लैव्यव्यवस्था 2

¹ याग यावारा यहोवा अन्द साटी अन्नभेट इन चढ़ावा येरसोद चाहसुल, रा आव मैदा येरसुल; अदिक अदुर मा याण्णा हाक्कु अदुर म्याकुच लुबान ईटुल;

² अदिक आव अदरी हारून इन पारगोळ हात्ती जो याजक आन तरूल. अदिक अन्नभेट इन याण्णा मिलुस्द मैदा दा टु ई तरीका देल तान ठ्वामा तुमकु तेगुल कि सप्पा लुबान अदुर दा होट बरूल; अदिक याजक आंदरी याद दिलुसोद भाग इन साटी वेदी मा होमबली होताकुल कि ईद यहोवा अन्द साटी सुखदायक सुगन्धित भेंट ठहरूसुल.

³ अदिक अन्नभेट दा टु जो मिक्कु ईरूल अद हारून अदिक आऊन पारगोळ्द ठहरूसुल; ईद यहोवा अन्द होमबली दा टु परम पवित्र भाग आदीत.

⁴ “याग नी अन्नभेट इन साटी तंदुर दा कासकु चढ़ावा येरस्या, रा अद याण्णा दा मिलुस्कु अखमीरी मैदा अन्द फुलका, या याण्णा दा चोपळुस्कु अखमीरी रोट्टीगोळ्द ईरूल.”

⁵ अदिक अगर नीन चढ़ावा तावा मा कासकु अन्नभेट ईरूल, रा अद याण्णा देल मिलुस्कु अखमीरी मैदा अन्द ईरूल;

⁶ अदरी तुकळा-तुकळा माळकु अदुर मा याण्णा हाकेत, आग अद अन्नभेट आगेदीत.

⁷ अदिक ईद नींद चढ़ावा कळाई दा ताळस्कु अन्नभेट ईरूल, रा अद मैदा देल याण्णा दा माळकु आगुल.

⁸ अदिक जो अन्नभेट इन ई वस्तुगोळ दा टु यारदारा माळकु ईरूल अदरी यहोवा अन्द मुंद ओईल; अदिक याग अद याजक उन हात्ती तंदकु आगुल, आग याजक अदरी वेदी इन मुंद ओईल.

⁹ अदिक याजक अन्नभेट दा टु याद तोरसोर भाग इक तेगुकु होमबली मा होताकुल कि अद यहोवा अन्द साटी सुखदायक सुगन्धवाळा भेंट ठहरूसुल;

¹⁰ अदिक अन्नबली दा टु जो मिक्कु ईरूल अद हारून अदिक आऊन पारगोळ्द ठहरूसुल; अद यहोवा अन्द होमबली दा परम पवित्र भाग आदीत.

¹¹ “यातोदारा भी अन्नभेट यदरी नीव यहोवा अन्द साटी येरसी खमीर मिलुस्कु माळकु आगबाळुल; नीव यागलु होमबली दा यहोवा अन्द साटी खमीर अदिक शयद होताक बाळेतीर.”

¹² नीव इंदरी पयला उपज इन चढ़ावा बनुस्कु यहोवा अन्द साटी येर्सेतीर, लेकीन अव सुखदायक सुगन्ध इन साटी वेदी मा येर्सकु आगबाळुल.

¹³ बाक तान सप्पा अन्नभेटगोळ इक नमकीन माळेतीर; अदिक तान यातोदारा भी अन्नभेट इक तान परमेश्वर उन सांगुळ वादा अन्द ऊप्प देल नमकीन आगगोळ बाळेतीर; तान सप्पा चढ़ावागोळ्द सांगुळ ऊप्प भी येर्सेतीर.

¹⁴ “अगर नी यहोवा अन्द साटी पयला उपज इन अन्नभेट येरस्या, रा तान पयला उपज इन अन्नभेट इन साटी बेक्की दा सुटकु हिवरा-हिवरा लॉम्बागोळी, मतलब हिवरा-हिवरा लॉम्बागोळी सुटकु मसलुस कोमेत, आग अनाज इक येर्सेत.

¹⁵ अदिक अदुर दा याण्णा हाकेत, अदिक अदुर म्याकुच लुबान ईटेत; आग अद अन्नभेट आगेदीत.

¹⁶ अदिक याजक सुटकु तेग्द अन्न अक, अदिक याण्णा अक, अदिक पुरा लुबान इक याद तोरसोद भाग माळकु होताक बुळुल; अद यहोवा अन्द साटी होमबली इन बेक्की ठहरूसुल.