मीका 2

¹ हाय आंदुर मा, जो हासक्या मा बिदकु बुराई इन कल्पना अदिक दुष्ट कर्मगोळ्द इच्छा ईटतार, अदिक बलवान आगदुर कारण हुंजकुका अच आंदुर अवरी पुरा माळतार.

² आंदुर केई इन लालच माळकु अवरी कसु कोमतार, अदिक मान्नगोळ्द लालच माळकु अवरी भी ताकोम कोमतार; अदिक अदुर्द घराना समेत गंळ्सुर मा, अदिक आऊन खुद इन भाग समेत यावारा गंळ्स मा अंधार अदिक अत्याचार माळतार.

³ ई कारण: यहोवा ईद अनतान: ना ई कूल मा ईत्ता विपत्ति हाकदुर मा आईन, यदुर ल्यालमा नीव तान म्याड्डा सरकुस सकतीदिल; न तान ताल्ला म्याकुच माळकु नळुसकतीदील; यतिकी अद विपत्ति इन समय ईत्तीत.

⁴ आ समय ईद अत्यंत शोक इन हाळ दृष्‍टान्त इन रिती मा हाळकु आदीत: “नाम्द रा सर्वनाश आगेत; आव नान लॉकुर्द भाग इक बिगळुसतान; हाय, आव आऊक नान से याट दुर माळ बुळतान! आव नाम केईगोळ ध्वाका कोळावाळेरी कोट बुळतान.

⁵ ई कारण नीनव हिंग याऊ ईरतीदील, जो यहोवा अन मंडली दा चिट्टी हाक्कु आळोद जाळी हाकुल.”

⁶ बकवास माळावाळेर अनतोगतार, “बकवास माळबाळी! ई मातगोळ साटी अनतोगबाळी!” ईत्ता लॉकुर दा टु अपमान मिटुसतीदिल.

⁷ हे याकूब उन घराना, येन ईद अंदकु आगुल कि यहोवा अन आत्मा धीरज काळ्दकु कुरताद? येन ई क्याल्सा आऊन अवा माळकु आग्याव? येन नान वचनगोळ देल आऊन भला आगाल्द जो सीधाई देल नळुतान?

⁸ लेकीन नीन इन मात हुन कि नान प्रजा दुश्मन बन्सकु नान खिलाप येद्दाद; नीव शांत अदिक भोला भाला हादीवाळेर्द मय मा टु चद्दर जेडु कोमतीर जो लळाई इन विचार ईला माळकु बेधळक होगतार.

⁹ नान प्रजा अन आर्तेरी नीव आंदुर्द सुखी मान्नागोळ दा टु तेगु कोमतीर; अदिक आंदुर्द श्याण चिकोर हात्ती टु नान कोळ्द उत्तम वस्तुगोळ हमेशा साटी कसु कोमतीर.

¹⁰ येळी, होटोगी! यतिकी ईद नीम्द आराम इन जागा आल्लच; ईदुर्द कारण आ अशुद्धता हुन जो कठिन दुख इन सांगुळ नीम्द सर्वनाश माळीत.

¹¹ अगर यावारा ख्वाटा आत्मा दा नळुतेला ख्वाटा अदिक बेकार मातगोळ अनुल अदिक अनुल कि ना नीमी सारा अदिक हमेशा अंगुर इन रास्सा अन साटी प्रचार केळ्सतेला ईराईन, रा आवा ई लॉकुर्द भविष्यवक्ता ठहरूस्यान.

¹² हे याकूब, ना जरूर नीमी सप्पा मुंदुरी जमा माळाईन; ना इसत्राएल इन मिग्द लॉकुरी जरूर जमा माळाईन; अदिक क्वाटक्या अन आळ-मर्रीगोळ घाई सांगुळल्या ईटाईन. आ झुण्ड इन घाई जो वळ्लीद चराई दा ईरताव, व मंळसागोळ्द बहुतायत इन मारा देल हल्ला मचुस्याव.

¹³ अऊर मुंद मुंद क्वाटक्या अक मुरावाळा होग्यान, इदुरसाटी अव भी अवरी मुरेत्याव, अदिक फाटक दा टु आगतेला होगेत्याव; अऊर राजा अऊर मुंद मुंद होदुन मतलब यहोवा अऊरव अगुवा हुन.