लैव्यव्यवस्था 17

¹ बाक यहोवा मूसा से अंदुन,

² “हारून अदिक आऊन पारगोळ से अदिक सप्पा इस्राएलिगोळ से अन कि यहोवा ईद आग्या कोट्टान:

³ इस्राएल इन घराना दा टु यावारा मंळसा ईरूल जो म्यांडा अन्द पाड्डा, या मर्री इक, चाहे छावनी दा चाहे छावनी टु व्हार्या घात माळकु

⁴ भेंटमाळोद तम्बू उन द्वार मा, यहोवा अन्द निवास इन मुंद यहोवा अक येर्सोद निमित्त वोयबाळुल, रा आ मंळसा अक रकत वाहुसोद दोष हत्तीत; अदिक आ मंळसा जो रकत वाहुसावाळा ठहरूस्यान, आव तान लॉकुर न्याड्या टु नष्ट माळकु आदान.

⁵ ई विधी इन ईद कारण आद कि इस्राएली तान बलिदान अवरी आंदुर खुला मैदान दा वध माळतार, आंदुर अवरी भेंटमाळोद तम्बू उन द्वार मा याजक उन हात्ती, यहोवा अन्द हात्ती, यहोवा अन्द साटी वोतकु आऊंदा साटी मेल-मिलाप बलि माळकु बलिदान माळकु आगुल;

⁶ अदिक याजक रकत इक भेंटमाळोद तम्बू उन द्वार मा यहोवा अन्द वेदी इन म्याकुच सिपसुल, अदिक चरबी इक आऊन सुखदायक सुगन्ध इन साटी होताकुल.

⁷ आंदुर जो व्हातगोळ्द पूजक ईतकु व्यभिचार माळतार, आंदुर बाक तान बलि पशुगोळ इक आंदुर साटी बलिदान माळबाळुल. नीम्द पीढ़ीगोळ साटी ईद सदा अन्द विधी आदीत.

⁸ “ नी आंदुर से अन कि इस्राएल इन घराना अन्द लॉकुर दा टु या आंदुर न्याड्या ईरावाळेर परदेशीगोळ दा टु यावारा मंळसा यती ईरबाळुल जो होमबलि या मेलबलि येरसुल,

⁹ अदिक अदरी भेंटमाळोद तम्बू उन द्वार मा यहोवा अन्द साटी येरसोर साटी तरबाळुल; आ मंळसा तान लॉकुर दा टु नष्ट माळकु आदान.

¹⁰ “बाक इस्राएल इन घराना अन्द लॉकुर दा टु या आंदुर न्याड्या ईरावाळेर परदेशीगोळ दा टु यावारा मंळसा यती ईरबाळुल जो यातोदारा प्रकार इन रकत तिनुल, ना आ रकत तिनावाळा अन्द दी टु तान बाय तिर्गुस बुळाईन विमुख अदिक आऊन लॉकुर न्याड्या दा टु नष्ट माळ बुळाईन.

¹¹ यतिकी मय इन जीव रकत दा ईरतद; अदिक अदरी ना नीम लॉकुरी वेदी मा येरसोर साटी कोट्टीन कि नीम्द जीवगोळ साटी प्रायश्चित माळकु आगुल; यतिकी जीव इन साटी रकत टु उच प्रायश्चित आगतद.

¹² ई कारण ना इस्राएलिगोळ से अनतीन कि नीम दा टु यावारा प्राणी रकत तिनबाळुल, अदिक जो परदेशी नीम्द न्याड्या ईरतान आव भी रकत यागलु तिनबाळुल.”

¹³ “इस्राएलिगोळ दा टु या आंदुर न्याड्या ईरावाळेर परदेशीगोळ दा टु, यावारा मंळसा यती ईरबाळुल, जो शिकार माळकु तिनोद योग्य पशु या पक्षी इक हुडुल, आव अऊर रकत इक पलटुस्कु धुळा देल झाक्स बुळुल.

¹⁴ यतिकी मय इन जीव जो आद अद आऊन रकत अच हुंद जो आऊन जीव इन सांगुळ ऊंद आद; इदुरसाटी ना इस्राएलिगोळ से अनतीन कि यातोदु प्रकार इन प्राणी इन रकत इक नीव तिनबाळेतीर, यतिकी सप्पा प्राणीगोळ्द जीव आंदुर रकत अच हुंद; जो यावारा अदरी तिंदान आव नष्ट माळकु आदान.”

¹⁵ “अदिक चाहे अद देशी ईरूल या परदेशी ईरूल, जो यावारा यातोदारा लोथ या हर्दकु पशु उन चिच्ची तिनुल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल; आग आव शुद्ध आदान.

¹⁶ लेकीन अगर आव अवरी ईला तोळदान अदिक मय तोळुतीदिल, रा आऊक तान दुष्कर्म इन भार खुद नेग्गोद बिद्दीत.”