मरकुस 12

¹ बाक यीशु उदाहरणगोळ दा आंदुर से मात माळली कुरतुन; ऊंद घन ऊंद मंळसा ईरोन याव ऊंद अंगुर इन केई हचदुन, अदिक बेली इन नाकु दी ज्वाळा कटदुन, अदिक रास्सा अन्द गड्डा अगुळदुन, अदिक मचान माळदुन; अदिक दुसरा केईवाळेरी आ अंगुर इन केई अन्द ठ्याका कोटकु दुसरा द्याश दा होटोदुन.

² बाक काय इन मौसम दा आव केईवाळेर हात्‍ती ऊंद दास उक कळुदुन, कि आ केईवाळेर से अंगुर इन केई इन फसल इन हिस्सा ताकोमुल.

³ लेकीन आंदुर आ दास उक हुळकु बळदुर अदिक आऊक खाली कय कळु बुटुर!

⁴ मालिक मात्‍त ऊंद दास उक आंदुर हात्‍ती कळुदुन; आंदुर आऊन ताल्ला ओळ्द बुटुर अदिक आऊन अपमान माळदुर!

⁵ बाक मालिक ऊंद दास उक अदिक कळुदुन; आंदुर आऊक कोंद बुटुर. अदिक आंदुर हापाळ लॉकुर सांगुळ हांगा व्यवहार माळदुर, आंदुर दा टु आंदुर यारीकारा बळदुर, अदिक यारीकारा कोंद बुटुर!

⁶ ईग ऊंदा ईरोन, जो आऊन प्रिय पार ईरोन; आखरी दा आव आऊक भी आंदुर हात्‍ती ईद सोचकु कळुदुन कि आंदुर नान पार उन आदर माळ्यार.

⁷ लेकीन आ केईवाळेर आबुर दाबुर से अंदुर, ईवा रा वारीस हुन; बरी, नाव ईऊक कोंद बुळाता, अदिक आऊन धन दौलत नाम्द आदीत!

⁸ इदुरसाटी आंदुर आ पार उक हुळ कोंडुर अदिक आऊक कोंद बुटुर, अदिक अंगुर इन केई इन व्हार्या भीट बुटुर!

⁹ इदुर मा यीशु से केळदुर अंगुर इन केई इन “स्वामी येन माळ्यान? आव बंदकु केईवाळेर्द नाश माळ्यान अदिक अंगुर इन केई दुसरा अक कोट बुटान.”

¹⁰ येन नीव शास्त्र दा ईद वचन वाचुसीदील: “याता कल्ल इक कारीगरीगोळ बेकार मान्सीदुर, अदा क्वाना अन्द महत्वपुर्ण कल्ल बनसेत;

¹¹ ईद प्रभु अन्द दी टु आत, अदिक नाम नजर दा अदभुत आद.”

¹² आग नियम इन गुरुगोळ आऊक हुडोद चाहासदुर; यतिकी समसेगिदुर कि यीशु नाम विरोध दा ईद उदाहरण अंदान. लेकीन आंदुर लॉकुर से अंजोर, अदिक आऊक बिटकु होटोदुर.

¹³ आग आंदुर आऊक मातगोळ दा फसुसोरसाटी येनारा फरीसीगोळ अदिक हेरोदेस राजा अन्द पक्ष इन येनारा लॉकुरी यीशु उन हात्‍ती कळुदुर.

¹⁴ अदिक आंदुर बंदकु आऊन से अंदुर, “हे गुरु, नाव जान्सतेव, कि नी खरा आय, अदिक यारदु परवा माळाल; यतिकी नी मंळसागोळ्द बाय नोळकु मात माळाल, लेकीन परमेश्वर उन खरा हादी कल्सत्या! रा येन सरकार उक कर कोळोद उचित आद का ईला?”

¹⁵ आव आंदुर्द कपट जान्सकु आंदुर से अंदुन, “नानी येती फसुसोद कोशिश माळेतीर? ऊंद दीनार नान हात्‍ती तरी, कि ना अदरी नोळाईन.”

¹⁶ आंदुर ऊंद चाँदी इन सिक्‍का आऊन हात्‍ती तंदुर, अदिक आव आंदुर से अंदुन, “ईद छाप अदिक हेसुर यार्द हुन?” आंदुर अंदुर, “रोमन राजा अन्द हुन.”

¹⁷ अदिक यीशु आंदुर से अंदुन, “जो रोमन राजा अन्द हुन अद रोमन राजा अक कोळी, अदिक जो परमेश्वर उन आद अद परमेश्वर उक कोळी.” अदिक आंदुर यीशु नव मात केळकु चकित आगेदुर.

¹⁸ बाक सदूकीगोळ भी, जो अनतार कि सोत्‍त मंळसागोळ्द जित्‍ता आगोद हई हैलेच, यीशु उन हात्‍ती बंदकु आऊन से केळ कुरतुर,

¹⁹ आंदुर अंदुर, “हे गुरु, आंदुर यीशु उक अंदुर, मूसा इजाजत कोटान कि ऊंद मंळसा छोळ चिट्ठी लिख्सकु तान हिंग्स उक तलाक कोळ सकतान. नाम साटी लिखस्यान कि अगर यारदारा वार्ट बिना औलाद पैदा माळ्त सोतोदान अदिक आऊनोर हिंग्स ईतोदार, रा आऊन वार्ट आऊन हिंग्स उन से मदा माळ कोमुल, अदिक तान वार्ट उन साठी वंश पैदा माळुल.

²⁰ ऊंद जागा दा येळ वार्टुर ईरोर. पयला वार्ट मदा माळकु बिना औलाद सोतोदुन;

²¹ आग दुसरा वार्ट आ आर्त से मदा माळ कोंडुन अदिक आव भी बिना औलाद सोतोदुन; अदिक हांग अच तिसरा भी माळदुन.

²² अदिक येळु वार्टुर्द ऊंद भी औलाद आगीदील. सप्पा मुंदुर हिंद आ आर्त भी सोतोदुर.

²³ इदुरसाटी पुनरूत्थान आगदुर बाद्दा आक आंदुर दा टु यारोर हिंग्स आदार? यतिकी आक रा येळु मुंदुर हिंग्स आगेगीदुर.”

²⁴ यीशु आंदुर से अंदुन, “नीव रा शास्त्र अक जान्सतीर, अदिक ना ही परमेश्वर उन सामर्थ्य इक इदुरसाटी नीव गलती माळतीर?

²⁵ यतिकी याग आंदुर सोत्‍तुर दा टु जित्‍ता आदार, रा आंदुर ना मदा माळ्यार अदिक ना मदा दा कोटकु आदार, लेकीन स्वर्ग दा स्वर्गदूतगोळ घाई आदार.

²⁶ सोत्‍तुर दा टु जित्‍ता आगोद बारा दा येन नीव मूसा अन्द किताब दा होत्‍त झाळी इन कात्‍ता दा वाचुसीदील कि परमेश्वर आऊन से अंदुन, ‘ना अब्राहम उन परमेश्वर, अदिक इसहाक उन परमेश्वर, अदिक याकूब उन परमेश्वर हुईन?’

²⁷ परमेश्वर जो सोत्‍तुर आंदुरव ईला उलटा जित्‍तागोळोव परमेश्वर हुन; इदुरसाटी नीव पुरा पुरा तरीका देल ख्वाटा आईर.”

²⁸ आग शास्त्रीगोळ दा टु ऊंद बंदकु आंदरी विवाद माळ्त केळदुन, अदिक ईद जान्सकु कि यीशु सदूकीगोळी वळ्लीद रीति देल उत्‍तर कोट्टुन, आऊन से केळदुन, “सब से मुख्य आग्या यातोद आद?”

²⁹ यीशु आऊक उत्‍तर कोट्टुन, सब आग्यागोळ दा टु ईद मुख्य आद: “हे इस्त्राएल इन लॉकुरा केळी! प्रभु नामव परमेश्वर ऊंदा प्रभु आन,

³⁰ अदिक नी प्रभु तान परमेश्वर से तान पुरा मन देल, अदिक तान पुरा जीव देल, अदिक तान पुरा बुद्धी देल, अदिक तान पुरा ताकत देल प्यार ईटेत.”

³¹ अदिक दुसरा आग्या ईद आद, “नी तान मान्ना हातळोर से तांदा घाई प्यार ईटेत. ईव येढ्ढ आग्यागोळी बिटकु दुसरा यातु धोळ्द आग्या ईलच.”

³² नियमगोळ गुरु यीशु से अंदुन, “हे गुरु,” हापाळ वळ्लीद! नी खरा अन्द कि परमेश्वर ऊंदा आन, अदिक आऊक बिटकु अदिक याऊ दुसरा परमेश्वर हैलेच.

³³ अदिक आऊन से पुरा मन, अदिक पुरा बुद्धी, अदिक पुरा जीव, अदिक पुरा ताकत देल प्यार ईटेत; अदिक बाजुवाळेर से तान घाई प्यार ईटेत, पुरा अग्नि-बलिगोळ्द अदिक पशु-बलिगोळ से यक्कुल आद.

³⁴ याग यीशु नोळदुन कि आव समझदारी देल उत्‍तर कोटुन, रा आऊन से अंदुन, “नी परमेश्वर उन राज्य टु दुर हैलेच.” अदिक यारीकु बाक आऊन से येनु केळोद हिम्मत आगीदील.

³⁵ बाक यीशु मंदिर दा उपदेश माळतेला ईद अंदुन, “नियम इन गुरुगोळ अंदुर कि मसीह ह्यांग दाऊद उन औलाद आग सकतान?”

³⁶ दाऊद तान पवित्र आत्मा अन्द सामर्थ्य देल हिंग अंदुन: प्रभु परमेश्वर नान प्रभु से अंदुन, “नान ऊमा कय मा कुरूल, यागासताका कि ना नीनोर दुश्मनगोळी अपमान काल दिशी तरालिन.”

³⁷ दाऊद रा खुद अच आऊक प्रभु अनतान, बाक आव आऊन पार ह्यांग आदुन? नियम इन गुरुगोळ से सावधान ईरी (मत्ती २३:१-३६; लूका २०:४५-४७) अदिक भीळ दाकळोर लॉकुर आऊंद मात खुशी देल केळतोगोर.

³⁸ यीशु तान उपदेश दा आंदुर से अंदुन, “शास्त्रीगोळ से सावधान ईरी, सम्मान सिक्‍कोर साटी आंदुर ऊद्द-ऊद्द च्वांगा हाक्‍कु वयाळतार अदिक सात्‍तागोळ दा खुद इक नमस्कार माळसुसोद आंदरी वळ्लीद हततद.

³⁹ अदिक यहूदी लॉकुर्द सभागृहगोळ दा मुख्य आसन अदिक भोज दा मुख्य जागा भी चाहास्तार.

⁴⁰ आंदुर रांड्यागोळ्द मान्नागोळ इक तिंद बुळतार, अदिक लॉकुरी दिखावा साटी हापाळ होत्त ताका प्रार्थना माळतेला ईरतार. इंदरी यक्कुल से यक्कुल दण्ड सिक्‍कीत.”

⁴¹ यीशु मंदिर इन दानपेटी इन मुंद कुर्तकु नोळतोगोन कि लॉकुर मंदिर इन दानपेटी दा याता प्रकार देल पैस्या हाकतार; अदिक यक्कुल पैस्यावाळेर लॉकुर भी हापाळ येनारा हाकदुर.

⁴² इटुर दा ऊंद कंगाल रांड्यागीत बंदकु तांबा अन्द येढ्ढ स्याण-स्याणेव सिक्‍का हाकदुर यदुर किमत ईतु आतुटु ऊंद पैस्या अन्द बराबर ईतीदाद, हाकदुर.

⁴³ आग यीशु तान चेलागोळी हात्‍ती कारूकु आंदुर से अंदुन, “ना नीम से खरा खरा अनतीन, कि मंदिर इन दानपेटी दा हाक्‍कावाळेर दा टु ई कंगाल रांड्यागीत सप्पा मुंदुर से यक्कुल हाकदुर;

⁴⁴ यतिकी सप्पा मुंदुर तान बळोतरी दा टु हाक्यार, लेकीन इक तांद कमी दा टु जो येनारा आकिन ईरोद, इदुर मतलब तांद पुरा जीविका हाक्‍क बुटार.”