SIRAGA 51

1 I̱naga Anduane Homogobi i̱naga kinibi í̠ kegohondo i̱ ka̱i̱ lalu Ngode Datagaliwabe howa i̱naga biamogo biaga kegonaga í̠ mo turu halu bi laro. 2 ÃÌ na i̱ baya hanguore mamage howa handaya ho halu i̱ biamogo bialu hegola i̱ mo ko nahe bayale haabo haru ai uruninaga í̠hondo ka̱i̱ lalu í̠naga mini yaraga haro. Ke̱ holenemebi bi dibudibu lalu bedago hale ho kayu bulenemebi i̱ mo pila nahe harugo ko. Wali agalime i̱ talima ibaga biyagola ina i̱ baya hanguore handaya ho halu i̱ biamogo bialu harigoni. 3 ÃÌ naga dara holene irane nawini dara halu biamogo bulenemebi í̠naga mini bayale mini lene kegomebi biamogo bialu harigoni. Wali agalime i̱ balu noleore heagola í̠na i̱ biamogo biri. ÃÌ nime i̱heba mandagi ibagabu hebagola wali agalime i̱ bo wanahebi bahondolene bu wiarume i̱ mo ko nahebi haru. 4 Wali agali tara hearume ira hagua bo delalu i̱ bo wahole bialu hearia í̠na i̱ nahomoliya hapai harigoni. 5 ÃÌ nime i̱ handaya ho heagola i̱ homeneru dindi nape kogoni. ÃÌ na i̱ baya hanguore mamage ho haabo hegola waliagali bi ko lalu ke̱ haga bu hearume i̱ mo ko halu kininaga deni i̱ ko biya lalu ke̱ howa godini helole haru nape wahaya. 6 Heneneore i̱ homeneru dalu humbirini andaga abale penego habo laya. 7 Wali agalime i̱ biamogo bialu mo wulene mbira nahe bibahendeme i̱ talima ibaga biai haya. Mbirali nde i̱ biamogo bilo taya bialu hewaria i̱ biamogo bulene mbira naheoreya. 8 Anduane Homogo-o i̱ ayu í̠naga dara holene ngegobi biabe maru ala í̠na bini ngagobi mitangi bialu ko. Wali agali í̠na ti biamogo bibelo í̠ malia ho hearu biamogo bialu waitiginaga giha hearu golope halu haru dai biriya. 9 I̱ abale nahomolenaga i̱na Anduane Homogo Daligaore kago olalu ibuhondo bi larogoni. 10 Horo ko tagira ibirangi ibugua i̱ wanahelobi i̱ wali agali ko bu karunaga hongo bolangua habe nahe kongibi biamogo bule kaware helonaga i̱na Anduane Homogo i̱ abaore kagohondo dugu bu mialu kogoni. I̱na í̠naga mini yaraga holenebi í̠hondo turu holene bi lalu ka̱i̱ lolenebi ha̱lo ha nabi lalu haabo holebero. 11 I̱ bi lalu mo ko holene wiangibi ko bu wiaru i̱ha anda ibulene wiangibi í̠na i̱naga bi larogo hale halu biamogo bialu haga ke. 12 Anduane Homogo í̠na i̱hondo uruni bialu haga kegonaga i̱na í̠naga mini yaraga halu í̠hondo ka̱i̱ lalu haabo holebero. 13 I̱ bamba igiri daliahe hewangi howa dindi tara tara wiaruaru de nahende howa i̱na Anduane Homogo tigatiga hale halu mini giga bulene bayale ngago ngibe lalu hale haru. 14 I̱ ibu andaga porogo puwa i̱ mini gigabi ngibe lalu bi laabo haruligo ai ani bialu haabo halu 15 i̱ni daliahe hewangi yari biagane gauni baya dedaligobi henego hama ibalu ayu agali wahe howa i̱ ira boga biai halu ibiraihe ale kogonigo mini gigabi bayale ogonime i̱naga bu miniha mo turu haabo haga nga. ÃÌ  igiri emene hewangi howa i̱na ibu talima pialu howa ibunaga hariga wiagoria pialu haru. 16 I̱na ibunaga bi emene hangu hale ho berewagola ibugua i̱ dewaore lawai haya. 17 Anidagua binigome i̱ mini gigabi wulene ngola halu haabo ko. Ani howa Anduane Homogohanda i̱hondo mini gigabi wulene ngiyagonaga ka̱i̱ lalu haabo ko. 18 I̱na ibunaga mini gigabi wulene ngago talima polenaga mini paga halu ibunaga mana bayale tigabi ngago bialu holene taga naholebero. 19 Heneneore larogo i̱na mini gigabi wulene ngago baya hangu yu ndibulo howa mana bayale tigabiru hangu bialu hole hame laru. I̱naga miniha mini bayale gigabi wulene ngago dara ho haabo howa i̱naga gi daligaha dogoladaga halu dugu bialu kogoni. 20 I̱ mini gigabi wulene yamuleore lalu hongo howa mana bayale wiago taluwa bialu howa ai i̱na ayu mo yu kogoni. Mini gigabi wule i̱ pigane ngola halu i̱na mbirale bayaleru lo manda birugome i̱ karulape holebero. 21 I̱na bu miniha hameore timbuni lowa mini gigabi wulene taya bialu henego ainde mini bayale ogoni mo yu ko. 22 Anduane Homogohanda i̱hondo mbirale bayale mbira i̱ mo turu halu bameore nginigo ogoni bi bayale latagi holene ngiya. Ani ngiyagome i̱naga turu holene ngogo bibahende latagi hai holebero. 23 Wali agali manda nabi bu kemiru tí iha mini bayale gigabi ngago manda bule i̱ koria kaware ibidaba. 24 Irane aginaga tigua mbirale uruni nayi kemibe. Ani bialu irane aginaga ibu olalu dugu bialu kemibe. 25 I̱na tíhondo langialu ogodagua laru. Yolo buleneha yagi wahalu mbirale ogoni bame yamidaba larugoni ndobe. 26 Mini gigabi wulenaga tí kaundiaha taya bima polene ndo nga. Ibunaga genda ngago yamialu tínaga payani mo yu howa manda bayale ngago mo yu halimu. 27 Ainde de handadaba ina bu miniha mo palia holene biabe erekuibi bialu ndo mo yini. 28 Ai tígua mini gigabi wulene yolo birimiyagua nde mbirale bayale tara tara ngaru mo yu dai buleberemi. 29 Tígua Anduane Homogonaga dara holene ngagohondo turu halu ibuhondo taga nahe howa ibunaga mini yaraga holene taga nahe halimulonaga i̱na tínaga bi la haro. 30 Ai biabe bulene ngida. Ngode Datagaliwabehanda horo yolo mulene pongo winigo tagira ibiragola tí yolo bayale ngaru mule ayu abale bigi bialu biabe biala harimidago bumaro bilimu, lalu Siragahanda lene.