद गोत्र दा टु ऊंद मंळसा ईरूल.

¹³ अदिक याता समय दा पृथ्वी दाकळोर प्रभु यहोवा अन वाचा अन सन्दुक नेगावाळेर याजकगोळ काल यरदन गांगा अन नीर दा बिद्दव, आ समय यरदन इन म्याकुच टु वाहुसतेला नीर थामसेदीत, अदिक ढेर आगकु थाम्सकु ईत्तीत.”

¹⁴ इदुरसाटी याग लॉकुर यरदन गांगा अन आप्पाटी होगोर साटी होट्टुर, अदिक याजक वाचा अन सन्दुक नेगुकु लॉकुर मुंद मुंद नळदुर,

¹⁵ अदिक सन्दुक इक नेगावाळेर यरदन मा पोहचुसदुर, अदिक सन्दुक इक नेगावाळेर याजकगोळ काल यरदन तीर इन नीर दा मुळ्कदव, यरदन इन नीर रा कटनी इन समय इन सप्पा दिन तान तट इन म्याकुच म्याकुच वाहुसतेला ईरतद,

¹⁶ आग जो नीर म्याकुच इन दी टु वाहुसकु बरताव अव हापाळ दुर, मतलब आदाम नगर इन हात्ती जो सारतान नगर इन हात्ती रूक्सकु ऊंद ढेर आगेत, अदिक दिवाल घाई येदकु ईत्त, अदिक जो नीर अराबा अन समुद्र जो मृत समुद्र भी कहलुस्तद, अदुर दी वाहुसकु होगोद, अद पुरा रीति देल वंळ्गेत; अदिक प्रजा अन लॉकुर यरीहो अन मुंद आपाटी ईळदोदुर.

¹⁷ अदिक याजक यहोवा अन सन्दुक नेगुकु यरदन इन बीचोबीच होगकु जागा मा स्थिर निदुरकु ईत्तुर, आखरी दा अद सप्पा जाती अन लॉकुर यरदन गांगा अन पार आगेदुर.