YAREMAIA 44
PNG1 Anduane Homogohanda ibunaga bi Yaremaia ibugua Yuda wali agali Iyibi dindiha hearuhondo latagi helonaga lamini. Wali agali uruni ti Iyibi dindini Migidolo tano wiagohabi Tabanese tano wiagohabi Membisi tanohabi Iyibi dindi abene unurayagi wiaruhabi hene. 2 Anduane Homogo Hongo Haiheore Isaraele wali agalinaga Ngode Datagaliwabe kago ibugua ogodagua laya. Ala Yarusaleme tanohabi Yuda dindiha tano wiaru bibahendenibi i̱na mbirale bigi biruru tà de handai harimigoni. Ãyu tano uruniha mbirali naheore mo ko hai hene ngagoni. 3 Yuda wali agali tigua mana ko dewa biaabo hayagome i̱ mo keba hayagola i̱na ti mo ko halu bo hilo wahai haru. Tigua dama mitangi bialu mbirale gime wabini wiaruhondo bi pupu wialu uruninaga dabuni ira hagua ngabilo inisenesiru lomabu dela bigi biya. Bamba ti mbirale gime wabini urunihondo bi pupu wulene manda nabiore hene. Yuda wali agali áyu kamirumebi tÃnaga mamali ala henerumebi dama mitangi bialu mbirale bi pupu wulenaga gime wabini ogoni manda nabi dege hene. 4 Yuda wali agali tà hemigoha i̱naga biabe biahalu bi mana latagi haga agali dewa ibilalu haabo haru. Ani ibilarugola tigua i̱naga bi mana latagi halu lalu, TÃgua mana ko ngubi i̱na turu naharuligo ale bialu kamigo wahai hadaba, laabo haya. 5 Ani lalu heago helowa Yuda wali agali bu hearume hale habe manga haya. Tigua mana ko bialu hemigo wa nahe howa dama mitangi bialu mbirale gime wabini wiaruhondo bi pupu wialu lomarubi mialu haabo haya. 6 Tigua anidagua bialu hayagonaga i̱na ti baba keba timbuniore howa ti pani nelo mialu Yuda dindiha tano wiarubi Yarusalemeni hariga wiarubi bibahende bo haealabaga bialu mo ko hai harugo ngagoni. 7 Anigo i̱ Anduane Homogo Hongo Haiheore Isaraele wali agalinaga Ngode Datagaliwabe kogome i̱na tÃhondo hale haro. TÃgua tÃni mo ko halu kamigo aginagabe. TÃgua anidagua bialu kamigome Yuda wali agali bibahendebi tÃnaga waneiginirubi bibahende bo hilo wahai halu tà aria lenego mbira nahelo hamelo kamibe. 8 Ãyu nde tÃgua Iyibi dindini Ãbu howa dama mitangi bialu mbirale gime wabu wialu urunihondo bi pupu wialu ira hagua ngabilo delaga inisenesiru lomabu delalu kamigoni agibe. TÃgua mana ogonidagua bialu kamigome i̱ mo kebaore harimigo tÃha mo ko holene wulebira. Anidagua biragola hameigini dindi tara tarani bu karume tà mege bialu wali agali mendego ha halu howa tihondo lalu, Yuda wali agali mo ko hayadagua ÃÌ bi mo ko helo, laga bialu holebira. 9 TÃnaga mamali ala henerumebi Yudanaga kini henerumebi tinaga one berenerumebi mana ko dewa bialu henego tà embeda kamibe. Anidagua dege tÃguabi tà one bedarumebi mana ko dege bialu kami. TÃgua mana ko uruni Yuda dindi bibahendehabi Yarusaleme tanoha hariga pedaru bibahendenibi bialu harimigo embeda ho waharimibe. 10 TÃgua mana ko bialu harimigonaga taga nahe tÃni mo dindiha howa i̱ andaneha naharimigoni. I̱na bi larugobi hale habe manga halu i̱naga mana tÃhondobi tÃnaga mamaliruhondobi laabo halu harugo hale nahagaore kamigoni ndobe. 11 Anidagua bialu harimigonaga i̱ Anduane Homogo Hongo Haiheore Isaraele wali agalinaga Ngode Datagaliwabe kogome tà baba waitigi halu Yuda wali agali tà bibahendeha mo ko holene ibilole mitangi bu kogoni. Tà aria lenego mbiraore hangubi mbira yu wa naholeberoore. 12 Yuda wali agali emene hangu dagalene ti Iyibi dindiha pole hongo halu karu ti bibahendeore biba helo bo hilo wahai helolebero. Ti Iyibi dindini howa maru waitigime bo wahai halu maru hina garime homaga bulebira. Agali haguane bu karubi agali damene bu karubi bibahende ta nabi homaiore holebira. Hameigini dindi tara taraha bu karume ti hondowa mogo lalu mege bialu hondo oba halu holebira. Ani lalu howa tigua tinaga waitigiru ha halu lalu, Yuda wali agali mo ko hayadagua tÃbi mo ko helo, laga bialu holebira. 13 I̱na Yarusaleme wali agali pani nelo mialu bo wahai harudagua Iyibi dindini pu karu tiore bo hilo waholebero. Ti maru waitigime bo waharagola homalu maru hina garime homalu maru warago tara tara ngagome balu homaga bulebira. 14 Yuda wali agali emene hangu yu wahene Iyibi dindiha hole ibini kamiru tà bibahendeme Yuda dindiha hama dai bulene hamelo kamigoyu tà dai nabuleberemi. Tà pani nalu mo ko holene ngagoria pu tara halu tÃni daluha ibida dai bulene mbira nawulebiraore. Tà bibahende homai harami handala mbira mbira hangu dai buleberemi, lalu lene. 15 Wali agali dewaore Ãbu ngoaiho heagola Yaremaiahanda bi ogoni latagi halu hene. Yuda wali agali maru Iyibi dindi abene unurahayagi haga hearu tibi nde Ãbu ha dege bini. Agali ogoriani Ãbu henedaru ti onerume dama mitangi bialu mbirale gime wabini ngaruhondo ira hagua ngabilo inisenesiru lomabu delaga beda manda bu henerubi ti onerubi wali marubi bibahendeme Yaremaiahondo ladai bialu lalu, 16 ÃÌ na Anduane Homogonaga minini howa bi inahondo langialu ha kegonigo iname bi ogoni hale naholeberemaore. 17 Mbirale inane hameme buleore lalu bi lo wirimadaru buleberema. Iname ira hagua ngabilo delaga inisenesiru dama wali beda mitangi bialu bi pupu wiaga mini Dahuliya Andaganaga Kuini Wali laga bedagonaga dabuni lomabu delalu waini ibabi odo lomabu muleberema. Bamba inanaga mamalirumebi inamebi agali haguane henerumebi kinirumebi dama wali beda mitangi bialu mini Dahuliya Andaganaga Kuini Wali laga ogonihondo lomaru mialu haga kama ndobe. Iname Yuda dindiha tano wiaruhabi Yarusaleme tanoha hariga timbuni pedaruniha howabi loma uruni ale bu mialu haabo haramali. Iname mana ogonidagua bialu hemagola inane bayale halu inanaga tomo dewaore wialu inaha mo ko holene mbira anda naibi bayale harimagoni. 18 Anigo iname Dahuliya Andaganaga Kuini Walihondo lomabu mialu haganego wa harimangi howa hama ibinigo áyu o kamangi ina mbirale tubagi hai halu maru waitigime bo wahai halu maru hina garime homaga biya, lene. 19 Ani lowa wali berearume bi lagimbu bialu lalu, Iname Dahuliya Andaganaga Kuini Wali ogonihondo lomaru mialu biruwa ina balawame mbisigedi wabialu howa wali ogoninaga bigiya wabu hiruwa iname waini iba loma bialu odoba harimago ina agalini bu karume bayaleda lowa turu naholobadabe, lene. 20 Tigua bi layaru Yaremaia ibugua hale hai howa wali agali bibahende bu hearuhondo ladai bialu lalu, 21 TÃguabi tÃnaga mamalirumebi agali haguanerumebi kinirumebi tà bibahendeme Yuda dindiha tano wiarunaga howabi Yarusalemeha hariga timbuni pugu biaruha howabi tÃgua ira hagua ngabiaga inisenesiru lomabu delalu hemigola Anduane Homogohanda mana ogonibi birimigonaga miniha genda nahe ibu manda nabi kabe toba ho kamibe. Ani ndoyago ibugua bu miniha mo pehowa mitangi bu henego ka. 22 TÃgua mana ko ngubi uruni bialu haabo hemigola Anduane Homogohanda tÃnaga mana ko uruni manga timbuni haya. Ani manga ho howa ibugua tÃnaga dindi bo labu halu mo ko hene wiaabo helalu wali agali mbira munini bu nahe áyu wiaabo kagoni ndobe. Ani bini ngago mitangi bialu wali agali tara karume tinaga waitigiru ha halu lalu, ÃÌ ore Yuda dindi mo ko hene ngagobiore habe, laga bialu kagoni. 23 TÃgua dama mitangi bialu mbirale tarahondo ira hagua ngabiaga inisenesiru lomabu delaga birimigo Anduane Homogonaga deni mana ko ngubiore birimi. Ani bialu tÃgua ibunaga bi mo wahalu puwa ibunaga bi mana lo wiarubi talialu nabi dege harimi. Anidagua bialu harimigome mo ko holene tÃha wiyago wiaabo kagoni ndobe, lene. 24 Ani lowa Yaremaiahanda Yuda wali agalihondo bi maru lalu walime biyagonagabi ladege bialu lalu, Yuda wali agali oali Iyibi dindiha Ãbu kamiru tÃgua Anduane Homogohanda bi larago bayuwa hale hadaba. 25 Anduane Homogo Hongo Haiheore Isaraele wali agalinaga Ngode Datagaliwabe kago ibugua lalu, TÃguabi tà one bedarumebi mbirale mbira bule lalu bi lo wirimigo henene tagira pelonaga bialu harimi. TÃgua buleore lowa bi lo wialu lalu, Iname Dahuliya Andaganaga Kuini wali bedagohondo ira hagua ngabilo inisenesiru lomabu delolebi waini iba odo lomabu mulebi lalu lo wirimago ogoni heneneore tagira pelo buleberema, larimi. Ai tÃgua bule lalu lo wirimigo tagira pelo nde biaore bilimu laro. 26 Anigo Isaraele wali agali oali Iyibi dindini kamiruni tÃgua i̱ Anduane Homogo i̱nime bi larogo hale hadaba. I̱ninaga mini timbuni mini leneore kogoni howa heneneore laro. Yuda wali agali Iyibi dindiha bu kamiru tÃgua mbirale mbira buleore lalu i̱naga minini howa lone naloleberemi. TÃgua Anduane Homogo Bibahende Haru Haame Ho Haga kagonaga minini howa heneneore bulego larogoni lalu mbira naloleberemi. 27 I̱ Anduane Homogo i̱na tigatigaore larogo tÃhondo bayale mbira i̱na nabuleore laro. I̱na tà mo ko hai holenaga handayaho kogoni ndobe. Yuda wali agali Iyibi dindiha bu kamiruni bo wahai helonaga tÃnaga waitigi bu karu ibilarogola tà maru bo wahalu maru hina garime homalu tà aria lenego bibahendeore homaiore holeberemi. 28 Tà kamiru aria mbira mbira hangu Iyibi dindi yu wahalu Yuda dindiha dai buleberemi. Anidagua birangi Yuda wali agali emene hangu Iyibi dindiha Ãbu harimiru tÃgua bi larimigo henenedabe be i̱na bi larugo henenedabe tÃgua hondoleberemi. 29 I̱ Anduane Homogo i̱na tigatigaore larogo tÃhondo manane mbira walia holebero. Tà Iyibi dindini kamiore dege mo ko halu bo hilo wahai holebero. TÃgua mbirale uruni tagira ibirangi i̱naga bi ledogo habo nalagada lo manda bilimu. I̱na tÃhondo bule lalu bi lo wirugo biaiore holebero. 30 Anduane Homogo i̱na mbirale buleberodaruni ogodagua bulebero. I̱na Yudanaga Kini Sedegaia Babilononaga Kini Nebugadenesanaga giha minu yaharudagua Iyibinaga Kini Hobora kago ibu bo waholene waitigi kagonaga giha minuya holebero, lalu Anduane Homogohanda Yaremaiaha howa latagi hene.