लूका 17

¹ बाक यीशु तान चेलागोळ से अंदुन, “ईद रा आगोद अच आद कि मंळसा थ्वाळासा मातगोळ कारण पाप दा बिळुल, लेकीन हाय, आ मंळसा मा यार कारण पाप आगताव!

² जो ई स्याणेर दा टु यावारा ऊंद मंळसा अक पाप दा हाकतान, आऊन साटी ईद भला आगाईत कि चक्‍की इन पट्टा आऊन कुतक्या दा हिलगुसकु आगाईत, अदिक आऊक समुद्र दा हाक्‍कु आगाईत.”

³ सचेत ईरी; अगर “नीन वार्ट अपराध माळुल रा आऊक समझुस, अदिक अगर पसतावा माळतान रा आऊक माफ माळ.

⁴ अगर हागुल तिम दा आव येळ घन नीन खिलाप पाप माळुल अदिक येळु घन नीन हात्‍ती बंदकु अनुल, ‘ना पसतावा माळेतीन,’ रा आऊक माफ माळ.”

⁵ आग प्रेरितगोळ यीशु से अंदुर, “नाम्द विश्वास वाळुस.”

⁶ प्रभु अंदुन, “अगर नीमी राई इन बींजा अन्द बराबर भी विश्वास ईराईत, रा नीव ई शहतूत इन मार्र से अनायदीर कि तान ताना जळ सकट कितकु समुद्र दा हत्‍तेग, रा अद नीम आग्या मान्स कोमाईत.

⁷ “नीम दा टु हिंग याव आन, यार्द दास नांगर जोत्सतिदान या म्यांडागोळी आळ्सतिदान, अदिक याग आव केई दा टु बरूल, रा आऊन से अनुल, ‘तुरन्त बंदकु ऊमली कुर?’

⁸ निश्चित अच ईला! आव आऊन से ईला अंदान, ‘नान ऊमोर साटी येनारा माळ अदिक अदिक यागासताका ना तिनोद-कुडोद माळ कोमालीन, आगासताका नान स्यावा माळ; अदुर बाद्दा नी भी तिनोद-कुडोद माळ कोमेत?’

⁹ आग्यागोळ्द पालन माळोर साटी येन आव तान दास उक धन्यवाद कोट्टान?

¹⁰ ईदा रीति देल नीव भी याग आ सप्पा क्याल्सागोळी माळ कोंडीर यदुर्द आग्या नीमी कोटकु आगीत, रा अनी, ‘नाव साधारण दास आयेव; जो नामी माळ पायजे ईरोद नाव सिर्फ अदा माळदेव.’”

¹¹ हिंग आत कि यीशु यरूशलेम होगाहोती सामरीया अदिक गलील इन न्याड्या टु आग्त होगोन.

¹² यातोदारा ऊर दा प्रवेश माळाहोती आऊक हत्‍त कोढ़ी लॉकुर सिकदुर जो आऊन से दुर निदुरकु ईरोर.

¹³ आंदुर धोळ्द आवाज दा कारूकु अंदुर, “हे यीशु, हे स्वामी, नाम मा दया माळ!”

¹⁴ यीशु आंदरी नोळकु अंदुन, “होगी, अदिक तान तान इक याजकगोळी तोरसी.” अदिक होग्त-होग्त अच आंदुर शुद्ध आगेदुर.

¹⁵ आग आंदुर दा टु ऊंद ईद नोळकु कि ना चंगा आगेगिन, ऊँचा आवाज देल परमेश्वर उन बळाई माळतेला वापस बंदुन;

¹⁶ अदिक यीशु उन कालगोळ मा बाय इन भार बिदकु आऊन धन्यवाद माळली कुरतुन; अदिक आव सामरी ईरोन.

¹⁷ ईदुर मा यीशु अंदुन, “येन हत्‍तु मुंदुर शुद्ध आगीदील, रा बाक आंदुर ऊंम्बत यल आर?

¹⁸ येन ई परदेशी अक बिटकु मात्‍त यावारा वापस बंदिदील जो परमेश्वर उन बळाई माळायदुन?”

¹⁹ आग यीशु आऊन से अंदुन, “यदकु होटोग; नीन विश्वास नीनी वळ्लीद माळ्याद.”

²⁰ याग फरीसीगोळ यीशु से केळदुर कि परमेश्वर उन राज्य याग बंदीत, रा यीशु आंदरी उत्‍तर कोट्टुन, “परमेश्वर उन राज्य दृश्य रूप दा बराल.

²¹ अदिक लॉकुर ईद अनतीदिल, ‘नोळी, ईल आद, या अल आद.’ यतिकी, परमेश्वर उन राज्य नीम न्याड्या आद.”

²² बाक आव चेलागोळ से अंदुन, “हिंग दिन बंदव, यारदा नीव मंळसा अन पार उन दिनगोळ दा टु ऊंद दिन इक नोळोद चाहासीर, अदिक नीव नोळ सकतीदिल.

²³ लॉकुर नीम से अंदार, ‘नोळी, अल आन!’ या ‘नोळी, ईल आन!’ लेकीन नीव होगबाळेतीर अदिक आंदुर्द हिंद भी आगबाळेतीर.

²⁴ यतिकी ह्यांग बिजली आकाश इन ऊंद छोर टु दुसरा छोर ताका चमकुसतद, हांग अच मंळसा अन पार भी तान दिन दा प्रगट आदान.

²⁵ लेकीन पयला जरूरी आद कि आव हापाळ दुख नेगदान, अदिक ई समय इन लॉकुर द्वारा आऊक तुच्छ ठहरुसकु आदीत.

²⁶ ह्यांग नूह अन्द दिनगोळ दा आगीत, हांग अच मंळसा अन पार उन दिनगोळ दा भी आदीत.

²⁷ याता दिन ताका नूह जहाज मा येरीदिल, आ दिन ताका लॉकुर तिनोर-कुडोर, अदिक आंदुर दा मदा आगतोगोव. आग नीर इन बाळ बंदकु आ सब मुंदरी नाश माळ्त.

²⁸ अदिक ह्यांग लूत इन दिनगोळ दा आगीत कि लॉकुर तिनोर-कुडोर, लेन-देन माळोर, मार्र हचोर अदिक मान्ना माळतोगोर;

²⁹ लेकीन याता दिशी लूत सदोम टु होट्टुन, आ दिशी बेक्‍की अदिक गन्धक आकाश टु बरसुस्त अदिक सब मुंदरी नाश माळ बुळ्त.

³⁰ मंळसा अन पार उन प्रगट आगोद दिशी भी हिंग अच आदीत.”

³¹ “आ दिशी जो मान्ना अन्द आळा मा ईत्‍तान अदिक आऊन सामान मान्या ईत्‍तीत, आव अदरी नेगुली ईळुबाळुल; अदिक हांग अच जो केई दा आन आव वापस मान्नी होगबाळुल.

³² लूत इन हिंग्स उक याद ईटी!

³³ जो यावारा तान जीव ऊळसोद चाहास्यान आव अदरी खोऊस्यान, अदिक जो यावारा अदरी खोऊस्यान आव अदरी ऊळस्यान.

³⁴ ना नीम से अनतीन, आ ईळ्लक इक येढ्ढ मंळसा ऊंद व्हर्स मा मिंग्त ईत्‍तार; ऊंद ताकोमकु आदान अदिक दुसरा बिटकु आदान.

³⁵ येढ्ढ आर्तेर ऊंद सांगुळ जाता दा पीसुसतेला ईत्‍तार, ऊंद ताकोमकु आदार अदिक दुसरा बिटकु आदार.

³⁶ येढ्ढ मुंदुर केई दा ईत्‍तार, ऊंद ताकोमकु आदान अदिक दुसरा बिटकु आदान .”

³⁷ ईद केळकु आंदुर आऊन से केळदुर, “हे प्रभु ईद यल आदीत?” आव आंदुर से अंदुन, “यल लाश बिदकु आद, अल गीधाळ जमा आदव.”