YUDIDI 6

1 Agali ho mabu biaru tigua keba howa bi lai heagola Asirianaga ami hearunaga agali haguane Holoberenesehanda heyuwa Agiohondo keba howa agali tara hearunaga denibi Amononaga ami agali hearunaga deni howabi lai lene. 2 Ibugua lalu, ÃÌ  Agio kegonibi tí maru Isaraelenaga biabe bia haga kemirubi tígua manda bialu kemiria ti ai kemada lo manda bidemibe. ÃÌ na lalu, Tínaga Ngode Datagaliwabehanda tí baya hangu handaya ho holebirago iname Isaraele baba wai nabimi̱ya, laribe. Ai Ngode Datagaliwabe ogoni ibu ai kabe. Nebugadenesa ibu inanaga Ngode Datagaliwabe kagoni ndobe. Ibunaga ami agali karu ibilalu Isaraele bibahende bo wahaiore holebirago ndobe. Tínaga Ngode Datagaliwabe kagome ti biamogo nabulebira. 3 Ina Nebugadenesa ibunaga biabe bia haga kemarume ti bo wahai holene erekui nabi ti yamo daga nawini mbira ka. Tigua inanaga ami agali nogo hosini biruwa wai biaga hongo gibihe karunaga hongo bope habe nahe ka. 4 Iname balu bo hedaore holeberema. Ani beremagola tínaga daramame hari bare ngaru bu dambi hai halu homene tinginime dindi tigabi ngaru ereba hai holebira. Tí ina baba hongo karula nape ka. Tí aria lenego mbiraoreli hangubi yu wahene nahe loleberema. Bi o larogoni dindi bibahendenaga agali haguane timbuniore kago Kini Nebugadenesanaga bi laro. Ai ibunaga bi ogoni lo wa naholebiraore. 5 Anigo Agio í̠ Amonoali ami ko mbira kegoni. Ai i̱naga waitigi mbira henedane áyu handa walia ko. ÃÌ na i̱naga dengui nahende keore dege i̱na hameigini Iyibi dindiha howa ibida ibini uruni bo wahaiore holebero. 6 I̱na dai berongi ami agali tigua í̠ ayu tibume dibaragola í̠naga tingini agali bo wahene ngaru dege dombeneha wulebere. 7 Ãyu í̠ i̱naga biabe biaga agali tigua haru halu hari bare ngagoha puwa tano mbira harigani kaware ngagoria helolebira. 8 ÃÌ  áyu ogo homabelo ndo mani Isaraele wali agali baba mandagi homabelo. 9 ÃÌ na manda bialu keria iname ti babe nahe ko lo manda bu heagua nde í̠naga miniha genda aginaga yu kebe. Ai ogoni hangu i̱naga bi lai haru. I̱naga bi ogoni bame lo waholene nawiore, lene. 10 Ai Holoberenesehanda agali ibunaga biabe biaga hearuhondo lamialu, Tígua Agio gi geru minu daba haga bialu yalu puwa Bedulia tano ngagoria Isaraele bu karu milimu, lene. 11 Ani layagola tigua Agio gi geru minu daba haga buwa yalu dindi tigabi wiagoha pupe halu pene. Ani pu dege bialu hari bare wiagoha puabo halu Bedulia tano wiago andaneha iba uli wiagoria anda pene. 12 Ani piyagola agali tano ogoniha hayadarume ami agali ibiyago tinaga danda timu yandere wiaru mo yalu haru bare wiagoha piai hene. Ani pu howa agali maru ege to̱le̱ timbuni pume hendeho yuwa baga mugube hearume waitigi ibiyaru hari bareha irigi halu naibilo hariga handai halu hene. 13 Ani piyagola ami agali biaru ti ege to̱le̱ timbuni heagoha birado hene. Tigua pume Agionaga gi geru minu kabu buwa hari heago teneha ngelene. Ngelalu tinaga agali haguane hearia dai bini. 14 Ti Isaraele tano yu wahalu ti daliape howa handalu hearia Agio ibu palearia hendene. Ani hondowa pume gi geru daba heago hadape halu Bedulia tano haru pene. Puwa tanonaga agali haguane berearu deni heyu helene. 15 Horo ogoningi Simeono hameigini aria Maiga igini Usiabi Odoniele igini Kabarisibi Melegiele igini Kamisibi ti agali haguane hene. 16 Tigua tanonaga agali hearu ibidaba layagola urunibi igiri daliahe hearubi wali berearubi mo ngoai hagane wiagoria íbu ngoai hene. Agio ibu agali biaru dombeneha heagola Usiahanda ibuhondo, Bibahende biyadarunaga te la, lene. 17 Ani layagola Agiohanda ladai bialu mbirale bibahende abale ti Holoberenese baba mo ngoai howa bi lene biago lamiai hene. Ani bialu bi ibunime Asiria biaruhondo layarubi lamia dege bini. Ani lalu mine halu bi mbira Holoberenese ibugua Isaraele mege bialu layagobi lamia dege bini. 18 Wali agalime Agiohanda bi layago hale howa tinaga dengui dindini paliape howa Ngode Datagaliwabehondo bi lalu hene. 19 Tigua Anduane Homogo dahuliya andaganaga Ngode Datagaliwabe olowa lalu, Waitigime inahondo tiga nabi ngago bialu kagoni de handalu ina taga timbuni ho kamarubi de hondowa biamogo bibe. Ani bialu ina í̠naga wali agali kemaruhondo bu mini gubaliniha daraho haabo habe, lene. 20 Ani lowa tigua Agionaga bu miniha mo hongo halu mo turu howa 21 bi lo mbira hai howa Usiahanda Agio haru halu ibu andaga puwa ibugua agali haguane bu hearunaga tomo timbuniore dawa manda manda bini. Ai horo ogoningi mbiraga tigua Isaraele wali agalinaga Ngode Datagaliwabehanda ti biamogo bilonaga bi lene. Tigua Ngode Datagaliwabehondo bi lalu heaore dege gao lene.