लैव्यव्यवस्था 25

¹ बाक यहोवा सीनै पर्वत इन हात्ती मूसा से अंदुन,

² “इस्राएलीगोळ से अन कि याग नीव आ द्याश दा प्रवेश माळी जो ना नीमी कोळतीन, आग भूमी इक यहोवा अन्द साटी आराम सिकतेला ईरूल.

³ आर वर्ष रा तान-तान केई बोऊसी, अदिक आर वर्ष तान-तान अंगुर इन बेली इक छाट-छाटस्कु केई इन उपज जमा माळेतीर;

⁴ लेकीन येळवा वर्ष भूमि अक यहोवा अन्द साटी वळ्लीद आराम घळी सिकतेला ईरूल; अदुर दा न रा तान केई बोऊसोद अदिक न तान अंगुर इन बेली छाटसोद.

⁵ जो येनारा कळकु केई दा खुद देल बेळुल अदरी कळुबाळेतीर, अदिक तान बिना छाट्स्द अंगुर इन एल इक अंगुरगोळ इक कोय बाळेतीर; यतिकी अद भूमी इन साटी वळ्लीद आराम इन वर्ष आदीत.

⁶ भूमी इन आराम घळी इन उपज देल नीम इक, अदिक नीम्द दास-दासी इक, अदिक नीम्द सांगुळ ईरावाळेर मजदूरगोळी अदिक परदेशीगोळ इक भी ऊमोद सिक्कीत;

⁷ अदिक नीम्द पशुगोळ इक अदिक द्याश दा यास जीवजन्तु आव अऊर भी ऊमोद भूमी इन सप्पा उपज देल आदीत.”

⁸ “येळ आराम वर्ष, मतलब येळ गुणा येळ वर्ष आळेतीर, येळु आराम वर्षगोळ्द ईद समय उनपचास वर्ष आदीत.

⁹ आग येळवा तिंगुळ अन्द हतवा दिन इक, मतलब प्रायश्चित इन दिन, जय-जयकार इन महाशब्द इन नरसिंगा तान पुरा द्याश दा सप्पा जागा मा भी ऊयसुसेतीर.

¹⁰ अदिक आ पचासवा वर्ष इक पवित्र माळकु मानसेतीर, अदिक द्याश इन पुरा निवासीगोळ्द साटी छुटकारा अन्द प्रचार माळेतीर; अद वर्ष नीम साटी आजादी प्राप्ति इन वर्ष अनकु आगुल; अदुर दा नीम तान-तान खुद इन जागा अदिक तान-तान घराना दा वापस होगेतीर.

¹¹ नीम्द अल अद पचासवा वर्ष आजादी प्राप्ति इन वर्ष कहलुसीत; अदुर दा नीव न बोऊसेतीर, अदिक जो तान ताना बेळीत अदरी भी कडु बाळेतीर, अदिक न बिना छाट्स्द अंगुर इन एल इक मुरूबाळेतीर.

¹² यतिकी अद रा आजादी प्राप्ति इन वर्ष आदीत; अद नीम्द साटी पवित्र आदीत; नीव अदुर उपज केई दा टु उच ताकोम ताकोमकु तिनेतीर.”

¹³ “ई आजादी प्राप्ति इन वर्ष दा नीव तान-तान खुद इन जागा दा वापस बंदीर.”

¹⁴ अदिक अगर नीव तान वार्टुर कय देल येनारा मारीर या तान वार्टुर से येनारा कोंडीर, रा नीव आबुर दाबुर मा अन्याय माळबाळेतीर.

¹⁵ आजादी प्राप्ति इन वर्ष इन बाद्दा यास वर्ष बितुस्याव अऊर गिनती इन अनुसार किंमत ठहरूसकु आबुर दाबुर से कोंड कोमेतीर, अदिक मिग्द वर्षगोळ्द उपज इन अनुसार आव नीन कय दा मारूल.

¹⁶ याट वर्ष मात्त ईरूल आट अच किंमत वाळुसेतीर, अदिक यास वर्ष कम ईरूल आट अच किंमत घटुसुल, यतिकी वर्ष इन उपज इन संख्या याट ईरूल आट अच आव नीन कय दा मार्यान.

¹⁷ नीव तान-तान वार्टुर मा अन्याय माळबाळेतीर; तान परमेश्वर उन अंज्क मानसेतीर; ना नीम्द परमेश्वर यहोवा हुईन.

¹⁸ “इदुरसाटी नीव नांद विधीगोळ इक मानसेतीर, अदिक नान नियमगोळ मा समझ बुझुस्कु नळेतीर; यतिकी हिंग माळदुर देल नीव आ द्याश दा निडर कुर्तकु ईत्तीर.

¹⁹ भूमी तान उपज उपजुसतेला ईत्तीत, अदिक नीव व्हाट्टतीम तिनतेला ईत्तीर, अदिक आ द्याश दा निडर कुर्तकु ईत्तीर.”

²⁰ अदिक अगर नीव अनी कि येळवा वर्ष दा नाव येन तिनदेव, “न रा नाव बोऊसेव न तान केई इन उपज जमा माळेव?”

²¹ रा जान्सी कि ना नीम इक छठवा वर्ष दा हिंग आशीष कोळाईन, कि भूमि इन उपज मुर वर्ष ताका क्याल्सा दा बंदीत.

²² नीव आठवा वर्ष दा बोऊसेतीर, अदिक हाळोद उपज दा टु तिनतेला ईत्तीर, अदिक ऊम्बत वर्ष इन उपज यागासताका सिकतीदील आगासताका नीव हाळोद उपज दा टु तिनतेला ईत्तीर.

²³ “जागा हमेशा अन्द साटी मारकु आगबाळुल, यतिकी जागा नांद हुन; अदिक अदुर दा नीव परदेशी अदिक व्हार्या नोर लॉकुर ईत्तीर.”

²⁴ लेकीन नीव तान भाग इन पुरा द्याश दा जागा अक बिळ्स गोळेतीर.

²⁵ “अगर नींद यावारा वार्टबन्धु कंगाल आगकु तान खुद इन जागा दा टु येनारा मारबुळुल, रा आऊन परिवार दा टु जो सबसे हात्ती आन आव बंदकु तान वार्टबन्धु उन मार्द भाग इक बिळ्स कोमुल.

²⁶ अगर यावारा मंळसा अन्द साटी याऊ बिळसावाळा ईला ईरूल, अदिक आऊन हात्ती ईट धन ईरूल कि खुद अच तान भाग इक बिळ्स सकुल,

²⁷ रा आव अदुर मार्द समय टु वर्षगोळ आळुकु मिक्कु वर्षगोळ्द उपज इन किंमत आऊक, याव अदुर्द किंमत कोटकु कोंडुन, वापस माळ बुळुल; आग आव तान खुद इन जागा अन्द अधिकारी आगेगुल.

²⁸ लेकीन अगर आऊन हात्ती ईट पूंजी ईला ईरूल कि अदरी बाक तान माळ सकुल, रा आऊन मार्द जागा आजादी प्राप्ति इन वर्ष ताका कोमावाळा अन्द कय दा ईरूल; अदिक आजादी प्राप्ति इन वर्ष दा बिट्टोगुल आग आव मंळसा तान खुद इन जागा अन्द मात्त अधिकारी आगेदान.”

²⁹ “बाक अगर यावारा मंळसा शहरपनाहवाळा नगर दा कुर्तकु मान्ना मारूल, रा अद मारदुर बाद्दा साल भर इन अंदर अदरी बिळ्स सक्यान, मतलब पुरा साल तीम आ मंळसा अक बिळसोद अधिकार ईत्तीत.

³⁰ लेकीन अगर आव साल तिमुर दा बीळ्सतीदिल, रा अद मान्ना जो शहरपनाहवाळा नगर दा ईरूल कोमावाळा अन्द बन्सकु ईरूल, अदिक पीढ़ी-पीढ़ी दा आऊंदा औलाद इन माळकु ईरूल; अदिक आजादी प्राप्ति इन वर्ष इन साल दा भी बिळ्सकु आग बाळुल.

³¹ लेकीन बिना शहरपनाह अन्द ऊरगोळ्द मान्ना रा द्याश इन केईगोळ्द भाग इन घाई आळकु आगुल; आंदुर्द बिळ्सकु भी आगेदीत, अदिक आंदुर आजादी प्राप्ति इन वर्ष इन साल दा बिटोदार.”

³² फिर भी लेवीगोळ्द खुद इन भाग इन नगरगोळ्द जो मान्ना ईरूल आंदरी लेवीगोळ याग चाहसुल आग बिळसुल.

³³ अदिक अगर यावारा लेवी तान भाग ईला बिळस्यान, रा अद मार्द मान्ना जो आऊन भाग इन नगरगोळ दा ईरूल आजादी प्राप्ति इन वर्ष इन साल दा बिळ्सकु आगुल; यतिकी इस्राएलीगोळ्द न्याड्या लेवीगोळ्द भाग आंदुर नगरगोळ दा अव मान्नागोळ अच हूँ.

³⁴ लेकीन आंदुर नगरगोळ्द नाकु दी चराई इन भूमी मारकु आग बाळुल; यतिकी अद आंदुर हमेशा अन्द भाग आदीत.

³⁵ “बाक अगर नीन यावारा वार्टबन्धु कंगाल आगेगुल, अदिक आऊन दश्या नींद मुंद तरस तिना योग्य आगेगुल, रा नी आऊक संभालसेत; आव परदेशी या वार्ट उन घाई नींद सांगुळ ईरूल.

³⁶ आऊन से ब्याज या बळोतरी ताकोमबाळेत; तान परमेश्वर उन अंज्क मानसेतीर; अदुर देल नीन वार्टबन्धु नीन सांगुळ जीवन निर्वाह माळ सकुल.

³⁷ आऊक ब्याज मा पैस्या कोळबाळेत, अदिक आऊक ऊमोद वस्तु लाभ इन लालच देल कोळबाळेत.

³⁸ ना नीम्द परमेश्वर यहोवा हुईन; ना नीमी कनान द्याश कोळोर साटी अदिक नीम्द परमेश्वर ठहरूसोद मनसा देल नीम इक मिस्त्र द्याश टु तेगुकु तंदीन.”

³⁹ “बाक अगर नींद यावारा वार्टबन्धु नीन मुंद कंगाल आगकु तान-तान इक नीन कय दा मार्र बुळुल, रा आऊन से दास उन घाई स्यावा माळसुसबाळेत.

⁴⁰ आंदुर नीन सांगुळ मजदुर या यात्री इन घाई ईरूल, अदिक आजादी प्राप्ति इन वर्ष ताका नीन सांगुळ ईतकु स्यावा माळतेला ईरूल;

⁴¹ आग आंदुर बाल-बच्यागोळ सांगुळ नीन हात्ती टु होटबुळुल, अदिक तान परिवार दा अदिक तान आप्प उन मुतीगोळ्द खुद इन जागा दा वापस होट बरूल.

⁴² यतिकी आंदुर नान अच दास उर, आंदरी ना मिस्त्र द्याश टु तेगुकु तंदिदीन; इदुरसाटी आंदुर दास इन रीती देल मारकु आगबाळुल.

⁴³ आऊन मा कठोरता देल अधिकार माळबाळेतीर; तान परमेश्वर उन अंज्क मान्सतेला ईरेतीर.”

⁴⁴ नीन जो दास-दासीगोळ ईरूल आंदुर नीम्द नाकु दीकळोर राज्यगोळ दा टु ईरूल, अदिक दास अदिक दासीगोळ आंदुर दा टु उच कोमेतीर.

⁴⁵ जो यात्री लॉकुर नीम्द न्याड्या दा परदेशी आगकु ईत्तार, आंदुर दा टु अदिक आंदुर घराना दा टु भी जो नीम्द आस-पास ईरूल, अदिक जो नीम्द द्याश दा पैदा आग्यार, आंदुर दा टु नीव दास अदिक दासीगोळी कोंडकोमी; अदिक आंदुर नीम्द भाग ठहरूसुल.

⁴⁶ नीव तान पारगोळ इक भी जो नीम्द बाद्दा आदार आंदरी अधिकारी माळ सकीर, अदिक आंदुर अदुर भाग ठहरूसुल; अऊर दा टु नीव सदा तान साटी दास ताकोमेतीर, लेकीन नीम्द वार्टगोळ जो इस्राएली आर आंदुर मा तान अधिकार कठोरता देल जतुसबाळेतीर.

⁴⁷ “बाक अगर नींद मुंद यावारा परदेशी या यात्री धनी आगेगुल, अदिक आऊन मुंद नीन वार्ट कंगाल आगकु तान खुद इक नींद मुंद आ परदेशी या यात्री या आऊन वंश इन कय दा मार्र बुळुल,

⁴⁸ रा आऊन भाग मारकु आगोद बाद्दा आव बाक बिळ्सकु आग सकतान; आऊन वार्टुर दा टु यावारा आऊक बिळ्स सकतान,

⁴⁹ या आऊन काका, या काका अन्द पार, अदिक आऊन कुल इन यावारा भी हातीगोळोव परीवारवाळा आऊक बिळ्स सकतान; या अगर आव धनी आगेदान, रा आव खुद अच तान इक बिळ्स सकतान.

⁵⁰ आव तान किंमत कोळावाळा अन्द सांगुळ तान मारोद वर्ष टु आजादी प्राप्ति इन वर्ष ताका हिसाब माळुल, अदिक आऊन मारोद किंमत वर्षगोळ्द गिनती इन अनुसार आगुल, मतलब अद किंमत मजदुर उन दिनगोळ घाई आऊन सांगुळ आदीत.

⁵¹ अगर आजादी प्राप्ति इन वर्ष इन हापाळ वर्ष ईतोगुल, रा यास पैस्यागोळ देल अद कोंडकु आग्याद अदुर दा टु आव तान बिळसोद किंमत आट अच वर्ष इन अनुसार लौटुस बुळुल.

⁵² अगर आजादी प्राप्ति इन वर्ष इन थ्वाळासा वर्ष ईतोगुल, तो भी आव तान स्वामी इन सांगुळ हिसाब माळकु तान बिळसोद किंमत आट अच वर्ष इन अनुसार लौटुस बुळुल.

⁵³ आंदुर तान स्वामी इन सांगुळ आ मजदुर उन घाई ईरूल आऊन हार्दिक मजदुरी ठहरूसकु आगतद; अदिक आऊन स्वामी आऊन मा नींद मुंद कठोरता देल अधिकार जतुसबाळुल.”

⁵⁴ अदिक अगर आंदुर ई रीतिगोळ देल बिळ्सकु आगतीदिल, रा आंदुर आजादी प्राप्ति इन वर्ष दा तान बाल-बच्या सांगुळ बिळस्कु आगुल.

⁵⁵ यतिकी इस्राएली नांद अच दासगोळ उर; आंदुर मिस्त्र द्याश टु नांद अच तेग्द दास उर; ना नीम्द परमेश्वर यहोवा हुईन.