AISAIA 14

1 Anduane Homogohanda Isaraele wali agali lone dara howa ti ibunaga wali agaliore ho dai bilolebira. Ani bialu tininaga dindi henene wiyagoria haru daibu helolebira. Ani kagola wali agali dindi taraha howa ti baba mandagi íbu howa tibi nde Isaraele wali agali heba ho gimbu bu holebira. 2 Anduane Homogohanda wali agali dindi tarani bu karume Isaraele wali agali biamogo bialu yupe halu tini daluha hama dai bilelonaga ibugua ti mo manda bia holebira. Anidagua biragola Isaraele wali agali tinaga dindi Anduane Homogo ibunime tu wa mini biagoria hole daibu kagola wali agali tara urunime ti Isaraele wali agalinaga garabaya biabe ale biahaga holebira. Bamba wali agali uruni tigua Isaraele wali agalime tinaga garabaya biabe ale bilo helaga biaru ai tinime Isaraele wali agalirunaga garabaya biabe ale bialu ha aribia holebira. Bamba tigua Isaraele wali agaliru hengedape howa mo ko halu haga hayago mani Isaraele wali agalirume wali agali uruni haru howa handayaho holebira. 3 Anduane Homogohanda Isaraele wali agali bu kamiru tínaga tandaga timbuni ngelo kamirubi ko damene bu ngarubi bibahende mo wahai haragola tí bayale holeberemi. Wali agali tara bu hearume tí mo ko hayagola tígua tinaga biabe biahalu howa erekuibiore bialu harimigoni. Anigo tínaga genda uruni ereba haiore holebira. 4 Anidagua biragola tígua Babilono wali agali bu karunaga kini kago mege bialu iba gana ogodagua loleberemi. Kini hongohe heago pilo ibira hayago de handadaba. Wali agali hengedape haga biagonaga hongo hamaro biyada. 5 Wali agaliru mo gi halu mo ko haga kagonaga hongo Anduane Homogohanda mo ereba hai helaya. 6 Kini ogoni ibugua bameore keba howa wali agaliru bope haabo haya. Wali agali dindi tara tarani palima pearu hengedape halu mana ko dewa bialu uruni bibahende mo ko haga bialu haya. 7 Ãyu dindi bibahendeha wali agali bu karu tinaga bu miniha dungulo howa ti bibahendeme turu howa iba gana ladagadaga bialu haga ka. 8 Lebanono hari ngaruha ira guraya tamiaru bu karumebi nde kini í̠ homarida lalu turu timbuni halu ka. Ira tigua lalu, Ina kamaru lone dibulene agali mbira nahedago tira, lalu ka. 9 Humbirini andaga dinini bu karume í̠ ibirida lolenaga ti manda manda bialu ka. Tigua lalu, Agali haguaneru-o tí heyadaba. Wali agali dindi tara tara hearunaga kini ala heneru-o tínaga biragane dagia ngelo wahalu heyadaba. Tí bibahende heyalu kini agali o ibirago lola hole ibidaba. 10 Uruni ti bibahendeme í̠hondo bi ogodagua lolebira. ÃÌ naga hongo timbuniore ina bibahendenaga hongo bolangua hai hene kebe tobaho harimada. Ãyu í̠naga hongo ereba hai hene ina kamarubi dege kegonida, lolebira. 11 Abale í̠ dindini haringi í̠naga yári bayale tara tara karulo heru hondowa wali agali bu hearume ga̱wa̱ ale lalu í̠naga mini yaraga halu lalu hayago ai ereba haya. Ãyu í̠ homene dinini karuha howa ngoe bombo biru ngaru í̠naga tamunguru howa dindiha paluebereda. Ani bialu ngoe emene biru ngarume í̠ balangiya dambi haradagua bulubada. 12 Babilononaga kini-o ÃÌ  dahuliya andaga howa yakundi dindini hondo ibira henego ngegoni. Abale í̠ yakundi egabi naledaha huririle harini tagira ibagadagua howa í̠na dindi bibahendeha wai bima ibaga bialu wayali haga harigo ai í̠ mo dindiha henego ngegoni. 13 ÃÌ na mitangi bialu, I̱ dahuliya andaga pu holebero. I̱na kininaga biragane dagia Ngode Datagaliwabenaga yakundi bu kagoria mo ngelowa daligani biruliya. Dindi abene uyurahayagi hari nene mbira dama mitangi bialu mbirale gime wabini ngaru ti ngoai haga ngagohabi biruliya dege. 14 I̱na hari beraliba ngaru bolangua halu puwa Daligaorene Daliga kagobi dege holebero, lo manda bu harigoni. 15 I̱na ani lo manda birigoyu daraba í̠ pilope howa ibira harigoni. ÃÌ  homene dininiru haga humbirini andaga ngagoha pialu dindi andanehaore pu holebere. 16 Dindi ogoniha pu kegola homene dinini maru bu karume í̠ deme hongo howa handaya halu í̠hondo hale halu lalu, Dindi bibahende mo durula hai halu dindi timbuni maruha karu mo gi hai haga biagoni agali ogoni mbauleda. 17 Agali mbira tano wiaru bibahende bo gialabagabu wahai halu dindi hangu ngelalu piaga biagoni agali ogoni bada. Agali ogonime wali agali garabaya bu helayaru dara halu tini daluha hole dai bidaba nalaga biagoda, lolebira. 18 Kini maru karu homaragola tinaga tingini homali bayale wabinigoha hangu hangu yu hora haga biagaya. 19 Ãyu í̠ ani ndo biyada. Tigua í̠naga tingini agalime ira magane dandalu dindini togo bilo bape haralidagua bape hayada. ÃÌ naga tingini agali waime benego tingini ngarume wia dambi howa hariga teneni ngagoni. Tinaga dinini dindi andaneha humbirini andaga ka. Agali harigani bolangua haga bialu gerai porarume í̠ angua haga bialu puíbu bialu kagoni ndobe. 20 ÃÌ naga tingini agali kini maru henerunaga tingini baya hangu hora hayadagua hora naholebira. Anidagua bulubadago irane í̠na í̠naga dindi wigo mo ko hai halu í̠naga wali agalirubi bo wahai harigonaga ani bulebira. Kini ko ogoni ibu waneigini bu karubi dindi ogoria nahe ereba hai holebira. 21 Anidagua bilonaga kini ibuguabi ibu mamalirumebi mana ko bialu henegonaga pani mialu ibu igini uruni bo wahai hole manda manda bu holene nga. Ibu igini biarume kini ha aribia nahelo. Tigua dindi bibahendeni tinaga tanoru lone bu aribia nahelobi ani bulene nga, lalu iba gana ogoni loleberemi, lene. 22 Anduane Homogo Hongo Haiheore kago ibugua lalu, I̱na Babilonoali bu karu baba wai bialu ti mo ko howa bo biba halu ereba hai helolebero. Mbiraoreli hangubi mbira helo yu wa naholebero. Wali agali waneiginirubi mbira yu wa naholebero. I̱ Anduane Homogo i̱na bi o ledogoniore. 23 I̱na Babilono wali agali bibahende bo wahai howa mburuma bialu hilu wahai holebero. Ani bialu Babilono mo iba pugua aribia ho ngeledogola ega iba puguaha biraga bedaru ale dege biru wulebira. I̱ Anduane Homogo Hongo Haiheore kogome i̱na bi o ledogoniore. 24 Anduane Homogo Hongo Haiheore kagome bi hongohe mbira lo wialu lalu, Heneneore larogo i̱na mbira bule mandabu henego biaore bulebero. 25 Asiriali bu hearu tigua Isaraeleali dindi wiwagoha ibalu i̱naga wali agali dindi ogoniha hearu genda timbuni mo miya. Nogo bulumagame agalinaga biabe biahelo ira mbalapeme mani dariba hamagamaga bini hagadagua Asiriali tigua Isaraele wali agali ani bu helaga kagoni. Anigo Asiriali uruni ti Isaraele dindi hari ngaruha kaore dege i̱na ti geme hengedalu tagadabagabu waholebero. Ani berogola Isaraele tiha genda timbuni winigo ereba hai holebira. 26 Anduane Homogo i̱na dindi mbira mbirani hameigini hongohe palima pedaruhondo urunidagua biai holebero. Anidagua bule lowa i̱naga gi megela ho manda manda bu kogoni, lene. 27 Anduane Homogo Hongo Haiheore kago ibugua urunidagua bule kago aiwa mo wahabehebe. Ibugua pani mule gi megela ho kago mbiralime ibunaga gi bope halu waha labe nahe kagoni. 28 Kini Ahasa homayagola mali ogoningi Anduane Homogohanda bi mbira ogodagua lalu lamini. 29 Pilidia wali agaliru-o bi ogo baya hangu hale halimu. Gewa mbira tí minu baga biago tagalaki hayagonaga tí bayale holeberemada lo mitangi bialu turu holomini nahalimu. Puya ko mbira winigo homaragola puya mende koore ngagome wini biagoria wia aribia holebira. Anigo puya koore biago koorene ko helo helaga bedago ibuni babaganehe howa yagalo yu ibaga biaga wulebira. 30 Anduane Homogo ibugua yagibano mbirale nawi bu karu ti mo bayale haragola tinaga bu miniha mo palia holene karulo holebira. Anigo Pilidia wali agali tíha Anduane Homogo ibunime hina gari timbuni ibilaragola hina gari ogonime tí mo homa halu bo biba helolebira. 31 Pilidia dindiha tano timbuni dunini wima pedemirubi wali agali tano uruniha haga bu kamirubi tí bibahendeme gi timbuni howa duguore hongo howa biadagadaga bidaba. Ani larogoni irane dindi abene uyurahayagi howa ami agali dewaore ibirago tinaga erembiraha ira hagua dagadaga bima ibiragonaga laro. Ami agali uruni ti agali dari mbira naibi wayali ogobi dege dege ibiragoni. 32 Pilidialime tí biamogo bule ibidaba lama inahondo hale ho ibiyagua nde iname agua ladai bimi̱yadabe. Ogodagua ladai bimi̱ya. Anduane Homogohanda Isaraele wali agalinaga ha do anda Saiono tano dabo ngeleda. Ibunaga wali agaliruha genda mbira tagira ibirangi ti tano ogoniha pialu ha do howa bayale holebira, lami̱ya.