प्रकाशितवाक्य 4

¹ ई मातगोळ बाद्दा जो ना दृष्टी माळदीन रा येन नोळतीन कि स्वर्ग दा ऊंद दरवाजा तेरकु आद, अदिक यारी ना पयले तुरही इन घाई शब्द देल तान सांगुळ माताळ्त केळीदीन, आवा अनतान, “ईल म्याकुच होटबर; अदिक ना आ मातगोळ नीनी तोरसाईन, यऊर्द ई मातगोळ बाद्दा पुरा आगोद जरूरी आद.”

² तुरन्त ना आत्मा दा होटबंदीन; अदिक येन नोळतीन कि ऊंद सिंहासन स्वर्ग दा ईटकु आद, अदिक आ सिंहासन मा यावारा कुर्तकु आन.

³ जो अदुर मा कुर्तकु आन आव यशब अदिक माणिक्य घाई कांळ्सदुर दा बरतान, अदिक आ सिंहासन इन नाकु दी मरकत घाई ऊंद मेघधनुष कांळ्सतद.

⁴ आ सिंहासन इन नाकु दी ईप्पतनाक सिंहासन आव; अदिक ई सिंहासनगोळ मा ईप्पतनाक स्याणा लॉकुर बिळी फळक्या हाक्‍कु कुर्तकु आर, अदिक आंदुर ताल्लागोळ मा व्हान्ना नव मुकुट आव.

⁵ आ सिंहासन दा टु बिजली अदिक गर्जन गुमरान होळतद अदिक सिंहासन इन मुंद बेक्‍की इन येळ दिंग्या होतेत्याव, अव परमेश्वर उन येळ आत्मागोळ हुव,

⁶ अदिक आ सिंहासन इन मुंद मान्सी जसा बिल्लौर घाई काँच इन समुद्र आद. सिंहासन इन न्याड्या दा अदिक सिंहासन इन नाकु दी नाक प्राणी आव, यऊर्द हिंद मुंद कण्ण अच कण्ण आव.

⁷ पयला प्राणी हुल्ल इन घाई आद, अदिक दुसरा प्राणी गोसी इन पाड्डा घाई आद, तिसरा प्राणी इन बाय मंळसा अन्द घाई आद, अदिक चौथा प्राणी ऊळुसतेला गीधाळ इन घाई आद.

⁸ नाकु प्राणीगोळव आर: पिक्का आव, अदिक नाकु दी अदिक बुळ्क कण्ण अच कण्ण आव; अदिक अव ईळ्लक हागुल बिना आराम ताकोम्त ईद अनतेला ईरताव, “पवित्र, पवित्र, पवित्र प्रभु परमेश्वर, सर्वशक्तिमान, जो ईरोन अदिक जो आन अदिक जो बरावाळा आन.”

⁹ याग अव प्राणी आऊन जो सिंहासन मा कुर्तकु आन, अदिक जो हमेशा हमेशा जित्‍ता आन, महिमा अदिक आदर अदिक धन्यवाद माळ्याव;

¹⁰ आग ईप्पतनाक इन ईप्पतनाक स्याणा लॉकुर सिंहासन मा कुरावाळेर मुंद बिदोदार; अदिक अदुर्द पुजा माळतार, जो हमेशा हमेशा जीविता आर प्रणाम माळ्यार. अदिक आंदुर तान-तान मुकुट सिंहासन इन मुंद ईद अनतेला हाक्‍क बुट्टार,

¹¹ “हे नाम प्रभु अदिक परमेश्वर, नी अच महिमा अदिक आदर अदिक सामर्थ्य अन्द लायक आय; यतिकी नी अच सप्पा चीजगोळी निर्माण माळ्या अदिक अव अपमान अच इच्छा देल ईरव अदिक अस्तित्व दा बंदव.”